حرائق أستراليا بقلم: محمود علام

لو أنت لسه مش عارف إيه اللي بيحصل ف استراليا، خليني أقولك الكارثة بلغ حجمها ايه

أولًا، وقبل أي حاجة، لازم تعرف إن حرائق الغابات هي ظاهرة طبيعية ومش غريبة، وإن ليها موسم كل سنة في أستراليا، وفي الدول اللي فيها غابات كتير ودرجات حرارتها عالية أو متقلبة.. لكن اللي بيحصل الموسم ده في أستراليا أسوأ من اللي أي حد كان ممكن يتخيله، لدرجة إن الحكومة الاسترالية فقدت السيطرة تمامًا على الحرائق، وبدأ الجيش يتدخل..

الموضوع بدأ مع بداية موسم الحرائق في نهاية يوليو الماضي.. وكانت الحرائق لحد وقتها طبيعية، ومش كبيرة أوي.. يعني مثلًا من مسبباتها ظاهرة طبيعية إسمها البرق الجاف Dry Lightening، اللي كان سبب حريق في ولاية فيكتوريا الأسترالية في أواخر ديسمبر، وبسبب قوة الرياح، الحريق ده انتشر لمسافة عشرين كيلومتر في خمس ساعات بس!!

أحيانًا الطبيعة بتكون مرعبة أكتر من الخيال.. وكمان البشر نفسهم مش بريئين من الكوارث دي، لإن كتير أوي من المجرمين في أستراليا بيتمسكوا ويتسجنوا بسبب تخصصهم في بدء حرائق الغابات.. الكائن البشري كالعادة بيثبت دايمًا غباءه، وإنه غير جدير بلقب أذكى كائن على الكوكب..

لكن المهم إنه مع بداية موسم الحرائق الكبرى دي، فضل الموضوع مستمر لفترة طويلة، لحد ما مع نهاية السنة كان الحرائق دي قد أتت بالفعل على مساحة تزيد عن ٦ ملايين هيكتار Hectar، أو ٦٠ ألف كيلومتر مربع ودمرت أكتر من ٢٠٠٠ منزل وحي سكني، وجعلت التلوث الهوائي في المدن الأسترالية هو الأسوء في العالم بأكمله، بكل اللي فيه من تلوث وعوادم ومصانع..

عشان بس تتخيل حجم المساحة اللي بنتكلم عنها، يكفي إن أقولك ان حجم المساحة دي أكبر من حجم دولة هولندا بأكملها!!

بلاش دي.. فاكر حرائق الأمازون السنة اللي فاتت؟.. الأمازون اتحرق فيها ٩٠٠ ألف هكتار.. قارن ده بال ٦ مليون هكتار بتوع استراليا وهتفهم الفرق.. الموضوع مش هزار، وبجد جدًا.

الحرائق دي منتشرة في ولايات عديدة من أستراليا، بس أكتر ولاية اتأثرت بيها هي فيكتوريا Victoria ونيو ساوث ويلز New South Wales اللي لوحدها اتدمر فيها أكتر من ١٣٠٠ منزل.. ده غير مقتل ٢٤ بني آدم تقريبًا.. حجم الحريق اللي في نيو ساوث ويلز يقارب نصف مساحة دولة بريطانيا بأكملها.

كمان في مدن كبرى زي ميلبورن Melbourne و عاصمة نيو ساوث ويلز “سيدني” اتضررت بشكل كبير جدًا في الحرائق، وأصبح تلوث الهواء فيها غير مسبوق.. ده غير وصول درجات الحرارة لأكتر من ٤٨ درجة مئوية، وسرعة الرياح ل ٨٠ كيلومتر.. لو مش فاهمين ده يعني إيه، يكفي إني أقولكم إن الظروف دي مشابهة لظروف المناخ بعد إنفجار القنابل النووية، وإنفجار البراكين.

كمان خطوط التليفون وشبكات الإنترنت شبه اتقطعت تمامًا في بعض المناطق، والناس هناك بيعانوا عشان مجرد يعملوا مكالمة تليفون.. ده غير الضلمة اللي احتلت مكان النهار بسبب الدخان، وتحول السماء للون الأحمر..

هل ده كل شيء؟.. لأ طبعًا.. خد التقيلة بقى.. أستراليا هي موطن للعديد من الحيوانات الجميلة، وهي تعتبر واحدة من أكثر دول العالم تنوعًا واكتظاظًا بالثروة الحيوانية.. ده طبيعي لإنها دولة بتحتل مساحة قارة كاملة.. اللي مش طبيعي بقى إن نقلًا عن مصادر في دراسة عملها خبراء بيئة Environmental Specialists في جامعة سيدني الأسترالية، فإن ما يقرب من نصف مليار حيوان مات وسط الحرائق دي!!

أيوه.. أنت قريت صح.. نصف مليار حيوان.. يعني ٥٠٠ مليون.. وكمان في دراسات بتؤكد إن أكثر من ثلث الثروة الطبيعية والتعداد بتاع حيوان الكوالا، اللي موطنه الأصلي والوحيد تقريبًا حسب علمي هو أستراليا، ماتوا حرقًا.. انت متخيل إن جنس حي كامل يفني تلت تعداد سكانه مع الحرائق؟.. دي لو قيسناها على البشر، هيبقى محصلة الموتى أكبر من تعداد القتلى في الحرب العالمية الأولى والتانية، وكمان حصيلة قتلى الطاعون في القرون الوسطى، مجتمعين!! هسيب ده لخيالك عشان تستوعبه..

يكفي إني أقولك إن إعادة أعمار المناطق اللي اتدمرت دي، والثروة الحيوانية والأشجار، هتاخد مدة أكتر من ٤٠ سنة على الأقل.. وده كلام خبراء البيئة الأسترالية مش أنا..

في بعض الحرائق حجمها وطولها أكبر من ٧٠ متر!! الطول ده أكبر من طول دار الأوبرا اللي ف سيدني.. شوف الصور وأحكم بنفسك، وشوف صور درجات الحرارة اللي وصلت لأرقام قياسية كسرتها أستراليا، وموصلتلهاش في أي مرة تانية من تاريخها كله 👇 ده غير إن الحرائق بلغ من عظم حجمها وقوتها وانتشارها إنها مرئية من الفضاء.

خلي بالك بالمناسبة إن الصورة المنتشرة للحرايق من الفضاء واللي بيتقال انها من محطة الفضاء الدولية دي مش حقيقية، ومجرد صور 3D بالجرافيك مصممة لتوضيح شكل قارة استراليا بالحرائق، وتم فيها استعمال بيانات حقيقية من ناسا.. ده بس للعلم بالشيء يعني.

طبعًا، السلطات الأسترالية بقالها فترة طويلة جدًا بتحاول تحارب الحرائق دي لوحدها، لكن الموضوع خرج رسميًا عن سيطرتهم منذ أيام، مع بداية 2020 اللي شكلها كده هتبقى سنة جميلة يعني 😅 وبدأوا في استدعاء قوات الدفاع الأسترالية عشان تساعد في إخماد الحرائق.. ناس كتير جدًا اتشردت وأصبحوا لاجئين، وبيتم إيوائهم مؤقتًا في عدد من القواعد العسكرية الأسترالية في جميع أنحاء البلاد.. ده غير إن دول العالم الكبرى بدأت بالفعل بالتدخل، زي كندا والولايات المتحدة الأمريكية وبريطانيا، وبدأوا يبعتوا مساعدات عسكرية لإخماد الحرائق اللي رواد الفضاء على محطة الفضاء الدولية ISS بيصحوا ويناموا على شكلها 😅

طيب، إيه سبب كل ده بقى؟.. في ناس كتير بتقول طائر الحدأة اللي بيرمي الأخشاب المشتعلة عشان يصطاد ومش عارف إيه.. هل ده حقيقي؟

خلوني أقولكم إن ده واحد من أسباب انتشار الحرائق بصورة أسرع آه.. بس هو مش مؤثر للدرجة دي.. لإن حجم الطائر ده نفسه وقدرته بتخليه غير قادر على افتعال حرائق كبرى.. كبيره أوي حرائق صغيرة متفرقة.. لكن السبب الحقيقي هنا هو التغير المناخي المخيف اللي كوكبنا بيشهده في السنين الماضية، واللي لسه هيشهده بصورة أكبر وأكثر رعبًا في السنين المقبلة..

كتير أوي حذرنا من التغير المناخي، وعدم المسئولية في التعاملات الصناعية للدول، ومحدش بيسمع.. وده سبب رئيسي للي إحنا وصلنا ليه.. وكمان السبب الرئيسي للحرائق دي، هو بسبب الجفاف اللي بتتعرضله دولة استراليا بقالها فترة.. حد هييجي يسألني ويقولي الجفاف ده من إيه، هقولك بص يا سيدي..

في ظاهرة مناخية حصلت بسبب التغير المناخي، وهي إن المحيط نفسه بيمر بحاجة إسمها الpositive Indian Ocean Dipole..

دي ظاهرة بتحصل في المحيط وبتخلي الأجزاء الغربية منه درجة حرارتها أعلى بكتير من درحة حرارة الأجزاء الشرقية من المحيط.. وللأسف بسبب التغير المناخي اللي الكوكب بيتعرضله، الفرق في درجات الحرارة ده هو الأكبر والأسوأ منذ ٦٠ سنة كاملة! وده سبِّب أمطار وفيضانات أكثر من المتوقع في قارة أفريقيا وخصوصًا أجزاءها الشرقية، وسبِّب جفاف كبير وقاحل في جنوب شرق أسيا وأستراليا..

وبسبب الجفاف ده، بتحصل ظاهرة تانية بتخلي الجو نفسه جاف، فبالتالي الحرائق بتتكون بسهولة أكبر بكتير.. ومجرد ما الحريق بيحصل في جو زي ده، بيبدأ يتكاثر ويولد نفسه، ويخلق لنفسه مناخ كامل.. الحريق يطلع دخان كثيف، وبعدين يتحول لسحب، السحب دي تتداخل مع الجو الطبيعي ف تسبب البرق، البرق يضرب الشجر ويولد حرايق تاني 😅 يعني الموضوع مستمر ومش هيقف إلا بمعجزة.. المطر نفسه اللي بيحصل بسبب ظروف إستثنائية بيخلي الموضوع أسوأ، لإنه بيتسبب في إن بعض الأجزاء من الجو بتبرد، وجنبها أجزاء تانية ساخنة.. ف الهوا بيهرب من السخونية للبرد، وبيكون رياح سريعة جدًا أشبه بالأعاصير.. وده بيتسبب في سرعة انتشار الحرائق أكتر 🔥🔥

وحسب كلام ال BBC نقلًا عن مصادر جوه وكالة الأرصاد الجوية الأسترالية، وخبراء المناخ العالميين، الظاهرة دي مستمرة ومش هتنتهي في أي وقت قريب..