خدمة ما بعد البيع

خدمة ما بعد البيع

معظم العلاقات الإنسانية فى مصر ماشية بنفس مبدأ البيع والشراء ..(إخطف وإجرى ) ..فى البداية بتعتمد على الكلام المزوق واسم البراند اللى بنسوق له عن طريق الاعلانات الجذابة ..والسيلزمان الشيك ابو كلام ناعم اللى يعملك البحر طحينة ويستخدم كلمات من عينة حضرتك ويافندم واؤمر ..إلى أن تنتهى عملية البيع واستلام الفلوس ..ومن هنا تبدأ المرحلة التانية ..مرحلة الفرز مابين براند محترم له اسمه وتاريخه .. وبراند ماشي بمبدأ..(مامتك فى العشة ولا طارت) ..فى المرحلة دى هاتلاقى اغلب اللى بتتعامل معاهم بيلتف على القوانين يدوخك معاه السبع دوخات ..ويبان وشه القبيح اللى كان مستخبي فى مرحلة ماقبل البيع ..وتتبدل كلماته من (حضرتك ويافندم)..ل( اضرب دماغك فى الحيط واعلى ما فى خيلك اركبه).. والجملة المشتركة دايما اللى بيبرربيها دناءته وخسته ( سوء إستخدام يافندم ..مقدرش أعملك حاجة .أسف ..) ..تحاول تقنعه إنه ( عيب تصنيع ) ..لكن لا حياة لمن تنادى ..هو ده وجهه الحقيقي اللى ما كنتش شايفه فى مرحلة البيع ..
قيس على نفس المبدأ فترة الخطوبة أو مرحلة ماقبل البيع ..قصدى ما قبل الزواج ..كل طرف بيحاول يتجمل ويظهر بمظهر إعلانى تسويقى قصاد الطرف الأخر ..وبيحاول يروج سلعته للتانى ..لكن الوجه الحقيقي لسه ماظهرش ..يبان مع أول منعطف فى الزواج ..ممكن الاتنين يطلعوا منتج أصلى ويحلوا مشكلة عيوب التصنيع وتستمر الحياة بشياكة ..وممكن طرف منهم يطلع مليان عيوب تصنيع ورافض الإعتراف بالعيب ده ..وممكن الطرفين نفسهم.. واحد منهم عنده عيوب تصنيع فى المنتج بتاعه.. والتانى أساء الاستخدام للمنتج .. والاتنين نصابين وهايقضوا حياتهم شكاوى ..
وعلى نفس المبدأ ..(الانترفيوهات) فى الشركات بتبقى فى منتهى الشياكة ..وكل طرف بيبقى لابس اشيك وش عنده ..الشركة بتحاول تقنعك إنك داخل أفضل مكان فى العالم ..والموظف بيحاول يقنع الشركة إنها مش هاتلاقى موظف لقطة زيه ..إلى أن يظهر الكل على طبيعته فى أول منعطف ..ويبان خدمة مابعد البيع ..ومين فيهم اللى مخبي وش على التانى …
البراند الأصلى هو اللى بيحترم الأصول ..وبيطبق سياسة الاستبدال أو الاسترجاع بشياكة واحترام ..بطريقة عادلة ..ويجبرك انك تتعامل معاه تانى لأنه محترم ..حتى لو مش هاتشترى من عنده تانى..
قبل ما تشترى ..إسأل على خدمة ما بعد البيع ..