لغز مقتل كاثي هوبز:
العالم من حوالينا مليان ألغاز مش محلولة، حاجات مُرعبة بتحصل في كُل مكان في العالم، ألغاز بتعرفك إن البشر مخيفين أكتر من أي مخلوقات مُرعبة تانية.
كُل اللي هعمله إني هاخدك من إيدك وهنروح نتفرج على الألغاز دي واحد واحد، بس خد بالك كويس، إحنا ماشيين في وسط حقل ألغاز … يلا بينا.
لغز مقتل “كاثي هوبز”:
طفولة “كاثي هوبز” كانت قاسية، الموضوع بدأ بطلاق والدها ووالدتها وهي صغيَّرة جدًا، لمّا كانت في المرحلة الإعدادية، أعز صديقاتها ماتت بسبب مُشكلة في القلب، من بعدها وهي بتتكلِّم عن مشاعرها، كانت دايمًا بتقول إنها مش هتعيش لحد ما يبقي عندها ١٦ سنة أبدًا.
أهلها حسوا إن الموضوع بيتطوَّر فقرروا ياخدوها وينتقلوا (للاس فيجاس) عشان يساعدوها على تخطي المشاعر السلبية والمخاوف دي، هناك بدأت تكوِّن صداقات كتير جديدة، كان باين إنها بتتأقلم بشكل جيد.
مع إقتراب عيد ميلادها السادس عشر، مخاوفها بدأت ترجع مرة تانية، بدأت تقول إنها هتموت قُريِّب.
يوم عيد ميلادها كانت في أفضل حالة مُمكِنة، قالت لأهلها إنها قدرت تتغلِّب على هواجسها ومخاوفها، بدأت تعيش حياتها بشكل طبيعي جدًا زيها زي أي مُراهقة في سنها، وبدأت تهتم بمُستحضرات التجميل، كانت بتحلم تكون خبيرة تجميل مُحترفة.
يوم ٢٣ يوليو سنة ١٩٨٧، كاثي اختفت تمامًا وبدون ما تسيب أي أثر، الساعة ١١ مساءً قالت إنها رايحة تجيب حاجة من السوبر ماركت القريِّب من البيت، والدتها إعتقدت إنها هتروح مع صديقاتها، لكن في الوقت المتأخر دا مكانش فيه أي حد موجود في الشارع، كاثي راحت لوحدها، والدتها تعبت ودخلت تنام، والصُبح لمّا صحت، إكتشفت إن أوضة بنتها فاضية تمامًا، إتصلت فورًا بالشُرطة، اللي بسُرعة بدأت في عمليات البحث.
واحد من عُمّال السوبر ماركت قال في التحقيقات إنه فعلًا شافها، وإنها إشترت منه كتاب ومشت، وكانت بتتصرَّف بشكل طبيعي، فواتير السوبر ماركت بتقول إن فعلًا حد إشترى رواية الساعة ١١:١٧ مساءً، لكن مفيش أي دليل يقول هي راحت فين بعد كدا، كُل حاجة كانت بتقول إنها اتخطفت، ورغم إن المنطقة دي مأهولة بالسُكَّان لكن محدش شافها أبدًا.
بعد ٩ أيام عالم آثار لقى جُثتها في مكان بعيد جدًا بجوار بحيرة مهجورة أثناء رحلة إستكشافية كان عاملها.
الشُرطة لقوا آثار لعجلات سيارة جنب الجُثة، العربية دخلت المكان، وقفت شوية، ولفت ومشت، جنب الجُثة كان فيه حجرين غرقانين دم، الطب الشرعي أثبت إن الدم دا دمها وإنها ماتت بسبب خبطات قوية على رأسها بجسم ثقيل.
إتضح إن مخاوف وهواجس كاثي كانت حقيقية، ورغم إنها عاشت لحد ما بقى عندها ١٦ سنة، لكنها ماتت بعد كدا بـ ٣ شهور بس.
بعد وفاتها … أهلها لقوا جواب كانت كاتباه ليهم، الجواب كان عليه تاريخ، إتكتب قبل عيد ميلادها بشهر، كانت بتقولهم فيه إنها بتحبهم جدًا وإنهم مش لازم يزعلوا بسبب موتها.
التحقيقات كانت مُستمرة، وبعد وفاتها بـ ٣ شهور تقريبًا، مركز شُرطة (لاس فيجاس) إستقبل مُكالمة من مجهول بيدعي إنه كان شاهد على إختطافها، قال تفاصيل آخر مكان هي ظهرت فيه بدقة شديدة، قال تفاصيل ملابسها بدقة، قال إن تم اختطافها بواسطة شخص أو اتنين في المسافة اللي بين السوبر ماركت والبيت أثناء رجوعها، وإنهم خدوها عند البحيرة وقتلوها!!
كلامه كان منطقي جدًا، قالهم كمان علي رقم عربية الخاطفين، لكنه رفض يقول إسمه أو بياناته، كمان رقم العربية مكانش حقيقي، لحد النهاردة مازال القاتل مجهول و المُتصِل مجهول ولغز مقتل “كاثي هوبز” بدون حل!!
اقرأ أيضًا:
رعب نص الليل ..فيلم آتوك الملعون
