عمرك فكرت إن هييجي عليك يوم، وتقضي شهر العسل بتاعك أو العطلة الصيفية أو حتى تغير جو ف أجازة آخر الأسبوع Weekend في فندق في الفضاء ؟
الموضوع ما بقاش حلم خلاص، لإن أول فندق حقيقي مصنوع في الفضاء، للسياحة، خلاص بيتعمل دلوقتي خلوني أحكيلكم أكتر ف مقال النهارده..
الفندق هيكون إسمه (محطة فون براون الفضائية Von Braun Space Station)، وهو بيتم تصنيعه حاليًا من شركة The Gateway Foundation.. الفكرة بقى إنه هيستعمل نفس التكنولوجيا اللي بيتم استعمالها حاليًا في محطة الفضاء الدولية International Space Station أو اللي بيسموها اختصارًا ISS.
بس بدل ما هيكونوا بيستعملوه لأغراض بحثية وعلمية، المحطة الفضائية دي هيتم استعمالها كأول فندق سياحي في الفضاء
فندق جواه كافيتريات وسينمات وبارات وكوكتيلات وحاجة آخر عظمة يعني.. ده غير إنه كمان هيتم توليد جاذبية صناعية عليه، بعكس محطة الفضاء الدولية ISS.
هيكون شكله متكون من حلقتين كده بيلفوا حوالين نفسهم، عشان يخلقوا تأثير جاذبية صناعية يخليك تقدر تمشي جواه عادي زي الأرض هنا بالظبط.
يعني مش هيكون في انعدام جاذبية Zero Gravity زي ال ISS.. لأ النزلاء هيقدروا يتعاملوا جوه بشكل طبيعي تمامًا
وده هيخلي الموضوع مريح وسهل أكتر بكتير من ال ISS، وهيخلي الزمن بتاع الرحلات يبقى أطول بكتير، وأمتع.
تخيل بس كده انك واقف بتبص من الشباك، وشايف كوكب الأرض والقمر، و وراهم الشمس من بعيد، ف منظر فضائي بديع، محدش كان ممكن بس يتخيله من ١٠ سنين.. أيه العظمة دي
المحطة الفضائية دي هيكون فيها 24 كبسولة فضائية أو اللي بيسموها Pods.. كل واحدة فيها مجهزة بكافة وسائل المعيشة والراحة والمتعة، زيها زي أكبر أوتيلات هنا على الأرض، ده طبعًا غير المشاريب والبارات.
وكمان الفندق ده متوقع إنه هيكون انتهى وبدأ كمان شغل في سنة 2025.. يعني خلاص كمان 5 سنين.
إبدأوا حوشوا بقى..
