كلنا بنخاف.. مهما كان السبب اللي بنخاف منه بس بنخاف..
بيقولوا إن عشان تغلب خوفك من حاجة لازم تتعرض ليها، طب فكرت تواجه خوفك؟
فكرت لما تغلب خوفك هتحس بإيه وقتها؟
طب فكرت بقا لو خوفك هو اللي غلبك مصيرك هيكون ايه بعدها؟!
أكيد محدش فينا توقع مصيره؛ ارجع بذاكرتك كده للماضي واسأل نفسك، أنت مهما بعدت بخيالك كنت تتوقع إن ده هيكون مصيرك؟
مستغرب كلامي ليه؟ طب عارف أنا كنت زيك كده ومصدقتش اللي قال الكلام ده، كنت فاكر إنه مجنون وبيخرف لحد ما جربت بنفسي.. تحب تجرب؟؟
تعالى معايا.. مش عايز تبطل خوف؟ يبقى لازم تواجه!
الأول لازم نكتشف إيه هي نقطة ضعفك، إيه أكتر حاجة بتخوفك.. في حالتك أنت أكتر حاجة بتخاف عليها أولادك، يا حرام من خوفك عليهم بتحلم بكوابيس وقت نومك، بتشوف دايمًا كابوس واحد متكرر.. وبسبب الكابوس ده مش عارف تعيش حياتك بشكل طبيعي، الخوف هيجننك مبقتش تنام حتى.. كفاية صعبت عليا.
في الأوضة دي هتلاقي منشار تحت الكرسي اللي هناك ده، أيوه بالظبط كده منشار كهربائي زي اللي بتشوفه بالظبط ده حتى كمان نفس اللون شوفت الصدف!
وفي الأوضة اللي جمبك دي موجود ولادك، متخافش أوي كده، هما كويسين.. ده يادوب بس تأثير المخدر..
هي مش الأوضة دي شبه اللي بتشوفها في الكوابيس؟ مش ده بالظبط بداية الكابوس؟
طب مش عايز تواجه خوفك؟ هتفضل خايف لحد امتى!
بدأت تفهمني..
ابدأ بالرقبة عشان ميحسوش بالباقي وميهمكش الدم كده هتتعالج من خوفك بشكل أسرع..
عايز تعرف أنا عرفت التفاصيل دي كلها منين؟! لسه فاكر تسأل! ده بدل ما تشكرني إني عالجتك من خوفك؟ الكابوس خلاص مش هيتكرر تاني مش هتصحى مفزوع وتجري عشان تطمن عليهم.. ده أنت حتى مش هتشوفهم تاني مفيش مجال للخوف خلاص..
بردو زيك زي غيرك مفيش فايدة ناكر للجميل، بس مش هستغرب عادي مش أول مرة أتعامل مع بشري ويعمل كده، بس هطلع أنا أحسن منك وهقولك الحل زي ما عالجتك من خوفك هعالجك من إحساسك بالذنب.. والحل في الدرج التاني عندك في آخر الأوضة..
بس قبل ما تضغط ع الزناد استنى لما أمشي، أنا قلبي طيب مش هستحمل أشوفك بالمنظر ده! كان نفسي أقولك الوداع بس الحقيقة ده مش وداع، دي لسه بداية.. هشوفك تاني قريب بس ساعتها هتكون أنت اللي جيتلي لحد عندي..!
