في كثير من الأحيان نتسائل عن طبيعة علاقة الشياطين بالبشر، وكيفية استخدامهم للإنسان كأداة للوصول لأهدافهم المجهولة؟!
من الأمثلة المشهورة واللي بتشرح علاقة مشابهة هي حالة “جورج لوكينز”..
عام 1759 في بلدة ياتون شمال سومرست في إنجلترا عاش شاب اسمه “جورج لوكينز”، كان عمره وقتها حوالي 26 سنة وبيمتهن الخياطة، كان شاب متدين بيحضر صلاته في الكنيسة كل يوم حد، وكان عضو فعال في مجتمع البلدة ومشهور بحسن سيرته وطيبته ومساعدته للغير، وكمان كان مشارك في كل الفعاليات الخيرية الممكنة في البلدة.
لكن كل ده اتغير في عيد الميلاد عام 1760 لما قوة مجهولة حملت جسده وهو نايم ورمته علي الأرض علشان يستيقظ وكل شيء جواه اتغير وبقى أكتر من مجرد شاب عادي، بقى حاوية لسبعة شياطين!
في اليوم التالي قيل إن جورج صارح صديق مقرب ليه وقال له إن جسده بقى ملبوس من سبعة شياطين بيقودهم الشيطان الأكبر بنفسه، وطبعًا وقتها محدش خد كلامه بجدية ولكن بمرور الوقت حالته بدأت تزداد سوء.
في البداية لون جلده بدأ يشحب بالتدريج، والدماء بدأت تهرب من عيونه، جسده بدأ يعاني من نوبات حركية غريبة ومرعبة وبتسببله ألم لا يحتمل، وصوته بدأ يختفي ويتكلم بأصوات مختلفة تمامًا بنبرة بشعة ومرعبة وعنيفة.
بمرور السنين حالته بتتحول من السيء للأسوأ، والعديد من الأطباء فحصوه بدون فائدة وبدون تشخيص ممكن لحالته، لغاية لما جراح شخص حالته بمرض Sydenham’s chorea واللي بيحتاج ظهور بعض الأعراض النادرة قبل حدوثه زي Rheumatic fever واللي بدورها بتسبب التهاب مزمن في الحنجرة مما يجعل الحالة ككل نادرة الحدوث، بالإضافة إنه كان واضح كونه تشخيص يائس لحالة جورج المستعصية علي الفهم.
و من هنا تم إيداع جورج مستشفى القديس جورج في لندن، ولكن بقاء جورج في المستشفى مستمرش لوقت طويل لإن من الواضح إنه مكنش مصاب ب Sydenham’s chorea وبالتالي تمت إعادته لمنزله، ومن هنا كان مضى علي حالته حوالي 12 سنة من المعاناة المستمرة.
بعد عودة جورج لمنزله بدأت الأصوات الشيطانية اللي بيصدرها تبقى أوضح، وبدأ يغني ترنيمة مسيحية من 200 كلمة باللاتينية معروفة باسم The Te Deum، مع العلم إن جورج متعلمش اللاتينية في أي مرحلة من حياته.
عام 1778 بعد حوالي 18 سنة من بداية حالة جورج، امرأة باسم “سارا باربر” وصلت لبلدة ياتون شمال سومرست وهناك قررت تقابل الرجل المجنون المشهور في القرية باسم جورج لوكينز..
وخلال مقابلتهم ووسط غنائه المستمر للترنيمة المعكوسة قدر جورج يوضح لسارا حالته، وقال إنه خلال ال18 سنة اللي مروا جسده كان حاوية لسبعة شياطين بيقودهم الشيطان الأكبر بنفسه، وأضاف كمان إن الوسيلة الوحيدة لتحريره هي عن طريق تنفيذ عملية طرد أرواح بواسطة سبعة قساوسة.
لكن مع ذلك بشكل غريب جورج حذر سارا من القيام بالعملية وتحريره من قبضة الشياطين، وده بيرجع لكون حالة جورج مختلفة نسبيًا عن أي حالة مشابهة.
حالة جورج كانت بتسمي DAEMONIAC وفي حالة مشابهة شخصية الضحية بيتم تدميرها، وكل فعل وكلمة وفكرة بتصدر من الضحية بتبقى صادرة مباشرة من الروح الشريرة اللي بتسكن جسده، حيث إن جسد الضحية بيمثل معبر للشياطين من الجحيم لعالم البشر.
ومن هنا نقدر نفهم حرص جورج علي عدم طرد الشياطين من جسده لإنها هتتحرر بالفعل لعالم البشر.
بالنسبة لسارا فهي تواصلت مع القس جوزيف إيستر بروك، واللي قدر يجمع ست قساوسة، ويقوموا بعملية طرد أرواح لجورج في كنيسة بريستول يوم الجمعة 13 يونيو عام 1778، وعلي حسب شهادتهم في بداية عملية الطرد تكلم صوت مخيف ومرعب من فم جورج وحذرهم إن جورج هيعاني آلام تفوق كل معاناته خلال السنين اللي مرت..
ولكن القساوسة استمروا في عملية الطرد.. وآخر شيء معروف عن جورج إن عملية الطرد نجحت وشكر القساوسة ورجع لحياته الطبيعية بكل بساطة واختفت كل معلومة عنه بعد العلاج..
ودا اللي يخليك تتسائل عن مصير الشياطين الحقيقي بعد خروجهم من جسده؟!
