الفلوس دي ورق.. والورق ده خشب.. معيشك في قلق ومالوش أي سبب..
ده مقطع من أغنية الفلوس بتاعت فريق “إم تي إم”، وطبعًا احنا متفقين مع بعض إن احنا هنتكلم إزاي، ممكن نقلل القلق ده عن طريق توفير مصدر دخل جديد لينا يرفع من مستوى معيشتنا، عن طريق passive income وشرحنا ده في الجزء الأول من المقالة اللي فاتت إزاي تزود دخلك لو عندك رأس مال، لو مكنتش لسه قرأت المقال، تقدر تبص عليه من (هنا)
هنتكلم النهاردة بقى عن الجزء الثاني من إزاي تحقق دخل من passive income وأنت معندكش رأس مال.
بص مفيش حاجة في الدنيا بتظهر من العدم، يعني أنت مش في يوم وليلة كده هتزود دخلك من غير ما تعمل أي حاجة، لازم تكون بتستثمر في شيء علشان تقدر تجني منه بعد كده، وطبعًا أسهل شيء للاستثمار إنك يكون عندك رأس مال تستخدمه وده هيوفر عليك وقت ومجهود كبير جدًا، ولكن لو معنديش فلوس هل ماقدرش أصنع دخل، لا هتقدر طبعًا بس هنغير في طريقة الاستثمار بتاعتك بدل ما كنت هتستثمر في فلوس، هتستثمر وقتك ومجهودك أنت، إزاي بقى..؟!
يعني حضرتك هتقوم بمشروع بنفسك، المشروع ده مش هيحتاج منك أي فلوس أو مُتطلبات غير وقتك ومجهودك هتصنع حاجة بوقتك الثمين، يعني مثلًا رجعت من الشغل مش هتستريح ولا هتقعد على الفيس ولا هتعمل أي حاجة تانية في الدنيا غير التركيز على مشروعك، وده في الأول بس وبعد ماينتهي هتبتدي يدخلك منه دخل مُتكرر بعد كده من غير ما تكرره تاني، يعني هتتعب في الأول وبعدين تستريح بعدين زي ماكنا بنسمع أهالينا كده وهما بيقولوها لينا في الدراسة، بس المرة دي بجد ومش جبر خاطر زي ماحصل من أهالينا زمان، فيلا بينا بقى نتكلم في المهم ونقول هنعمل ده إزاي..
• تقديم محتوى: بص يا سيدي مدام معندكش فلوس إنك تستثمر بيها، فهتستثمر حاجة كانت عندك قبل كده، زي ايه مثلًا، إنك زي حالاتي كده كاتب وبتحب الكتابة، فممكن تكتب كتاب شيق ومميز يعجب الناس وتفضل تشتريه لمدة سنين قدام وكل مرة الناس بتشتري الكتاب ده أنت بتكسب منه، وطبعًا أنا مش هضرب مثل بشخصي الضعيف، احنا هنضرب مثل بالحوت الكبير الحاج ستفين كينج، الكاتب اللي عمل ثنائية فيلم it، وأفلام زي The Shawshank Redemption و The Green Mile ، اللي هما محطوطين في أعظم الأفلام على مستوى العالم، الأعمال دي كلها كانت روايات في الأول حققت نجاح وعملت مبيعات كبيرة جدًا في وقتها ومازالت بتحقق مبيعات لغاية دلوقتي..
وهنا يعتبر العمل ده passive income؛ لأن ستفين كينج كتب العمل ده لمرة واحدة تعب فيها في الأول ومازال يتحصل على دخل منها لغاية دلوقتي، هتقولي هو أنا “ستيفن كينج” يا عم علشان أعمل المكاسب دي، هقولك ستفين كينج نفسه ماكنش هيعرف إنه هيعمل المكاسب والنجاحات دي، أنت أعمل اللي عليك والرزق ده من عند ربنا وده مثال بسيط على إنك إزاي تستغل وقتك كاستثمار، ستيفن كينج ماكنش عنده رأس مال أو أملاك وهو بيتدي يكتب، كل اللي استخدمه هو وقته الخاص ومجهوده الشخصي، استثمر فيهم وحقق نجاح عظيم من خلالهم، طيب افرض أنا مبعرفش أكتب، أعمل ايه؟!.. هقولك يا سيدي..
-اليوتيوب: اليوتيوب ده بقى مصدر دخل عظيم جدًا لناس كثير على مستوي العالم، هتقولي اه طبعًا بس صعب جدًا الناس تنجح في الأول، هقولك فعلًا في ملايين بيظهروا على اليوتيوب كل يوم، أنا هتفرج عليك أنت ليه بالذات ؟!.. لازم تكون مختلف أو محتواك متميز، مش لازم على فكرة تكون بتكلم عن شيء عظيم أو عبقري، في ناس بتجيب ملايين من إنها بتتكلم عن حاجة زي الألعاب أو الأفلام مثلًا، ودي مش محتاجة منك رأس مال خالص، أنت بتلعب لعبة أو بتتفرج على فيلم أو بتقرأ كتاب وتخش تقول رأيك فيه بس بطريقة مختلفة ومميزة، طريقة عرض دمها خفيف أو من وجهة نظر غير مألوفة، جرب حظك ومتضيعش وقتك في حاجة ملهاش لازمة، بس أهم حاجة تقدم محتوى مختلف أو بطريقة عرض مُختلفة.
-حاجة ثانية عن اليوتيوب، مثلًا حضرتك عندك هواية إنك بترسم، أو بتعمل شغل هاند ميد، أو ليك خلطة سحرية كده في الطبخ، ممكن تستغل إنك تعمل دورات وبتاخد منها مقابل مادي، بس هتدي الدورة لواحد أو أثنين أو 100 شخص، أنت هنا بتخسر وقت ومجهود وبتدفع فلوس حجز قاعات ومواصلات وخلافه، لكن أنت ممكن تدي نفس الكورسات دي بس أونلاين، أنت بتقدم خلاصة تجارب حقيقية وطريقة عملية فعلًا بتساعد بيها الناس، بس الفرق هنا إنك بدل ماتديها ل 100 أنت بتديها لآلآف، حضرتك تبقى مسافر أو بتلعب أو نايم، والدورات بتاعتك بتتباع وبتاخد عليها فلوس أو بتتشاف لو هتنزلها مجانا على اليوتيوب وهتاخد عليها فلوس برضو، بس لازم تكون تعبت واجتهدت جامد جدًا في الأول علشان خاطر تكسب من اللي عملته بعد كده من غير مجهود يذكر.
-طريقة تانية إنك تحقق دخل بدون رأس مال، حضرتك هتكتب مقالات كويسة، تصور صور حلوة، تعمل أي موهبة عندك وتعرضها لأصدقائك على صفحات التواصل الاجتماعي، وهما شاكرين ومع الاستمرار هيعملوا كميونتي محترم لحضرتك وتلاقي صفحتك تضخمت بالمتابعين، أنت تعبت في الأول إنك تكبر المتابعين دول بشغلك ووقتك ومجهودك، هنا بقى هيجي الدور إنك تكسب من شغلك اللي عملته ده بعدين، هتلاقي شركات كثير بتعرض إنها تديك فلوس في مقابل إنك تعرض منتجتها للمتابعين بتوعك، حد أعجب بموهبتك وحب يستغلها بشكل ما في مقابل مادي بيعرضوا عليك، والكثير والكثير من الأمور هتلاقيها ظهرتلك من حيث لاتدري وبقت بتجبلك فلوس من غير ما تتعب فيها؛ لأنك تعبت في الأول إنك تصنعها.
-في أساليب كثير وأنواع كثير تقدر تجيب منها فلوس ودخل متعدد وعدة طرق سواء برأس مال أو من غير رأس مال خالص زي ما شرحنا مع بعض، الإنترنت بقى عالم لوحده، لازم تستغله كويس جدًا، لازم تجيب منه فلوس بدل ما أنت اللي عمال تدفعله فلوس، أعرف مواقف قوتك ايه واستثمرها كويس، خش ابحث عن passive income واقرأ مقالات كثير ومختلفة عنها، أنا كل اللي عملته دلوقتي إني فتحتلك باب ماكنتش شايفه قبل كده وأنت بقى اللي تقرر إنك تخوض التجربة وتكبر من دخلك وتحقق أحلامك، أو تقعد تتحسر وتعمل ميمز زيك زي ملايين الناس اللي مضيعه وقتها على الفاضي..
أتمنى يكون المقال عجبكم ومستني آرائكم في التعليقات.
