انت حمار يا حمار ؟
فى جلسة سمر ليلية فى أحد الكافيهات المشهورة فى الغابة ..جلس الأسد مع أصدقائه من بعض حيوانات الغابة .. وتبادلوا أطراف الحديث والضحكات ..سحب الأسد نفس عميق من الشيشة ورفع حاجبيه على طريقة المعلم ابراهيم سردينة ..وسأل الجالسين..( السؤال ليكم يا حيوانات ..إنت إتولدت لقيت نفسك تمساح ..نمر ..شمبانزى ..مثلا ..هل كنت تحب تفضل زى مانت ولا كنت تحب تبقى حيوان تانى ؟..خلونى أسمع رأيكم ..نبدأ بمين فيكم ؟ ..ممممم ..نبدأ بالحمار ..
– قولى يا حمار ..لو خيروك تبقي حيوان تانى كنت تختار تبقي ايه ..؟
– ممممم …سؤال عاوز تفكير ..بس عالعموم ..أختار أبقى أسد ..هى دى عاوزة كلام ..
– الأسد : هاهاهاهاها …مش بقولك حمار ..
– الله يسامحك .. .
– يابنى ماقصدش أهينك ..ماتزعلش حقك عليا …انا بضحك بس على ردك.. ليه ماخترتش تبقي حيوان تانى ..قرد مثلا ..سنجاب ..نعامة ..أى حيوان عادى
– لا ياعم ..ابقي أسد ملك الغابة.. ليك هيبة كدة وسطوة ..
– يابنى انا لو خيرونى ابقي حمار زيك كدة هاوافق فورا ..
– ايه ده يعنى ماتبقاش أسد ؟؟ إنت غريب أوى على فكرة …اشمعنى يعنى
– ياحمار افهم ..انت لما تبقي أسد ..أول حاجة هايبقي ليك أعداء كتير ..وهاتبقي مستهدف منهم..كلهم عاوزين يبقوا مكانك ..النمر ..الضبع بكل الخسة والندالة اللى فيه ..الفيل شايف نفسه أقوى ويستحق أنه يبقي ملك الغابة ..التعلب بذكائه ..الذئب ..كلهم لو طالوا يغدروا بيك فى أى لحظة هايعملوا ده ..طول الوقت مهدد وقلقان ونايم عينك مفتوحة ..ده غير إنك ماتعرفش تمشى براحتك فى أى حتة ..مجرد مايسمعوا صوتك بس بيجروا ويهربوا ..كله فاكر إنك جاى عشان تفترسه ..طول الوقت خايفين منك ..حتى اللى بيقرب منك مش بيقولك كلام حقيقي ..مجرد نفاق وخوف ..مافيش حد فيهم بيحبك لشخصك ..مجرد خوف من السلطة
– ياااه ..تصدق مكنتش شايفها كدة ..فعلا اللى مايعرفش يقول عدس ..
– شايف الغابة الكبيرة دى ..وكل الشجر ده ..عارف مستخبي وراه كام صياد ؟؟ كل واحد فيهم مجهز كام سلاح و عاوز يتباهى أنه هو اللى اصطاد الأسد ..كل واحد فيهم عاوز يستعرض ذكاءه وقوته ..عمرك شفت حد اتباهى أنه اصطاد سنجاب ؟؟ ولا حمار لمؤاخذة يعنى ..؟ ..عمرك شوفت جنينة حيوانات حاطين فيها قفص فيه حمير بلدى ؟؟ اكيد لأ ..بس القفص للأسد ..والحرية ليك ..تقدر تمشي فى أى مكان براحتك ..تنهق براحتك ..تنام فى أى وقت وأى مكان يعجبك ..إنما أنا زئيري ده يعمل مشكلة كبيرة ..يصحى اللى مش واخد باله منى ..يقوم عليا الخلق ..انت عايش فى راحة بال ونعمة ..تخيل يا حمار .. لو حد قتل حمار ..هتلاقي الرأى العام اتقلب ومؤسسات حقوق الحيوان وووو.ليلة كبيرة .. ..ولو واحد كبابجى دبح حمير الدنيا بتتقلب ..إنما انا لو اتقتلت الناس هاتفرح ..هايصقفوا للى قتلنى باعتباره قضى على حيوان مفترس ..ده مش بعيد يكرموه على شجاعته باعتباره بطل ..فهمت ؟
– ياه ..صحيح ..الحمدلله انى طلعت حمار …دى نعمة الواحد مكانش حاسس بيها ..ده انا طلعت حمار بجد
– طب الحمدلله انك فهمت ..تختار تبقي ايه بقي ؟؟
– حمار مخطط ..أهو تغيير ..
– هاهاهاها ..مش بقولك حمار …يا أحماااااه ..تعالى غيرلى الولعة هنا …
