في منطقة كدة شبه فارغة ومريبة اسمها Manchac Swamp أو مستنقع مانشيك- لويزيانا، كان فيه سيدة عايشة مكروهة من الجميع؛ لإن تسليتها المفضلة كانت التنبؤ بموت جيرانها، وممارسة السحر.
“جوليا براون” ساحرة فودو مستنقع مانشيك، السيدة اللي أهل المنطقة أطلقوا عليها اسم العرافة، لإن أي كارثة كانت بتحصل جوليا كانت بتبقى عارفة إنها هتحصل قبلها بفترة.
في عام 1915 تنبئت بإن موتها هيكون مصحوب بموت البلد بالكامل، أو زي ما قالت:
“One day I’m gonna die, and I’m gonna take all of you with me.”
بعدها بأيام ساحرة المستنقع ماتت وأثناء دفنها ضرب إعصار ضخم المنطقة المحيطة بالمستنقع بالكامل! عدد الموتى كان ضخم، الإعصار دمر ثلاث قرى كاملة، ومئات راحوا ضحاياه لدرجة إن الجثث جذبت التماسيح عشان تحتل المنطقة.
ومن عام 1915 حتى عام 2019 أصبح المكان مقر للتماسيح دي. حتى الآن بتظهر جثث جديدة كل فترة طافية على وجه الماء بعد ما كانت مفقودة ومحفوظة في باطن المستنقع.. وحتى الآن رحلات الزيارة للمكان بتسجل أصوات بشرية غريبة هناك، رغم إن المكان مهجور تمامًا.
الرحلات السياحية اللي بتروح المكان ده بتروح مخصوص لإن بيتم تسجيل صوت الساحرة واضح تمامًا وهي بتغني، أو وهي بتصرخ فجأة من تحت أرض المستنقع.
ويقال إن بعض الباحثين في علوم ما وراء الطبيعة تمكنوا من تسجيل صوتها وهي بتتنبأ بأحداث جديدة، لكن بيكون في الأغلب كلامها غريب ومش كامل.
الموضوع ده مش موثوق فيه أوي أو مش موجود له وثائق، لكن الأصوات موجودة وأحد معالم المكان المشهورة.
