أحلام ، ركز بقى معايا شوية، عشان المرة دي المقالة بتاعتنا مختلفة شوية عن المواضيع اللي بنتكلم عنها في المعتاد.. عمرك حلمت ف يوم من الأيام إنك تقدر نفسك تصمم حلم خاص بيك، وتشكله في صورة لعبة أو فيديو أو فيلم، أو حتى قطعة فنية مصنوعة ومبنية من الصفر بمحرك جرافيك حقيقي؟! 😀
الموضوع بقى حقيقة ومش أحلام أو خيال.. وبأكتر طريقة طموحة ممكن تسمع عنها وتشوفها ف حياتك.. وكل ده من خلال المجهود العملاق، لشركة الترفيه والفيديو جيمز الشهيرة (Media Molecule).. المشروع الجديد للشركة.. لعبة (الأحلام Dreams)..
ممكن بعضكم يكون سمع عن Media Molecule قبل كده، من خلال لعبتهم الشهيرة اللي فاتت Little Big Planet، بس ممكن تكون سمعتهم موصلتش لحد عندكم لو انتم PC Gamers، بمعنى إنكم بتلعبوا على الكمبيوتر بس.. وده لإن شركة Media Molecule هي استوديو طرف أول تابع لشركة سوني Sony، وألعابهم ومشاريعهم كلها حصرية لمنصة سوني الأكثر شهرة (بلايستيشنPlayStation ).. بالأخص PlayStation 4..
طيب كل ده جميل.. إيه بقى لعبة Dreams دي؟
في الواقع، وصف Dreams بأنها مجرد لعبة هو تقليل كبير أوي منها.. لإنها عبارة عن محرك كامل لصناعة الألعاب، مخصص وموجه لمحبي الألعاب والترفيه، عشان يخليهم يصنعوا أي حاجة هما عايزينها بنفسهم، ويلعبوها، أو يخلوا أي شخص تاني من جمهور Dreams في أنحاء العالم كله يلعبها 😀
أيوه أنت قريت صح.. أنت اللي بتصنع لعبتك أو (حلمك) بنفسك في Dreams.. أحلام تحت إيدك محرك ألعاب Game Engine كامل، اسمه محرك Dreams، وعندك القدرة إنك بمجرد إستعمال الدراع بتاع البلايستيشن controller، إنك تصمم لعبة كاملة من الصفر حرفيًا.. وبطريقة هتخليك تنبهر حرفيًا من مقدار سهولتها.. تخيل إنك تقدر تبني لعبة كاملة، بكل الجرافيك وتصميم البيئات والشخصيات والملابس والديكور، والإضاءة والرسم الفني للعبة كلها، ده غير الأصوات والموسيقى، والقصة وطريقة سردها، وكمان طريقة اللعب أو Gameplay.. حتى الأنيميشن بتاع تحريك الشخصيات نفسها على الشاشة، أنت اللي بتعمله من الصفر 😀
متخيل؟! 😀 أكيد أنت دلوقتي دماغك لفت، ومش فاهم إزاي حاجة زي كده ممكن تحصل، وحاسس إن أكيد الموضوع هيبقى صعب جدًا ومحتاج سنين من الدراسة والتجريب عشان تقدر تعمل حاجة حقيقية.. والحقيقة إن لأ خالص 😀 أنت باستعمال محرك Dreams الأسطوري، وبمجهود فريق Media Molecule الرائع، هتقدر إنك تتعلم التصميم كله، والسوفت وير نفسه اللي بيشكل أساس الـ Game Design في ربع ساعة مثلًا 😀 تخيل انت بقى..
أحلام
تخيل إنك ممكن تكون في يوم من الايام شفت فيلم وعجبك، ولا حلمت حلم نفسك تكرره، ممكن تعيد صنعه من الصفر جوه محرك لعبة Dreams، وتلعبه بنفسك، أو تخلي غيرك يلعبه.. في فكرة رواية جديدة لصديقي الكاتب الكبير محمد عصمت، إسمها النيدلان، بتتكلم عن عالم إخترع جهاز بيسجل الأحلام والكوابيس، ويخلي الناس يقدروا يعيشوها ويبقوا جواها فعليًا كإنها لعبة.. هو ده بالظبط اللي Media Molecule قدروا يحققوه في Dreams 😀 تخيل مثًلا إنك عندك كابوس مرعب عايز توريه للناس، وتنافس بيه أي رواية رعب شهيرة، أو حتى فيلم.. تخيل إنك تقدر تعمل بنفسك لعبة الرعب اللي تغلب Resident Evil، وتعمل لعبة الأكشن اللي تغلب Assassin’s Creed، ولعبة المغامرات اللي تغلب Uncharted.. تخيل إن كل القوة دي متاحة ليك أنت، وانت قاعد في بيتك تحت الغطا، وماسك الدراع في إيدك، وجنبك كوباية النيسكافيه..
الفكرة كمان إن معظم الناس آه مش فنانين جرافيك، ومش متخصصين في تصميم الألعاب، لكن في فعلًا فنانين قدروا يعملوا حاجات أغرب من الخيال، وحاجات أقوى من الواقع نفسه.. ده في ناس قدروا يعيدوا تصميم ألعاب شهيرة، أو أجزاء منها، باستعمال المحرك ده، وبصورة جديدة وتحفة حرفيًا.. بصوا مثلًا على الفيديوهات دي
فيديو 1 – إعادة تصميم للعبة الرعب القصيرة P.T
اللي كانت Teaser تشويقي أو ديمو Demo زي ما بيقولوا من مصمم الألعاب الأشهر في العالم هيديو كوجيما Hideo Kojima، للعبته الجديدة اللي كانت هتعمل ريبوت Reboot للسلسلة الشهيرة Silent Hill، قبل ما يتم إلغاءها من جانب KONAMI، وطرد كوجيما من الشركة بسبب مشكلة كبيرة حصلت بينهم، وتم إلغاء المشروع، لحد ما كوجيما اشتغل على مشروعه الجديد اللي نزل على منصة بلايستيشن Death Stranding..
إعادة تصميم P.T في محرك Dreams
هنا: https://www.youtube.com/watch?v=TP2_xMwIRio
فيديو 2 – إعادة تصميم لمراحل واقعية من لعبة الرعب الشهيرة
وتحفة استوديو Visceral Games اللي صدرت من فترة طويلة على 3 أجزاء.. Dead Space.. من نشر شركة Electronic Arts أو زي ما انتوا تعرفوها EA Games.. أيوه هي نفسها اللي بتعمل لعبة Fifa بتاعت الكورة، ولعبة battlefield.. وكمان هي الشركة الأشهر بتصميمها للعبة Medal of Honor الشهيرة بميدل، في كل سايبرات مصر 😀
إعادة تصميم Dead Space في محرك Dreams
هنا: https://www.youtube.com/watch?v=fs29aJESWtA
فيديو 3 – إعادة تصميم لتحفة شركة Bethesda الشهيرة
اللي بتتكلم عن العالم بعد المحرقة، والحرب النووية.. لعبة Fallout، اللي صدر منها أجزاء عديدة حازت على جوائز كبرى وعالمية، منها جائزة لعبة السنة لـ Fallout 3 سنة 2009، لأفضل لعبة في السنة بأكملها.. وللي مش عارفين، الجايزة دي زي الأوسكار كده في الجيمز 😀
إعادة تصميم Fallout في محرك Dreams
هنا: https://www.youtube.com/watch?v=VWsWdp7VUMw
فيديو 4 – إعادة تصميم لتحفة شركة روكستار جيمز Rockstar Games
اللي مفيش بني آدم على وجه الأرض ميعرفهاش، GTA.. أو كما يعرفها أطفال السايبرات بإسم (جاتا) 😀 طبعًا مش لازم أقول قد إيه اللعبة دي تعتبر هي أكبر لعبة ناجحة في تاريخ الجيمز، ومش بس كده، الجزء الخامس GTA V يعتبر هو أكثر منتج ترفيهي مبيعًا في تاريخ كوكب الأرض، متفوقًا على سلسلة Star Wars وروايات Hary Potter وأرباح Lord of the Rings، وحتى أفلام مارفل زي Avengers: Endgame.. اللعبة اللي حققت أكتر من 120 مليون نسخة مباعة، حسب آخر تقرير في يناير اللي فات، من سنة 2020.. إضرب كل نسخة ف 60 دولار ع الأقل، وشوف هيطلعلك مبلغ كام 😀
إعادة تصميم جزء صغير جدًا من GTA في محرك Dreams
هنا: https://www.youtube.com/watch?v=Wy8MEy9L1A8
بعد كل اللي إنتوا شفتوه ده.. رأيكم إيه؟! أكيد منبهرين، وحقكم بصراحة.. أنا نفسي منبهر بالتكنولوجيا التحفة دي، وأنا بكتب المقال.. ومش متخيل لحد دلوقتي إن كل الأفكار اللي في دماغي، ممكن أقعد أصممها باستعمال محرك Dreams.. ومش بس أنا اللي ممكن أصمم، ده أنا ممكن أستعمل تصميمات لحاجات ناس تانية عملوها، وأحطها جوه لعبتي.. كإن عندك بنك كامل من التصميمات، ممكن تستعمل منه أي حاجة جوه مشروعك أنت، أو تعمل حاجة جديدة من الصفر.. أنت ملك نفسك، وحر زمانك 😀 وكل ده ب 40 دولار هو سعر اللعبة المتاحة حصريًا على PlayStation 4، واللي يعتبر سعر رخيص، بالمقارنة بالتسعيرة العادية للألعاب الكبرى، اللي هي 60 دولار..
وبكده، طموح شركة Media Molecule الكبير، في إن لعبة Dreams تصبح هي اليوتيوب الجديد، ل أحلام الناس كلها حوالين العالم، بدأ يتحقق بالفعل، وبخطى ثابتة.. منذ إطلاق اللعبة في 14 فبراير اللي فات، وهي عاملة ضجة واسعة حوالين العالم، و واخدة تقييمات أسطورية من نقاد الألعاب الأكثر شهرة، ومتفوقة على مشاريع أكبر منها في الميزانية بمراحل.. لدرجة إنها ممكن مستقبلًا، تتفوق على منصة YouTube نفسها، وتضرب Google في مقتل 😀 مين عارف..
في الأول والآخر، هو ده الحلم..
اقرأ أيضاً
