حد فيكم سأل نفسه إزاي هنستعمل الإنترنت المنزلي بتاعنا مستقبلًا؟ يا ترى هنفضل نستعمل الواي فاي Wi-Fi التقليدي، اللي عم حسن صاحب القهوة اللي تحت مننا بيسرقه ويهكره، ويفتحه للقهوة كلها؟
الواقع إن الإجابة دي اتغيرت، واتطورت من قريب، بسبب مجهودات العالم هارالد هاس Harald Haas، أستاذ ورئيس قسم الاتصالات المحمولة في جامعة إدنبره Edinburgh بألمانيا، والـ Co-Founder المؤسس لشركة PureLiFI.
عمل إيه بقى الراجل ده هو وزمايله؟ عمل حاجة مهمة للغاية، حاجة اسمها اللاي فاي Li-Fi، اختصارًا لـ Light Fidelity.
خلوني أكلمكم عنه شوية..
اللاي فاي Li-Fi ده هو عبارة عن طريقة جديدة لتصميم المودم Modem أو الراوتر الخاص بالإنترنت، واللي بيعتمد في الواقع على النبضات الضوئية، مش موجات الراديو زي الواي فاي العادي بتاعنا.
طريقة عمله هي إنه بيتم تركيب لمبات LED بسيطة في البيت أو المكان المطلوب تغطيته بشبكة الإنترنت، وبعدين اللمبات دي بتقفل وتطفي لآلاف المرات في الثانية الواحدة. بتعمل نبضات ضوئية سريعة جدًا على إن العين البشرية العادية تشوفها، فبتبدو بالنسبالنا منورة وثابتة عادي.
النبضات دي بقى في الواقع هي اللي بتنقل المعلومات الرقمية من خط الإنترنت إلى حقل المكان المراد تغطيته. يعني إحنا في الواقع بنستقبل من خلالها النت من خلال موجات ضوئية غير مرئية، مش من خلال موجات الراديو زي الواي فاي العادي اللي احنا نعرفه.
هييجي حد يسألني طب وده فايدته إيه؟ أنا اقولك يا سيدي..
الفايدة أول حاجة إن سرعة الإنترنت اللي هنقدر نستقبله في الحالة هتقدر توصل لسرعة أكبر من السرعات المتاحة للواي فاي العادي بأكتر من ٣٠٠٠ مرة! يعني سرعة النت باللاي فاي Li-Fi تقدر توصل لحد 224 جيجا في الثانية الواحدة! وطبعًا ده هيكون معتمد على سرعة النت اللي عندك ف الأساس.
سرعة خزعبلية لا تستوعب.. وهي السرعة المستقبلية للإنترنت اللي هتكون متواجدة بعد مشروع SpaceX للإنترنت الفضائي اللي بدأ بالفعل؛ لإنه مفيش خط واي فاي ف الدنيا هيقدر يستحملها.
حاجة كمان، اللاي فاي مبيتسرقش ولا بيتهكر، إزاي ؟ لسبب بسيط..
موجات الضوء في الواقع مبتقدرش تعبر الحوائط زي الراديو، بل بتنعكس عنها، عشان كده لما تكون مركب راوتر لاي فاي في البيت أو الشركة بتاعتك، النت هيكون متوصل فقط بداخل جدران الغرفة اللي انت مركب فيها لمبة ال LED بتاعت الراوتر، وكل الأوض اللي مفتوحة عليها فقط، مش هيخرج بره اطار الشقة أو الشركة اللي انت مركبه فيها.
وبالتالي مستحيل يوصل لجارك أو حد ساكن في العمارة اللي جنبك، وبالتأكيد مش هيوصل لصاحب القهوة الحرامي اللي بيسرقك، الإنترنت بتاعك في الحالة دي، وكمان المعلومات الخاصة والشخصية بتاعتك وانتقالها من عليه، هيكون محمي تمامًا، محمي بقوانين الفيزياء نفسها.
التكنولوجيا دي اتعملت واتطبقت فعلا، مش لسه هتتعمل، وهي حاليًا ف مرحلة التطوير، والإنتاج التجاري بدأ فعلًا على استحياء، ده بالإضافة لإن ليها عشرات التطبيقات التانية في علوم الفضاء والملاحة الفضائية، وكمان في تأمين المعلومات، يعني قريب أوي مش هيكون في حاجة اسمها واي فاي خلاص.
أبشروا.. المستقبل جاي، ومعاه بيتحقق اللي محدش كان ممكن يقدر يتخيله من ١٠ سنين فاتوا بس..
وقريب جدًا شكل العالم كله هيتغير تمامًا..
جميل