أسرار جوجل الملكية بقلم:إسلام عبدالله

الإنترنت دلوقتي بقى جزء لا يتجزأ من حياتنا اليومية.. إحنا بنقعد على الإنترنت دلوقتي أكثر مابنقعد مع عائلتنا أو حتى مع نفسنا.. لأن الإنترنت يعتبر هو مصدر المعلومات والترفيه الأهم والأعظم على مستوى الكوكب دلوقتي.. ولأن الوقت من ذهب والإنترنت بيأكل وقت كبير مننا.. فكان لازم إننا ندور على بعض الأسرار اللي هتوفر علينا الوقت والمجهود أثناء استخدمنا لشبكة المعلومات وطبعا اسم شركة جوجل العملاقة أصبح مرادف أو على الأقل موازي لمصطلح الإنترنت.. ماينفعش نقول اسم إنترنت من غير ما نفتكر على طول اليوتيوب ومحرك بحث جوجل.. وعلشان جوجل شركة عملاقة ومتفردة صنعت لينا بعض الأدوات اللي هتسهل علينا تصفحنا في الإنترنت.. فالنها ردة هنتكلم عن مجموعة أدوات واستخدامات من جوجل تعتبر فعلا أسرار ملكية عظيمة هتخلي الإنترنت أسهل وأفضل كثير في تعاملتنا بعد كده. وهحط اسم كل أداة وازاي تشتغل عليها مباشرة من خلال المقال ده، فيلا بينا.

• Pop up blocker for Chrome :

أداة من أهم الأدوات اللي ريحتني جدا على المستوى الشخصي خلال تصفحي للإنترنت.. دائما لما تخش في أي موقع وتدوس على أي لينك فيها هو يقوم طالعلك لينك غريب عجيب مريب كده.. يعني تخش تدوس على لينك كيف تقرأ أكثر في وقت أقل تلاقي صفحة تانية ظهرتلك تقولك عشر وصفات لتخسيس الأرداف مع وصفات أم حلمبو للحفاظ على الجمال.. وأم حلمبو دي أقل حاجة بتطلعلي ساعتها.
ده انا شفت بلاوي على النت ده والله.. المهم إن Pop up blocker for Chrome  الأداة دي بقى بتمنع أي موقع ان يطلعلك صفحات أو إعلانات تانية منبثقة على أي صفحة.. وهي فعالة جدا طبعا علشان من جوجل نفسه.. المهم أنا لاحظت إن في إعلانات بتظهر مع وجود الأداة وتقريبا بتبقى الإعلانات اللي تبع جوجل.. بس لاحظت برضو إن الإعلانات دي بتبقى عادية ومش مزعجة زي باقي الإعلانات.. على العموم جرب الأداة دي بنفسك وهتدعيلي جدا وهتقول وداعا للإعلانات المزعجة للأبد..

• Google Translate :

طبعا مفيش حد بيستخدم الإنترنت ومايعرفش هو إيه ترجمة جوجل.. واللي مايعرفش هنقوله إنها ميزة بتقدمها جوجل لأي حد إنه يحول أي نص كلام من لغته لأي لغة تانية في العالم ولكن الجديد معانا هنا في المقالة ومحدش كثير يعرفها إن جوجل مصممة أداة للترجمة دي بتحطها على متصفحك وتقدر تترجم أي جملة او أي كلمة من خلال ضغطة بسيطة على الزر الأيمن للماوس بتاعك.. بتعلم على الجملة وبتظللها وبتضغط كليك يمين بس كده وهيظهرلك ترجمتها فورا بدون إنك تحتاج تخرج من المتصفح أو تفتح صفحة تانية.. بتعرف معني الكلمة اللي مش فاهم معناها في ثواني وبتكمل شغلك تاني.. أداة مريحة جدا وممتازة وكثير من الناس مايعرفوهاش.

• LastPass: Free Password Manager :

كل يوم بنخش على عشرات المواقع ده غير الفيس بوك وصفحات السوشيال ميديا وكل موقع من دول بيحتاج ياخد بياناتك علشان يبيعها، ما انت زبونهم اللذيذ.. وهنبقى نتكلم عن الموضوع ده بالتفصيل بعدين.. لكن المهم انك بتجبر انك تحط بياناتك وتعمل إيميل وباسورد علشان تقدر تخش على المواقع دي.. ونظرا لكثرة المواقع والطلبات وبالتالي كثرة الإيميلات والباسوردات فجوجل عملت الأداة علشان تسهل عليك الأمر.. جوجل هتحتفظ بكل باسورد وبكل إيميل بتحطه وأول لما تخش على الجهاز أو أي جهاز في مكان تاني بالعالم هي هتحطلك الباسوردات والإيملات دي أوتوماتيك.. واحد فلحوص هيقولي طيب وأنا أحط باسورداتي ليه في إيد جوجل مايمكن تستغلها بعد كده.. هقولك إن انت ساذج وأصلا جوجل وغيرها من الشركات مش محتاجة أو مستنياك تديهم باسورداتك لأنهم بالفعل عارفين كل حاجة عنك من أول مابتصحى من النوم لحد ما بتنام تاني الموضوع بس إنهم بيسهلوا عليك الأمر بدل ماتقعد تتشحطط كل مرة يعني في موقع ولا صفحة وتنسى الباسورد وتضطر تعمله من جديد..

• Block Site :

دي أداة مهمة جدا وزي ما واضح من اسمها انك بتعمل بلوك لأي موقع تحب مايظهرش عندك.. وأكثر استخدام ليه هو طبعا غلق المواقع الإباحية أو أي موقع بيروج للعنف أو غير مناسب ليك أو لأفراد عائلتك.. ولكن ليه استخدامات مختلفة أكثر انا بعملها بشكل شخصي.. انك ممكن لما تكون في شغل مثلا أو عندك ديد لاين لمشروع أو مش عايز حاجة تشغل وقتك فانت بتعمل بلوك لكل صفحات السوشيال ميديا لفترة من الوقت.. هتقولي ماهو أنا مش محتاجها ومش هخش عليهم وقت ما أحب هقولك الإنسان دعييييف بصوت محمود عبد العزيز الله يرحمه وإن ساعات كثير إرادتنا بتبقى هشة وهتلاقي نفسك دخلت عليها وضيعت وقتك.. علشان كده الأفضل إنك تعملها بلوك مؤقت بالأداة دي وبعد ماتفضى تلغي البلوك وتعيش حياتك وتضيع وقتك من تاني.. 😄

• Awesome Screenshot: Screen Video Recorder :

أداة ممتازة جدا وسهلة في الاستخدام.. وقت ماتحب تدخل على موقع وتاخذ اسكرين شوت لأي صفحة أو جزء منها.. الأداة دي بكل بساطة بتعملهالك وبكل سهولة وغير كده كمان إن الأداة بتخليك تأخذ بدل الاسكرين شوت فيديو كامل لموقع ما.. يعني انت مثلا بتعمل تسجيل دخول على موقع فري لانسر.. هتستخدم الأداة دي وهتخليك تسجل كل حاجة بتعملها على الموقع وتحتفظ بيه كشكل فيديو بحيث انك تقدر تشارك بيه بعد كده مع أي حد وتوريه إزاي يعمل تسجيل أو انك تقوم بتسجيل أي شرح أو طريقة تعليم سهلة وترفعها على موقع يوتيوب وتتربح منها.. أداة ممتازة جدا ومفيدة وسهلة..

طبعا في أدوات كثيرة مفيدة وبستخدمها أنا بشكل شخصي لكن مع خبرتي الطويلة عرفت إنك لما تدي حد معلومات كثير مرة واحدة مبيستعملش عشرين في المية تقريبا منها.. علشان كده أنا حطيت في المقال ده بعض الأدوات اللي احنا نحملها بسرعة ونشتغل عليها بحيث إنك تحترفها بسرعة وتقدر تستفيد منها بأفضل ميزاتها.. والأسبوع الجاي هحط بعض الأدوات التانية اللي هتفيدنا وهتخلينا نعرف سوا باقي الأسرار الملكية اللي منعرفهاش عن جوجل وازاي هتخلي حياتك على الإنترنت أسهل وأفضل.