حكينا مع بعض في المقال اللي قبل ده على طول عن التنويم المغناطيسي بشكل عام بطريقة مبسطه ووضحنا كل حاجة عنه وعن الحكايات والخرافات اللي بتتحكي عنه .. ولو مقرأتش المقال لسه هتلاقيه موجود تحت في اخر الصفحة ممكن تبص عليه ..
النها ردة هنتكلم عن التنويم المغناطيسي برضو ولكن في حكاية غريبة شوية . ” عن أول فيلم في التاريخ بيتم استخدام التنويم المغناطيسي على معظم ابطاله ” .. حكاية ظريفة جدا وغريبة في نفس الوقت ..
القصة ابتدت لما المخرج الألماني “ويرنر هيرزوج -Werner Herzo ” قرر انه يعمل فيلم بطريقة جديدة ومختلفة .. فيلم كل أبطاله منومين مغناطيسين بينفذوا الأداء اللي هو عايزه بالظبط علشان تطلع رؤيته السينمائية زي ماكان بيتمنى .. وبالفعل بدأ في تنفذ إجراءات الفيلم ده اللي اسمه ” قلب من زجاج – Heart of Glass – Herz aus Glas ” انتاج عام 1976 .. الفكرة كانت غريبة وغامضة أووي ساعتها لدرجة كبيرة واجتذبت انظار ناس كثير .. منهم المؤلف والمخرج “آلان غرينبرغ – Alan Greenberg”اللي كتب كتاب كأمل عن تجربة وصناعة الفيلم ده وسماه ” كل ليلة تختفي الأشجار -Every Night the Trees Disappear” وأتكلم بتفاصيل التفاصيل عن الأحداث الغريبة اللي تمت اثناء تصوير الفيلم وعملية التنويم المغناطيسي اللي كان بيخضع ليها كل ممثلين الفيلم معادا ممثل واحد قام بشخصية واحد اسمه Hias -(Josef Bierbichler) هو ده اللي مخضعش للتنويم المغناطيسي علشان دوره كان يتطلب كده لأنه كان قايم بدور عراف القرية اللي أتوقع لها حدوث كارثة عظيمة ومحدش من اول الفيلم كان مصدقه ساعتها.
نحكي بقى شوية معلومات عن الفيلم وقصته وبعدين نحكي عن الكواليس بتاعته ..
قصة الفيلم بمنتهى البساطة بتحكي عن قرية اسمها “بفاريا Bavaria-” في القرن الثامن عشر .. اشتهرت القرية دي بصناعة نوع نادر من الزجاج اسمه زجاج الروبي .. وهو عبارة عن زجاج احمر قاني بجودة ملهاش مثيل .. لحد هنا الموضوع عادي جدا وكل الناس مبسوطة .. ولكن فجأة يموت رئيس العمال في المصنع ده والمشكلة ان هو الوحيد اللي معاه سر التركية لتصنيع زجاج الروبي وبموته أصبح مفيش أي مخلوق تاني عنده القدرة على تصنيع الزجاج ده وأصبحت القرية المشهورة الغنية في مشكلة عويصة جدا وطبعا كان اكثر واحد هيتجنن من ده هو صاحب المصنع نفسه اللي كان شغال فيه رئيس العمال ومعظم سكان القرية .. واتحولت القرية في يوم وليلة لمجموعة من المهاويس اللي بتبحث باستماته على السر الضائع بتاع تصنيع زجاج الروبي من جديد .. طبع الحبكة زي ما انتم قرأتم بسيطة جدا ولكن هل الفيلم نفسه بسيط .. طبعا الإجابة لأ .. الفيلم كان معقد جدا في تمثيلة وصناعته .. اللي هنتكلم عنها باستفاضة دلوقتي .
اختيار كاست الممثلين :
تم الإعلان عن تجربة اداء لفيلم جديد وكان من سطر واحد بس ( تجربة تنويم مغناطيسي هيتم تنفيذها وهنختار من خلالها ممثلين للاشتراك في فيلم سينمائي ) .. اعلان غريب ومريب جدا طبعا .. ولكن الصدمة لما تعرف ان في أكثر من 70 شخص حضروا تجربة الأداء دي .. وكانوا رجالة وستات وشباب وأطفال حتى .
تنويم الممثلين مغناطيسيا :
قام المعالج الشهير thorwald dethlefsen بتنويم الممثلين مغناطيسيا .. ووقفهم كلهم قدامه وطلب منهم يصمتوا تماما .. ورفع ايده وقالهم انتم دلوقتي بتشعروا براحة كبيرة جدا .. جسمكم خفيف .. خفيف لدرجة انكم بتطيروا في السحاب .. وقعد يكلمهم فترة بنغمة هادئة وبنبرة مريحة لحد ما دخلوا في مرحلى الترانس .. واصبحوا خاضعين لاقتراحاته وبتأثر عليهم .
بعض المشاكل اللي حصلت في التصوير :
كان مرة المخرج بيصور مشهد في اربع فلاحين .. ونيمهم بنفسه في دقيقتين ولقنهم هيقولوا ايه علشان خاطر يطلع المشهد مظبوط من وجهة نظره .. قالهم ” انتم دلوقتي واقفين على ارض سماوية .. وأول لما تفتحوا عيونكم هتلاقوا عمالقة مخيفين جدا ومدمرين الأرض حواليهم .. هتبقوا خايفين لدرجة شفافيفكم هترتعد من الخوف وأضلعكم تكاد تتحطم من الارتعاش .. ولكن مهما كان الخوف يعتريكم ومهما كنتم حاسيين .. فانتم بأمان تام ومفيش حاجة هتأذيكم .. وبالفعل الممثلين الأربعة كانوا مرعبين جدا في المشهد لدرجة ان المخرج بعد ما صوره في دقيقتين جري عليهم جري وطلعهم من حالة التنويم دي ورجعوا مرة ثانية طبيعيين . بس حصلت بعض الحوادث اللي كان الخروج من التنويم فيها صعب واضطروا يستعينوا بالمتخصص thorwald dethlefsen علشان يحلها .
في النهاية .. بنصح الجميع يشوف الفيلم ده وبعد ما يخلصه يشوف مشاهد من الكواليس بتاعته وطريقة صناعته ويقرأ الكتاب اللي أتكلم عنه لو قدرت اسم الكتاب تاني Every Night the Trees Disappear .. الفيلم غريب ومش تقليدي .. لازم تبقى عارف كده وانت بتشوفه .. تجربة مثيرة جدا ومختلفة هتتعلم منها كثير زي ما اتعلمت أنا .. مشاهدة ممتعة ومنتظر آرائكم في الفيلم .
