الإنترنت دلوقتي بقى جزء لا يتجزأ من حياتنا اليومية.. احنا بنقعد على الإنترنت دلوقتي أكثر ما بنقعد مع عائلتنا أو حتى مع نفسنا.. لأن الإنترنت يعتبر هو مصدر المعلومات والترفيه الأهم والأعظم على مستوى الكوكب دلوقتي.. ولأن الوقت من ذهب والإنترنت بيأكل وقت كبير مننا، فكان لازم إننا ندور على بعض الأسرار اللي هتوفر علينا الوقت والمجهود أثناء استخدمنا لشبكة المعلومات.
وطبعا اسم شركة جوجل العملاقة أصبح مرادف أو على الأقل موازي لمصطلح الإنترنت.. ماينفعش نقول اسم إنترنت من غير ما نفتكر على طول اليوتيوب ومحرك بحث جوجل.. وعلشان جوجل شركة عملاقة ومتفردة صنعت لينا بعض الأدوات اللي هتسهل علينا تصفحنا في الإنترنت..
فالنها ردة هنتكلم عن مجموعة أدوات واستخدامات من جوجل تعتبر فعلا أسرار ملكية عظيمة هتخلي الإنترنت أسهل وأفضل كثير في تعاملتنا بعد كده. وهحط اسم كل أداة وازاي تشتغل عليها مباشرة من خلال المقال ده فيلا بينا.
لو مقرأتش الجزء الأول والثاني من المقال اللي بنشرح فيه عدد كبير من أدوات جوجل المفيدة تقدر توصلهم من هنا:
Google Input Tools:
وزي ما هو واضح من اسمها هي إضافة عن مدخلات جوجل.. وطبعا زي ما احنا عارفين إن أهم المدخلات للكمبيوتر والإنترنت بشكل عام هو الكيبورد أو لوحة المفاتيح.
والأداة دي بتقوم بتحويل أي جملة بتكتبها على الكيبورد لأكثر من 80 لغة مختلفة.. طريقة استخدام الأداة أسهل ما يمكن بتحملها وبتدخل عليها وبتختار اللغات اللي تحب تشتغل عليها وبيتم تحميل مستلزمات اللغات دي وتقدر تشتغل بعديها على طول.
OneTab:
دي أداة مفيدة جدا للناس اللي زي حالاتي بتفتح على المتصفح أكثر من خمسين نافذة في كل المجالات.. يعني أنا ممكن أبقى فاتح فيديو على اليوتيوب في نافذة وفاتح كورس تعليم لغة على نافذة تانية وفاتح مقالة عن فوائد القرنفل في نافذة تانية.. ده شيء غريب جدا.
ده كلام الناس دائما لما بتشوفني فاتح النوافذ دي وبصراحة عندهم حق أكيد.. بس ده طبع اتعودت عليه من فترة طويلة وكان إيجاد الأداة دي هو الحل السحري لمشكلتي.. لأن الأداة دي بتحتفظ بكل النوافذ اللي فتحتها في نافذة واحده وتقدر توصل لأي نافذة منهم لما بتضغط عليها بكل سهولة وبكده بتوفر في سرعة الرامات وفي سرعة الانترنت وبتحافظ على الباقة الغلبانة بتاعتك بطريقة أكبر .. فعلا أداة مفيدة جدا وارتحت معاها بشكل شخصي.
Google Keep Chrome Extension:
أداة ممتازة جدا للناس اللي بتحب تحتفظ ببيانات ومعلومات لشغلها.. الأداة دي بتعملك حفظ لأي حاجة تحبها وتشاور عليها بالماوس بعد ما تضغط على الأداة.. أي مقالات أو صور أو قوائم.. بيتم حفظها تلقائيا في جوجل كيب ده.. وتقدر توصلها لحاجتك من أي مكان تحبه وكمان تشتغل عليها أوفلاين من غير وجود إنترنت.
وفي بعض الأدوات المفيدة اللي هشرحها شرح سريع كده لأني لم أستخدمها بشكل شخصي ولكن حبيت أنوه عنها للناس يمكن يستخدموها.
Bitly | Unleash the power of the link:
دي أداة سهلة ومفيدة لاختصار الروابط.. يعني لو عندك رابط طويل وكبير تقدر تختصره بشكل بسيط ومريح وتضيفه في مقالك أو صفحتك أو موقعك بطريقة سهلة جدا.
Read Aloud: A Text to Speech Voice Reader:
أداة بتمكن إنك تحول أي نص مكتوب لنص صوتي بعدة أصوات واختيارات على كل المواقع والصفحات اللي تحبها.
Click&Clean:
وزي ما واضح من اسمه هي أداة بتساعدك بتنظيف وتسريع جهازك عن طريق إزالة الكوكيز الموجودة بجهازك والصور المكررة والبيانات اللي ملهاش لازمة.. أكيد أداة مهمة جدا ومفيدة للناس كلها.
وبنهاية المقال أحب أوضح ان دائما جوجل ومع التطور التكنولوجي في التطبيقات والبرمجة بطريقة شبه يومية هتصدر لنا أدوات مفيدة ومريحة جديدة.. علشان كده أنا هسيبلكم اللينك الخاص بسوق جوجل كروم بحيث انكم تدخلوا عليه بطريقه أسبوعية وتطلعوا على أحدث الأدوات الجديدة اللي فعلا هتفيدكم وهتسهل عليكم تصفح الإنترنت كثير.
