مراجعة مسلسل الأصدقاء

كتبت نسمة عاطف

اذا لم يخبرك احد ان الأمور ستكون بهذا الشكل ؟

عملك ؟ مجرد مزحه ! انت مفلس و حب حياتك انتهي عندما وصلت اليه .

الامر يبدو كأنك دايما في المرتبه الثانيه ! بينما لم يكن هذا يومك …. اسبوعك …. شهرك …. او حتي عامك !

لكنني سأكون هنا من اجلك …. حتي عندما تمطر…

سأكون هنا من اجلك …. مثلما كنت هنا من قبل..

سأكون هنا من اجلك ….. لانك ستكون هنا من اجلي أيضا …

مش هكون ببالغ لو قلت ان جيل التمانينات كله بيعتبر ست كوم فريندس الأصدقاء هو المفضل بالنسبه لهم . نجاح فكره الأصدقاء و تجمعهم انتجت اكتر من ست كوم تاني بيدور حوالين نفس الفكره … سواء ” the 70th “show
او ” how I met your mother”
او ” the big bang theory ”

كل ست كوم منهم ليه فكرته و لحظاته الكوميديه … لكن ليه فريندس مختلف ؟

1- عشان رب صدفه خير من الف ميعاد

اول جزء رايتشل صديقة مونيكا من أيام المدرسه بتقابلها و هي هربانه من فرحها . يمكن البدايه دي بتفجر اكثر من صدفه .
غير تعريفنا بالابطال و خلفية كل شخص فيهم لكننا كمان بنشوف لمحات بتظهر اكتر قدام . زي اد ايه مونيكا معتمده علي نفسها و بتساعد غيرها . زي تشاندلر و سخريته .. جوي و ترحيبه … فيبي و غرابتها … روس و حبه اللي مش قادر ينساه لرايتشل …. ده بجانب رايتشل نفسها و شخصيتها العنيدة القوية الي لا تتناسب مع نشأتها المدللة .

2- الكثير من الانهزامات

من وجه نظري انه علي مدار ال عشر سنين اللي تم تقديم فيهم العمل ده شفنا كمية إخفاقات للابطال ماحدش يتخيلها . تقريبا كلهم اترفدوا من شغلهم ” روس الوحيد اللي اتوقف لما زعق في مديره عشان اكل الساندوتش بتاعه ” . كلهم دون استثناء اتكسر قلوبهم في علاقات كانت سيئه او كانت كويسه بس ما اتكتبلهش تكمل ! مين يقدر ينسي ريتشارد ؟ جانيس ؟ ايميلي ؟ كايت ؟ باولو ؟ دايفيد ؟

3- عشان بشر
بيغلطوا عادي و الاجمل انهم بيغلطوا في حق بعض . بس اللي بيغلط فيهم بيكون عنده الشجاعه للاعتراف بالغلط و بيعمل المستحيل عشان صاحبه يغفر له . مفهوم الصداقة عندهم كان اقوي من بنت جوي و تشاندلر يحبوها في نفس الوقت او علاقة تفشل بين روس و رايتشل !

4- مخاوف حقيقية !

علي اختلاف شخصياتهم كل واحد فيهم كان عنده خوف ممكن تلاقيه مسمع عندك . مونيكا مثلا كانت مصابة بالوسواس القهري و كانت عارفه ان ده حاجة ممكن تأثر علي أي علاقه بالسلب عشان كده كانت بتحاول تخفف وقع الداء ده علي الشخص اللي بتدخل معاه في علاقة . رايتشيل كانت جميلة و مدللة و بتشوف انها مغناطيس للأشخاص الغلط طول الوقت ! روس كان عنده دراما قاسية في حياته من تجربة جوازه الأول مخلياه حاسس طول الوقت ان الست …. أي ست هتدخل معاه في علاقه مش هتكمل ! فيبي كانت جايه من بيئه مضطربه تماما و علي الرغم من غرابتها بتحلم بالاستقرار اللي مش عارفه هيحصل امتي و ازاي … تشاندلر كان خايف من انه يدخل أي تجربه ليترفض لانه مش شايف في نفسه مميزات تخلي اللي قدامه تتمسك بيه و بالتالي كان هو بيسارع بالرفض و يطلع عيوب وهمية … اما جوي فا كانت مشكلته اعمق بكتير لدرجه انه مش شايف ان عنده مشكلة أصلا !

5- صداقات بنات و صداقات ولاد.
علي الرغم من انهم ستة أصدقاء الا ان العمل ادي مساحة عشان يظهر اللحظات الخاصة بين جلسات البنات و جلسات الأولاد و ده مش بس اظهر الاختلاف بشكل يعلي من حده الكوميديا لا ده كمان كان بيحسس كل حد بيتفرج بالراحة و كأنه بيشارك البنات جلسات النميمة و يشارك الأولاد الفرجة علي الماتشات .

و مازالت صورة فيبي و مونيكا و رايتشيل في فساتين الفرح علي كنبة مونيكا ايقونة جروبات البنات !

6- انعطافات حادة

شئت ام ابيت لازم تعترف ان العمل مر بلحظات درامية قوية و انعطافات حادة كانت ممكن تنهي أي علاقة صداقة بين اتنين علي ارض الواقع.
انفصال رايتشيل و روس، تشاندلر و حبه لصاحبه جوي، جوي و علاقته برايتشيل، إحساس فيبي من وقت للتاني انها بره دايره الصداقة، خناقات مونيكا و ريتشيل.
ده بجانب مواقف انت مستحيل تتخيلها زي ان مونيكا و تشاندلر يحبوا بعض، زي ان رايتشيل تحمل أصلا و تجيب بايبي، زي ان روس يقف ليلة فرحه يقول اسم رايتشيل مش اسم ايميلي ! و من ده كتير !

7- تطورات منطقية و أحيانا غير منطقية .
في جملة بتظهر من وقت للتاني علي السوشيال ميديا و هو تساؤل بعنوان …. ماذا يحدث لو اتجوزت صديقك المفضل ؟ ده اللي حصل مع مونيكا و تشاندلر اللي في البداية ماكانش في أي لمحة تناغم أصلا و تحول الموضوع لعلاقة قوية و حب حقيقي . ده حصل مع روس و حب حياته راتشيل اللي بمعجزة ما قدر يخليها تحبه و يخسرها و يخليها تحبه و يخسرها و تخلف منه و في الاخر تستقر في حضنه ! و حتي لو مش صديقك المفضل مين كان يتخيل ان فيبي اللي تلاقي فارس احلامها او الأمير الوسيم زي ما بيقولوا بصدفة غير متوقعة ! لكن الاغرب و الأكثر ألما بالنسبة لي هو ان العمل انتهي و جوي وحيد !

8- عشان تجمع المناسبات
في الوقت اللي تجمعات المناسبات عندنا عائلية بالنسبة للاصدقاء اللي منفصلين عن أهلهم كانوا هم العائله . حفلات الكريسماس و رأس السنه بس المفضل بالنسبة لي كانت حلقات عيد الشكر اللي كل سنة كانت بتبقي مميزة عن اللي قبله .

9- عشان كبرنا معاهم
كل سنة احتفلنا فيها بعيد ميلاد حد فيهم . شفناهم و هم بيسيبوا سهرة و دوشة عشان قعدة مريحة و كتاب او فيلم حلو في التليفزيون . شفناهم و هم بينضجوا مع الوقت و بيقرروا ياخدوا قرارات مصيرية . شفناهم بيكبروا و كبرنا معاهم .

10- عشان كل الاشاعات اللي طلعت عليهم .

واحدة من تفسيرات العمل قالت انه مافيش وجود للاصدقاء أصلا ! ان فيبي المتشردة اللي عايشة في الشارع شافت مجموعة من الأشخاص في كافيه سنترال بيرك و رسمت في خيالها شخصيات و علاقات غريبة و معقدة . الطرح ده ممكن يفسر حاجات كتير عن شخصية فيبي الغريبة اللي في الواقع صعب حد يتقبلها و يصاحبها . بيفسر كمان ليه فرحها اتعمل في الشارع في عز البرد …. ده عشان هي وقتها كانت بتتخيل ده و هي نايمه علي الرصيف بتترعش من البرد !

تفسير تاني اقترح انهم مش أصدقاء لكنهم كلهم نزلاء مصحة نفسية ! مونيكا المصابة بالوسواس القهري اللي بالمناسبة النظرية ده بتفسره كادمان للنظافة و النظام كبديل لادمان الاكل و اللي خلاها ما عندهاش ثقه في نفسها ! روس اللي علاقاته متكررة الفشل خلته ينهار عصبيا ! تشاندلر اللي ظروف طفولته خلته عاجز عن التواصل مع الستات و بالتالي مكتئب و محبط . فيبي اللي ما قدرتش تتخطي حادثة انتحار أمها . رايتشيل اللي اتجوزت دكتور باري و عاشت عيشة تعيسة فارغة مع شخص خاين . جوي اللي فشل انه يبقي ممثل ! كلهم بيتقابلوا في المصحة و بيحققوا احلامهم في الخيال . مونيكا بتلاقي الحب الحقيقي و بيبقي عندها بيت و أولاد و زوج يتقبلها بكل عيوبها . روس بينجح في انه يخلف من حب حياته و هي بتبادله الحب ده و بينتهوا مع بعض . تشاندلر اللي بيلاقي واحدة تحبه بماضيه و سخريته المبالغ فيها . فيبي بتلاقي اميرها الساحر اللي بتعيش معاه حياة سعيدة و مستقرة . رايتشل بتحقق نفسها و بتبقي ناجحة في شغلها و حياتها . و جوي اللي بعد سنين بيتنقل من دور للتاني حتي لو مش نجاح استثنائي بس ده جوي يعني بيرضي بقليله حتي في خياله !

كل النظريات دي مهما كانت كئيبة و محبطة و باعثة للحزن … الا انها بالنسبة لي ماكانتش زي كسرة قلبي لحظة ما شقة مونيكا بتفضي و كلهم بيسيبوا مفاتيحهم و بيمشوا عشان يقعدوا لمرة اخيرة في كافيه سنترال بيرك .