قصيدة “الغولة”
خَبّوا العيال يا ولاد… الليل خلاص أهو هل
خَبّوا العيال منها… و رشوو ملح و خل
خبّوا العيال يا ولاد … من اللي جايه تزور
عايزاك تكون ليها … عايزاك تكون مسحور
خَبّوا العيال يا ولاد … الغوله بتنادي
“أنا جايه علشانكُم، تعالولي يا ولادي”
خَبّوا العيال يا ولاد… عدد اللي مطلوب سبع
إطفو الكهارب بسُرعه… و ولعولها الشمع
خَبّوا العيال يا ولاد … سامعينها داخلالكُم؟
في الأوضه يلا اتداروا… و اقفلوا بابكُم
خبوا العيال يا ولاد … “مش وقتي إني أموت!”
قدرَك يا ولدى ملازمك… على الجبين محطوط
خَبّوا العيال يا ولاد… السبعة ليه ناقصين؟
“مين اللي فتح الباب؟! هي نادت علي مين؟!”
خَبّوا اللي باقي بسُرعه… تحت في البدرون
“السبعة بقوا سته.. و العُمر مش مضمون”
خَبّوا العيال يا ولاد… الستة بقوا خمسه
الخامس إتّاكِل… الموت.. خَدُه خِلسه
خَبّوا العيال يا ولاد… سامعين صوت الرجلين؟
“الخمسة ليه قلّوا… راح نستخبى فين؟!”
خَبّوا العيال يا ولاد … معادش باقي كتير
“الرابع إتاخد!… أخدوه و نزلوا البير!”
خَبّوا العيال التلاته!… خَبّوا العيال الإتنين!
“مفاضلش غيرى يا سِتّى…. أهرب و أروح على فين؟”
إدخُل في حضني قوام…..
م الغوله أنا هخبيك…..
ولو عليك صممت…..؟
أنا هفدي نفسى….. بيك!!
اقرأ أيضاً
