النهاردة هنتكلم عن شيء مُهم جداااااااااا جدااااااااااا.. ازاي تكسب فلوس.. إن لم يكن أهم شيء في العالم بتاعنا حاليًا.. هو بالنسبة لي مش أهم حاجة في حياتي طبعًا بشكل شخصي ولكن من أهم 3 حاجات في حياة أي بني آدم على الأقل عايش معانا على كوكب الأرض.. ألا وهي الفلوس.
ازاي تكسب فلوس أكتر بشغل أقل
الفلوس.. الفلوس.. الفلوس..
ممكن تبقى حلمك بس تقلب كابوس..
الفلوس.. الفلوس.. الفلوس..
بتسيطر على العالم من أيام الهكسوس..
الفلوس.. الفلوس.. الفلوس..
هي سر القوة والطريق للنفوذ..
دي كانت كلمات أغنية الفلوس لفريق “أم تي أم” المعروف، كلمات معبرة جدًا عن الوضع والقوة اللي اكتسبته الفلوس في حياتنا، وبقت أحلام ناس كثير مننا بتقف على تواجدها، واحد هيقولي جبت التايهة يا فالح، ما كلنا عارفين إن الفلوس مُهمة جدًا علشان نعيش، هقولك صح جدًا، لكن اللي أنت متعرفوش إن في طُرق كثير نجيب بيها الفلوس من غير ما نشتغل شغلنا التقليدي المعروف، اللي هو اشتغل 10 أو 12 ساعة في اليوم غير ساعتين رايح جاي فيبقى شغلي من 14-16 ساعة علشان خاطر مُرتب شهري مابيكفيش مصاريفي حتى مش يكفي إني أدخر وأحوش منه، فيبتحول يومي الطبيعي اللي بشتغل فيه علشان أقدر أصرف على فُسحي وهواياتي، إلى إن شغلي ده هو مصدر دخلي علشان أقدر أروح الشغل برضو..
يعني ايه.. رأيك إني أسيب الشغل يعني ومرحوش وأبقى عاطل علشان أعجبك!!
هقولك لأ طبعًا، بس العالم كله مش بيعمل كده دلوقتي، العالم المحترم فيه الناس بتشتغل علشان خاطر تنتج لإقتصادها ويعود إقتصاد البلد عليها في شكل خدمات وأعمال محترمة تنفعه وتنفع أولاده وفي نفس الوقت بتعود عليه نفسه إنه يدخر أو يتفسح أو يمارس هوايته، مش إنه يفضل طول النهار والليل في طحونة شغل علشان يقدر يغطي مصاريف يومه، ده إذا قدر أصلًا إنه يغطيها في ظل ارتفاع الأسعار الجنوني اللي بيحصل كل يوم والتاني، طبعًا احنا كلنا في ظروف استثنائية وعلشان كده لازم تواجه الظروف الاستثنائية دي بحلول استثنائية..
وأنا كواحد طبيعي زيكم بفكر إني أزود الدخل بتاعي لقيت أفكار عظيمة جدًا، وبدأت أطبقها في حياتي وقولت بدل ما أنفذها لوحدي أشارككم بيها لعلى وعسى تكون الأفكار دي سبب في تغيير حياة حد فيكم للأفضل فيفتكرني بدعوة بظهر الغيب حلوة ولا حاجة..
اللي هنتكلم عنه دلوقتي هو إزاي تقدر تزود دخلك بطريقة ملحوظة وبنفس الوقت تشتغل بمجهود أقل، بحيث بعد كده يبقى عندك دخل محترم، ووقت تقعد مع أسرتك وتتفسح وتمارس هواياتك وترجع حياتك طبيعية تاني مش مجرد حياة مكرسة للشغل وبس، وده لقيته في مجموعة أفكار عظيمة تندرج تحت مصطلح اسمه: “Passive income”
والمصطلح ده بالمعني العربي غريب شوية، المعني الحرفي ليه هو ” الدخل السلبي”، هتقولي دخل سلبي ايه يا عم أبوس ايدك احنا عايزين دخل إجابي، معلش هو المصطلح ترجمته الحرفية كده لكن معناه مختلف تمام، بحيث إن الباسيف إنكم ده يعني بالمفهوم الطبيعي بتاعه إنك تقدر تصنع دخل بدون ما تشتغل دائمًا، يعني بتعمل شغل في الأول ويفضل يجيلك منه فلوس على طول..
يا سلام.. بجد الكلام ده..
هقولك اه بجد ومش كده وبس ده أنا هقولك على طُرق كتير تقدر تحقق منها دخل مكنتش تعرفها، والأفضل من ده كمان أنا هقولك على مصادر “passive income”، تكسب منها، إذا كان معاك رأس مال، أو مش معاك رأس مال خالص وبرضو هتقدر تكسب وتصنع فلوس منها.
• بس ملحوظة مهمة لازم تأخد بالك منها، احنا مبنقولش إنك هتعمل فلوس وأنت نايم، الموضوع إنك هتشتغل الأول كويس لمرة أو عدة مرات، وبعدين هيدخلك دخل بطريقة دورية، السماء لا تُمطر ذهبًا ولا فضة، أي حد يقولك كلام غير ده يبقى بيضحك عليك.
يلا بينا بقى نتكلم في المُهم، ازاي تكسب فلوس من passive income ده، هقولك في طريقين:
1- إنك يكون عندك رأس مال، وهنقول أمثلة عليه، وطبعًا ده هيريحك كتير جدًا بس لو عندك فلوس من الأول.
2- لو معندكش رأس مال أو فلوس برضو هنقول على أمثلة عنها كثير بس في المقالة الجاية، في المقالة دي هنتكلم عن النوع الأول لو عندك رأس مال.
دلوقتي أنت عندك رأس مال، ممكن يكون فلوس أو عقار، أو سيارة أو خلافه، هاندي أمثلة عن كل نوع فيهم ونبتدي بأن..
• لو عندك فلوس، قرشين شايلهم للزمن أو ورث أو مكسب من تجارة ما، مش مهم من ايه المهم أنها موجودة، في أكثر من طريقة تحقق بيها دخل من الفلوس دي لأنك لو مشغلتهاش وفضلت راكنها قيمتها السوقية بتقل طبعًا وبتخسر على المدى الطويل.
– أشهر طريقة طبعًا ومعروفة لكل الناس تقريبًا إنك بتشيل الفلوس دي في البنك وبتاخد عليها فوائد، هي صحيحة مش فوائد كبيرة ولكن مضمونة وفي نفس الوقت مفهاش مخاطرة تقريبًا.
– إنك تستثمر الفلوس دي، ونصيحة مهمة جدًا، أنت لازم تستثمر الفلوس بتاعتك، يعني لو عندك مثلًا 20 ألف جنية، هتشيل عشر آلاف في البنك تأخذ عليهم فوائد والباقي هتثتسمره في أي شكل ما، زي ايه مثلًا شكل الاستثمار ده؟!..
– إنك تشتري دهب وعملة، وتشتري دهب يعني مش تشتري مصوغات وكده، لا تشتري جنيهات ذهب وسبائك دهب وغيره علشان دي بتبقى مفهاش خسائر للمصنعية وخلافها وبتحافظ على قيمتها الكبيرة وطبعًا العملات نفس الأمر، بس تحط في بالك حاجة مهمة جدًا إن الاستثمارات دي زي الاستثمار في البورصة كده، طويلة الأجل، يعني بتشتري الحاجات ودي مش بتبيعها بعد شهر ولا شهرين ولا حتى سنة، دا اسمه مضاربة وفيها مخاطر كبيرة علشان أنت مبتفهمش فيها، لكن الاستثمار طويل الأجل للحاجات دي يعني تقعد معاك من 3 ل 5 سنين على الأقل عقبال لما تفكر تبيعهم، هنا هيبقى استثمار مضمون وفي دخل كويس جدًا.
– استثمار من نوع تاني، إنك تشتري مشروع يكون موجود على الأرض، يعني ايه، مثلًا حضرتك بتفهم في الأكل مثلًا أو عندك خلفية محترمة عنه، ساعتها بتدور على مطاعم موجودة بالفعل بس بيواجها تعثر بأي شكل من الأشكال، سوء إدارة مثلًا، عدم استغلال للموارد صح أي حاجة متنجحش المشروع قوي، ساعتها حضرتك بتخش تشتري المطعم أو المشروع ده لأنه قائم على الأرض بالفعل بدل ما تبتدي من الصفر أنت وفرت على نفسك تكاليف انشاء ودعاية ضخمة وبحث عن عمالة، أنت هتلاقي كل ده متوفر بالفعل وأنت بتحط التاتش بتاعك وبتنجحه أكثر..
أشهر مثال على الأمور دي لما “مارك زوكربيرج” صاحب شركة الفيس بوك لما اشترى الواتس أب والانستجرام وخلاهم يحققوا أرباح أضخم بكثير من اللي كانوا بيعملوها من قبل، وطبعًا أنت مش فيس بوك علشان تشتري حاجة ضخمة بس ده مثال على اللي تقدر تعمله، يعني مثلًا ممكن تشتري موقع أو مدونة صحفية وشايف إنك ممكن تنجحها أكثر ما هي ناجحة وده مثال اعتقد إنه جديد على ناس كثير مكنتش تعرفه قبل كده.
– ممكن تستثمر في شغل أنت مبتفهمش فيه بس ناجح، مثلًا ساعات كثير بتلاقي ناس عاملة مشروع ناجح جدًا وعايزين يتوسعوا فيه بس معندهمش رأس مال، ساعتك بتخش برأس المال ده بحاجة اسمها a Silent Partner أو معروف بالاسم الدارج بتاعنا الشريك المرفوع، يعني حضرتك مابتدخلش في أي حاجة تخص الشغل غير إنك بتشارك بفلوسك وبتاخد نسبتك من الأرباح، وأنا شايف إن النوع ده من الاستثمار حلو جدًا، بس تنفذ مثل لاتضع البيضة كلها في سلة واحدة، يعني متخشش مع شخص واحد بكل فلوسك، وزعها على أكثر من مشروع علشان لو لقدر الله حاجة فيها محققتش نجاح يبقى الباقي شايلينك وبيحققوا أرباح كويسه ليك.
ازاي تكسب فلوس من الاستثمار البسيط بدون رأس مال
في أشكال كثيرة جدًا للاستثمار في رأس مال عايزه عشرات المقالات مش مقال واحد ولكن هنتكتفي بدول حاليًا علشان نخش على أنواع الاستثمار الثانية.
• الاستثمار في العقارات، حضرتك عندك شقة جميلة مش محتاجها، طبعًا عارفين إن أشهر نوع أنه تقوم بتأجيرها وتحققلك ربح شهري ثابت، لكن اللي متعرفوش إن في نوع تاني للاستثمار ده ويدخلك دخل محترم وبالدولار كمان ومش لازم تبقى مأجر الشقة على طول كمان..
– هتأجر شقتك أو مكانك بس بطريقة احترافية أكثر، إزاي بقى، عن طريق موقع عالمي اسمه Airbnb، ايه بقى الموقع ده وبيفرق ايه عن موضوع الإيجار العادي، هقولك يا سيدي، أنت بتعرض المكان بتاعك ده على الموقع وبتقول على شروطك، مش عايز حد يكون بيشرب سجائر أو كحول مثلًا، مش عايز حد بأطفال وغيره وهكذا، وبتأجر مكانك باليوم أو بالأسبوع أو بالشهر، زي ما تحب وزي العملاء ما تحب، هتجيلك ناس من جميع أنحاء العالم يسكنوا عندك ويدفعولك بالدولار كمان، هتقولي ايه ده هيسكنوا عندي يوم أو أسبوع أو أسبوعين بس وهيدفعولي بالدولار، وده ليه إن شاء الله، هقولك لأن أنت مهما كان سعر ايجار شقتك مش هيبقى قد سعر ليلة أو أسبوع في اوتيل، فهما بيبقو جاين يقعدوا في البلد في مكان كويس ورخيص في نفس الوقت، ومش كده كمان، أنت ممكن تأجر أوض، يعني عندك 3 أوض مثلًا في الشقة، بتأجر الأوضة لأكثر من 3 أشخاص مختلفة وبتاخد فلوس بالدولار وتقدر في أي وقت أنك توقف عرض الشقة في الموقع براحتك وتبقى الشقة عندك فاضية لأي حاجة أنت عايزها، أظن مفيش أحسن من كده استثمار، ده غير أنك هتعمل علاقات مع أجانب ومصرين وعرب من جميع أنحاء العالم، أي خدمة يا سيدي.
• الاستثمار في السيارة، طبعًا أشهر استثمار في الموضوع ده إنك تشغل عربتيك في مشاريع زي أوبر وكريم وغيره، ولو أنت مش فاضي إنك تشتغل عليها بنفسك بتتفق مع حد يشتغل عليها في مقابل مادي معين وباقي الدخل هتتحصل عليه لوحدك.
طبعًا في أنواع كثيرة في الاستثمار لو تحبوا نتكلم فيها باستفاضة شوية، اكتبوا ده في التعليقات تحت ولو عدد كبير طلبها هنعمل مقالات جديدة عن الاستثمار بأنواعه ونتكلم فيه باستفاضة أكثر.
انتظروا المقالة الجاية مهمة جدًا عن ازاي تكسب فلوس وتحقق دخل وأنت معندكش أصلًا رأس مال من البداية.
اقرأ أيضًا:
ازاي تكسب فلوس أكثر بشغل أقل (الجزء الثاني)
