الرواية الملعونة الحلقة الثانية القربان

الرواية الملعونة الحلقة الثانية القربان ، صمت وذهول ، رعب يشل العقول ، موقف يهز أقوى القلوب ، تخيل كدة انت قاعد في مكان ما ، سواء عربية ، أوضة ، قهوة ، أي مكان ، وصاحبك قاعد جنبك وفجأة يختفي ، رانيا كانت على وشك الانهيار العصبي ، السواق مكانش مصدق اللي شايفه ، يعني إيه ريهام اختفت ؟ وازاي اختفت ؟ بس مكانش فيه أي حل أو تصرف متاح ممكن يتعمل ، حتى النزول من العربية في موقف زي دة مكانش منتظر ، ليل حالك ، هدوء قاتل ، صحرا ملهاش نهاية ، ذئب أسود ، وبني آدم مختفي بشكل مستحيل ومفاجئ …

بدون كلمة زيادة السواق اتحرك بالعربية اتجاه سيوة ، رانيا مش عارفة تتصرف ازاي ، مخها مشلول ، بتتنفض ومش قادرة تسيطر على نفسها

– الحقني يا عم الشيخ مسعود

– فيه إيه يا بنتي ؟ اتكلمي يا رانيا في إيه ؟ فين ريهام ؟

– ريهام اختفت

– اختفت ؟! يعني إيه اختفت ؟ اتصلتي بيها ؟ كنتوا فين ؟

– اختفت يا عم الشيخ مسعود ، كانت قاعدة جنبي في العربية واختفت

– اهدي يا رانيا علشان افهم ، اهدي واحكيلي اللي حصل بالظبط

طول الطريق ورانيا بتحكي للشيخ مسعود اللي حصل من ساعة ما وصلوا المغارة وقابلوا ” تازيري ” لغاية ما ريهام اختفت ، الراجل حرفياً مكنش مصدق ولا متخيل ، وفي نفس الوقت كان مرعوب من الفكرة الوحيدة اللي جات في دماغه واللي غالباً ملهاش تاني ، وكان سؤاله لنفسه ، اشمعنى ريهام ؟

– انتي فين دلوقتي يا رانيا ؟

– راجعة على سيوة

– توصلي الفندق ومتخرجيش منه لأي سبب ، وأنا بكرة هكون موجود إن شاء الله ، انتي بلغتي الشيخ علي ناجح ؟

– نمرته مش معايا ، ريهام اللي كلمته ، حاجتها جنبي بس تليفونها مقفول بكلمة سر

– طيب خلاص يا رانيا ، أنا هكلمه

– هي ريهام فين يا عمي ؟ ريهام راحت فين ؟

– رانيا ، مش عاوز أي كلام في الموضوع دة مع أي حد أياً كان ، ونبهي على السواق ميجبش سيرة لحد نهائي ، وبكرة يحلها الحلال …

الشيخ مسعود بعد قفل مع رانيا ، اتصل بحد معرفة وطلب منه يوفرله عربية مخصوص تتحرك بيه بعد صلاة الفجر على سيوة ، وراح متصل بالشيخ علي ناجح ، كانت الساعة تقريباً داخلة على عشرة بالليل …

– السلام عليكم يا شيخ مسعود

– وعليكم السلام يا شيخ علي ، ريهام اختفت يا شيخ علي

– يعني إيه اختفت ؟ الدليل كلمني وقاللي إنه طلعهم على الطريق واتحركوا تجاه سيوة ؟

– هي مين الشيخة ” تازيري ” دي يا شيخ علي ؟

– دي العرافة المغربية اللي قولتلك عليها يا شيخ مسعود ؟

– إنت تعرفها كويس ؟

– أيوة طبعاً ، دي ليها اكتر من عشر سنين هنا ، بس بطلت شغل من سنة تقريباً ، بعد ما بنتها ماتت

– بنتها ؟ ماتت ازاي ؟ وكان عمرها أد إيه ؟

– والله يا شيخ مسعود محدش يعرف عنها حاجة ، وناس قليلين جداً اللي شافوها ، ميتعدوش على صوابع الإيد الواحدة ، انت بتفكر في إيه يا شيخ مسعود فهمني ، ويعني إيه البنت اختفت ؟

– لما أجيلك بكرة إن شاء الله

– تآنس وتنور يا شيخ مسعود ، بس قولي دلوقتي علشان اتصرف ، البنت اختفت ازاي وفين ؟

– متتحركش نهائي يا شيخ علي ، ولا حد ياخد خبر ، ملهاش صرفة ، لما أوصل إن شاء الله

– خلاص في انتظارك ، توصل بالسلامة إن شاء الله

الشيخ مسعود خلص المكالمة ، وفضل قاعد مكانه ساكت ، وباصص لللاشيء ، وغالباً كدة ، ومن سياق الكلام ، شكل اللي كان شاكك فيه هو اللي حصل فعلاً لريهام ، بس اللي محيره وفي نفس الوقت مخوفه ، ليه ريهام بالذات ؟

بعد يمكن عشر دقايق من السكون التام …

الشيخ مسعود بص في ساعته وقام دخل الأوضة اللي بيستقبل فيها أصحاب الحاجات من المعلولين والممسوسين …

لما تدخل الأوضة ورا الشيخ مسعود هتحس كدة إنك دخلت مغارة من مغارات العصور الوسطى ، أولاً ملهاش شبابيك هو الباب بس ، اللي هو أصلاً خشب سميك جداً ، ثانياً الإضاءة كلها شمع بس ومفيش حتى وصلة كهربا ، ثالثاً بقى بص كدة على المحتويات ، لوحات كتير متعلقة على الحيطان من الجلد الطبيعي الغير مُعالج ، لما تركز فيها هتلاقي مكتوب على بعضها آيات من القرآن وعلى بعضها التاني كلام سيرياني متعرفش هو معناه إيه بالظبط.

ولوحات تانية عليها علامات ورموز كتير متفهمش إيه دي ، ومعظمها باللون الأبيض وبعضها باللون الأحمر ، هتلاقي بردو مجموعات من الأحجار الكريمة بأحجام متوسطة وصغيرة لما تشوفها تحس إنها مترتبة بشكل معين مش محطوطة كدة وخلاص ، زي الياقوت الأحمر والعقيق ، وحجر الإثمد ، وست كور صغيرين كدة في حجم كرة التنس ، تلاتة منهم عبارة عن حجر الابوسيديان ، والتلاتة التانيين عبارة عن حجر الأوبال ، دة بقى بالإضافة لمجموعات كتير من الكتب العتيقة اللي ورقها اصفر دي وغلافها جلد بني ، ودكتين خشب كبار مفروشين بالكليم محطوطين قصاد بعض في نص المغارة دي وبينهم بس لورا شوية كرسي خشب كبير ليه تصميم غريب ودة اللي بيقعد عليه الشيخ مسعود …

الشيخ مسعود من زمان جداً وهو بيعالج مس الجن ، وبيفك الأعمال السحرية السفلية وأعمال الربط وكل ما يتعلق بالسحر الأسود ، الناس في الجمالية خاصة الكبار واللي من جيله ، بيقولوا إن الجن المؤمن بيساعده وبيحميه خاصة إنه وبسبب قوته في كسر السحر ، بقى ليه أعداء كتير سواء إنس من السحرة أو جن من حراس سحرهم ، لدرجة إن الجن كان بيحاول أو حاول أكتر من مرة يحرق بيته وهو جواه بس الحراس بتوعه حموه ، قصص كتير أوي هتسمعها عن الشيخ مسعود منها اللي هتصدقه ومنها اللي عقلك مش هيستوعبه ، بس متقدرش تكدِّب أي قصة فيهم ، شهود العيان للعلامات الغريبة والمواقف الأغرب كتير ، دة غير إن محدش فينا عارف حدود قدرات الجن إيه …

بعد تلات ساعات تقريباً ، الشيخ مسعود خرج من الأوضة ، وملامحه بتقول إن فيه حاجة مش مبشرة بالخير ، هل عرف مكان ريهام ؟ سبب اختفاءها ؟ كيفية اختفاءها ؟ بس الأكيد إنه عرف معلومة مهمة ، أنا بصراحة قلقت أفضل معاه في الأوضة المرعبة دي ، وأنا أصلاً بخاف من خيالي …

أفضل فين يا صديقي ؟ انت بتهزر ؟ دة أنا لما طلعت وقعدت برة الأوضة كنت سامع صوت ناس بتتكلم جوه ، مع إنه كان لوحده ، فطبعاً مستحيل كنت أفضل موجود في الجو المرعب دة ، بقولك بخاف من خيالي ، وبعدين هي كلها تلات ساعات تقريباً ويصلي الفجر ويتحرك على سيوة وهناك هنعرف الدنيا فيها إيه ، إهدا بقى كدة وتعالى نشرب كوبايتين قهوة وسيجارتين ونسيب الراجل ينام شوية لغاية الفجر ، علشان يومه طويل بكرة …

فجأة ريهام فتحت عينيها ، وبمنتهى الرعب والذهول بدأت تتلفت حواليها علشان تكتشف المكان اللي هي فيه ، أنا فين ؟ جيت هنا إزاي ؟ رانيا فين ؟ أنا نمت ولا حصلي إيه بالظبط ؟ أنا مش فاكرة أي حاجة ؟ الحاجة الوحيدة اللي فاكراها السواد اللي غلف كل حاجة حواليا والرجفة اللي ضربت جسمي وبس ؛ كل التساؤلات دي كانت بتدور في راس ريهام وهي حاسة بالبرد وبتتلفت حواليها ، ضلمة بس هي شايفة ، جدران صخرية سودة على شوية وتقفل عليها بس بعيدة ، مكان ضيق بس واسع ، خيالات سودة بتتحرك في كل حتة حواليها بس مفيش حد ، حاولت تتحرك بس معرفتش وكأنها متربطة بالحبال بس هي مش مربوطة ، بعد كل تفاصيل المشهد المرعب دة ، ريهام صرخت بس مسمعتش صوتها .

وفجأة ، بدأت تظهر وتختفي أودامها خيالات ، لأول وهلة معرفتش تميزها ، ومع تكرار ظهورها ابتدت تلقط بعضها ، ذئب أسود واقف بعيد جداً بس شايفاه بوضوح ، بنت نايمة على ضهرها بس مش نايمة على حاجة ، البنت بتلف حواليها دوامة هوا لونها أحمر ناري ، فجأة ظهر الذئب وبينه وبين ريهام شبرين ، حجمه متضاعف تلات اربع مرات وفاتح بوؤه وهيهجم عليها وصوته هيفرتك ودانها ، خضة رهيبة ، رعب قاتل ، محاولات صراخ فاشلة ، محاولات حركة فاشلة ، سواد مفاجئ غلف المشهد وهدوووء وفقدان وعي ، كلهم في أقل من ثانية …

الشيخ مسعود لما اتحرك من مطروح اتجاه سيوة كان كلم الشيخ علي وبلغه يستناه في الفندق اللي نازله فيه رانيا ، وكلم رانيا علشان لما يوصل تنزل تقابله ، والشيخ علي ياخدهم ويقعدوا مع بعض عنده في البيت بعيد عن أي حد ، وبالفعل الشيخ مسعود وصل سيوة حوالي الساعة تلاتة العصر ، الشيخ علي ورانيا كانوا مستنيينه في الفندق ، واتحركوا كلهم على بيت الشيخ علي

– حمدلله على السلامة يا شيخ مسعود

– الله يسلمك يا شيخ علي ، عاملة إيه يا رانيا يا بنتي ؟

– هموت من الخوف يا عمي ، هتجنن على ريهام ، هي ريهام راحت فين ؟

– اطمني يا بنتي ، ريهام هترجع إن شاء الله ، عاوزك بس دلوقتي تحكيلي تاني وبالتفصيل اللي حصل ، بالوقت والمكان من ساعة ما نزلتوا من العربية لما وصلتوا مكان المغارة ، لغاية ما ريهام اختفت وانتوا راجعين …

لما رانيا خلصت كلام مع الشيخ مسعود ، كانت الساعة عدت أربعة ونص العصر والشمس بدأت توصل لنهاية رحلتها اليومية …

– توكلنا على الله ، ياللا يا شيخ علي ، هنوصل رانيا الفندق ، ونتحرك

– الشمس خلاص بتروح يا شيخ مسعود ، مش هنلحق نوصل في النور

– مش محتاج الشمس في حاجة يا شيخ علي ، الليلة لازم اعرف ريهام مكانها فين ، كلم ” أمناي ” ينتظرنا ، لازم أشوف ” تازيري ” الليلة

التلاتة اتحركوا على الفندق ، رانيا نزلت ، وابتدت رحلة البحث عن ريهام ، الشيخ مسعود قرر إنه يروح يقابل ” تازيري ” لأنه عرف إنها اللي ورا اختفاءها بس مقدرش يوصل للسبب ، عرف كمان مكان ريهام بس بردو مقدرش يحدده بالظبط ، التلات ساعات اللي قعدهم في الأوضة الخاصة في بيته قبل السفر ، قدر يوصل فيهم للمعلومات دي ، بس للأسف كانت معلومات منقوصة ، خلاصتها إن ريهام اتعرضت لسحر أسود من أقوى أنواع السحر ، ووصل كمان لإن أحد الأسباب كان هو ، الأمور في دماغه اتعقدت واتشابكت ودخلت في بعض بشكل مش منطقي ، إيه العلاقة اللي ربطتهم ببعض هو وريهام و” تازيري ” ؟ اللي كان قالقه جداً ، هو ازاي مقدرش يوصل لمعلومات أكتر من كدة ؟ إيه حجم القوة اللي بتحمي مكان ريهام وسبب اختفاءها ؟

– وصلنا يا شيخ مسعود

أيوة ، طول الطريق مفيش ولا كلمة ، الشيخ مسعود كان ساكت وكل اللي فات دة كان بيدور في دماغه ، وكل ما يقربوا من المكان اللي مستنيهم فيه ” أمناي ” كل ما يحس إن الأمور متعقدة جداً وقلقه يزيد …

الساعة كانت في حدود ستة ونص لما قابلوا ” أمناي ” ، اتحركوا في اتجاه مغارة ” تازيري ” لمدة ساعة كمان لغاية ما وصلوا …

بمجرد ما العربية وقفت ، ” أمناي ” شاور على مكان المغارة ، الشيخ مسعود قالهم محدش ينزل تحت أي مسمى ، وفضل دقيقة قاعد في العربية وبعد كدة نزل …

الشيخ مسعود اتحرك على طول لمطلع التل على نور قمر يوم ١٢ عربي ، وبمجرد ما وصل وابتدا يطلع ، سمع صوت ذئب بيعوي عواء عالي جداً ، الصوت كان جاي من فوق التل ، الشيخ مسعود وقف ثانية وكأن العواء كان تحذيري ، لكنه كمل طلوع ، وبمجرد ما وصل لنهاية المطلع ، لقي في استقباله ذئب ” تازيري ” الأسود واقف متحفز مستعد للهجوم ومكشر عن أنيابه بشكل مرعب ، ومن وراه كانت ” تازيري ” ، وكان ظهورها بشكل مفاجئ وبمنتهى الغرابة ، واقفة في الهوا ، بينها وبين الأرض متر تقريباً ، عيونها حمرا ، كفوف إيديها وكأنها حديد مصهور ، وبنبرة صوت عميقة معدنية حادة

– هل أتيت تبحث عن الفتاة أيها العجوز ؟ لن تراها بعد اليوم ، فلقد اقترب اكتمال القمر ، وفُتحت أبواب المذبح ، وحان ليل التضحية ، لما اقترفت يداك

هنا بقى الشيخ مسعود أيقن هو بيتعامل مع مين …

” تازيري ” مكانتش مجرد عرافة بتفك الأعمال ولا حتى ساحرة بتعمل الأعمال …

” تازيري ” كانت من نسل الجن ، ابنة أو زوجة ، أو الاتنين ، ومن الواضح من كلامها إن الشيخ مسعود تعدى بشكل من الأشكال على حد من عالمها ، بس مين وإمتى وازاي ، وكانت إيه النتيجة ، لسة المعلومة مشوشة …

الشيخ مسعود كان ماسك في إيده اليمين حجر الأبوسيديان وفي إيده الشمال حجر الأوبال ، وابتدا يشاور بيهم اتجاه ” تازيري ” ويقول مجموعة من الكلمات السيريانية ، ومجموعة معينة من الآيات القرآنية بالعربي ، وغالباً هو كان بيقول نفس الآيات بالسيريانية ، وهنا بقى ، الذئب ابتدا يترجف جداً ويرجع لورا وهو بيحاول يكلبش في الأرض ، ” تازيري ” بتتنفض وكأنها بتتكتف وعينها تتقلب لفوق ، وفجأة ومن قلب اللاشيء وفي المسافة الفاصلة بين الشيخ مسعود و” تازيري ” ، ابتدى يتكون ضباب كثيف تقيل بطيء ، الأرض وكأن ضربها زلزال عبارة عن نبضات مستمرة أو خطوات معدنية تقيلة ومع كل خطوة رجة أرضية عنيفة ، وفي اللحظة دي وخلال الضباب ظهرت ريهام …

كهف أسود عميق ضارب لقلب الأرض ، نهر من حمم بركانية جاي من آخره بمنتهى البطء وبيطلع منه القمر اللي قرب يظهر بالكامل ، في نص الكهف بنتين نايمين جنب بعض على ضهرهم في الهوا ، وفي خلفيتهم جني بيتحرق ويظهر تاني باستمرار ، البنتين واحدة بتطلع لفوق فبتبعد عن الحمم البركانية ، والتانية بتنزل لتحت فبتقرب من الحمم البركانية …

روح هتتبدل بروح …

روح حية هتفدي روح حية مقابل روح ميتة …

ريهام هتتقدم قربان ليلة اكتمال القمر …

*** انتهت ***

اقرأ ايضاً

الرواية الملعونة الحلقة الأولى