لغز تشاك مورجان بقلم الكاتب محمد عصمت بتاع الرعب

 الكاتب محمد عصمت بتاع الرعب :

العالم من حوالينا مليان ألغاز مش محلولة، حاجات مُرعبة بتحصل في كُل مكان في العالم، ألغاز بتعرفك إن البشر مخيفين أكتر من أي مخلوقات مُرعبة تانية.

كُل اللي هعمله إني هاخدك من إيدك وهنروح نتفرج على الألغاز دي واحد واحد، بس خد بالك كويس، إحنا ماشيين في وسط حقل ألغاز … يلا بينا

المرة دي هكلمكُم عن تشارلز مورجان، المسؤول بوزارة المالية الأمريكية، الشهير بتشاك

يوم ٢٢ مارس ١٩٧٧ خرج من بيته كالمُعتاد، لكنه إختفى لمُدة ٣ أيام، في النهاية لمّا رجع مكانش قادر يتكلَّم، وفسّر دا لزوجته بإن زوره مدهون بعقار هلوسة قادر علي قتله أو إصابته بجنون تام، مش بس كدا، هو إعترفلها كمان إنه بيتجسس على وزارة المالية الأمريكية

وفضل أسبوع في الحالة دي لحَد ما إتحسِّن تمامًا، لكن بعد إختفائه بشهرين، إختفى مرة تانية!

بعد إختفائه الثاني بتسعة أيام، زوجته جالها مُكالمة غامضة من ست مجهولة بتقولها: ” تشاك بخير، سفر الجامعة ١٢، من ١ إلى ٨ ”

بعد يومين وجدوا جُثة تشاك في الصحراء، مُصاب برصاصة في مؤخرة رأسه، المُشكلة كانت إن سلاح الجريمة هو مُسدسه الخاص

طبقًا للشُرطة فإن وفاة تشاك كانت إنتحار، طب لو هو قدر بطريقة ما يضرب نفسه بالنار في راسه من ورا، ليه لابس سترة واقية من الرصاص تحت هدومه، وليه معلّق في حزامه سكين حاد وجراب مُسدس؟، طالما هو كدا كدا هينتحر؟

بس الألغاز مخلصتش، بعد شوية بحث لقوا عربيته مركونة قُريّب من مكان الحادث، المُشكلة مكانتش في العربية، المُشكلة كانت في الحاجات الغريبة اللي لقوها جوا العربية، لقوا دخيرة، أسلحة، راديو قديم، وسن من أسنانه ملفوف في منديل

بتفتيش الجُثة لقوا ورقة نقدية بقيمة ٢ دولار تشاك كان مخبيها في ملابسه الداخلية، الورقة النقدية كان مكتوب بعض الألقاب الأسبانية مكتوبة بخط سريع ورسم مُفصّل لخريطة المنطقة دي

بعد يومين من العثور علي جُثة تشاك، ست غامضة إتصلت بمكتب المأمور، عرفت نفسها بذات العيون الخضراء، وقالت له إنها نفس الست اللي كلمت زوجة تشاك قبل كدا

قالت إنها قابلت تشاك قبل موته، إتقابلوا في فندق صُغيّر علي جانب الطريق، وهناك وراها شنطة مليانة فلوس، قالها إن فيه حد مأجر قاتل مأجور عشان يقتله، لكنه قدر يوصله ويعرض عليه مبلغ ضخم مقابل حياته

حتى الآن مازال القاتل ودوافعه مجهولين، لكن الشائعات بتقول إن المافيا متورطة في الأمر، وإن تشاك كان جاسوس للمافيا داخل وزارة المالية الأمريكية، وكان بيقوم ببعض الإستخبارات الغير قانونية قبل ما يموت

لغز مقتل تشاك يُعتبَر واحد من أكبر الألغاز غير المحلولة في تاريخ الولايات المُتحدة الأمريكية

ملحوظة: سفر الجامعة ١٢، من ١ إلى ٨

دي آية في الإنجيل

طب بقولك إيه سمعت عن لغز التلاجة قبل كدا؟

ولا أقولك …

خليها الأسبوع الجاي

يمكنكم مشاهدة جميع الألغاز هنا