عروسة البحر (الجزء الأول)

– احنا كدة خلصنا الجزء النظري ، لو فيه حاجة مش واضحة قبل ما ندخل على العملي ، قوليلي أعيدها تاني

– لا تمام كدة ، كله واضح جداً

– طيب ممتاز ، نأكد آخر مرة ، زي ما قولنا في الأول ، العملي عبارة عن ست غطسات في البحر المفتوح ، هننفذ فيهم المهارات اللي اتعلمناها نظري بس بشكل عملي ، بدايةً من تجهيز العدة ، وبعد كدة المهارات الأساسية في المية ، ولغاية ما نوصل لعمق ١٨ متر ان شاء الله

– أنا جاهزة ومتحمسة جدا

– الحماس مطلوب طبعاً ، وحاجة جميلة ، ولكن أنا بأكد عليكي تاني وتالت وعاشر ، حماس بدون تهور ، التهور في الغطس يعني حياة بتتعرض للخطر ، ودة مرفوض تماماً ، الالتزام التام بالتعليمات هو أساس أمان ونجاح الغطسة ، هتقومي دلوقتي تغيري هدومك ، وتلبسي بدلتك ، على المايوه طبعاً ، انتي مقاسك Medium ، هتلاقي جوة بدلتين جاهزين واحدة شورت ونص كم والتانية بدلة كاملة ، اللي تريحك فيهم البسيها ، وانا افضل الشورت ، درجة حرارة المية النهاردة ٢٤

– لا أنا هلبس الكاملة ، مش بحب شكل البدلة النص دي

– مفيش مشكلة اللي يريحك ، خلصي ونتقابل برة علشان نبتدي …

ازيك يا صديقي العزيز ، متقابلناش من بعد الأتيليه ، أتيليه إيه ؟! الأتيليه يا عم ، آخر قصة قصيرة كتبتها ، انت نسيت ولا إيه ؟ أوووو دة إنت مقريتهاش أصلا ، طيب ابقى اقراها بقى ينوبك ثواب ، هتعجبك والله ، دلوقتي بقى تعالى بينا نشوف إيه حكاية عروسة البحر دي …

– تاني يا چَيدا ؟ غطس إيه بس يا بنتي اللي عاوزه تتعلميه دة

– في رغبة قوية أوي جوايا يا هالة ، أنا بحلم إني بغطس يمكن كل ليلة

– أنا مبقيتش عارفة أقولك إيه بصراحة مع اصرارك الغريب دة ، إنتي حرة ، بس أنا خايفة عليكي

– من إيه يا بنتي بس ، هو أنا هروح أغطس في المحيط ، وبعدين هو مش حوار غريب يعني ، دي حاجة عادية جداً ، وبنات كتير جداً بيعملوها

– أنا مقولتش أنها حاجة غريبة على فكرة ، بس إنتي عارفة إني بخاف من البحر ، بحبه آه لكن منزلوش ، فيمكن هو دة سبب خوفي عليكي

– يا حبيبتي أنا عارفة والله ، متخافيش عليا ، أنا سألت هنا في نادي الأسطول ، بس حد نصحني وقاللي اتعلمي الأول في البحر الأحمر ، هناك متخصصين اكتر لأن دي حياتهم ، وكمان البحر الأحمر ساحر ومفيش زييه ، وبعد كدة ابقي اغطسي هنا براحتك ، فأنا بقى دورت ودعبست لغاية ما وصلت ، أنا هاخد الكورس في دهب بعد الامتحانات

– دهب ! دة إنتي أخدتي قرار أصلاً

– ياس …

چَيدا سليمان ، الفرقة التانية كلية الصيدلة جامعة اسكندرية ، بص مش هوصفهالك ، انت عارف إن وصفي دقيق أوي وأنا مش عاوزك تزهق ، بس ممكن اقولك في عجالة ، إنها حاجة كدة في منتهى اللطافة والرقة ، وطلتها من النوع اللي بيخطف أول ما عينك توقع عليه ، عيونها بتتكلم ، عارفه ؟

چَيدا هي البنت الوحيدة لأبوها الدكتور السيد سليمان الحوت ، استشاري طب الأعماق ، وأمها الدكتورة فادية بدر ، استشاري أمراض الدم

چيدا اتولدت واتربت في بحري ، في بيت جدتها على البحر مباشرةً ، وعاشت ومازالت في ميامي مع أبوها وأمها ، وحالياً هي ساكنة – أو بمعنى أدق – هم ساكنين في شقة في الدور العاشر في برج من أبراج شارع إسكندر إبراهيم قريب من السنترال

لما تدخل أوضتها ومن أول نظرة ، هتحس إنك دخلت كوخ موجود على شط من شواطئ أمريكا اللاتينية ، وصاحبه اللي عايش فيه إما صياد أو قرصان ، أو كابينة مبيت القبطان في سفينة بحرية أو غواصة …

السرير فيرفورجيه من الطراز القوطي ، ليه أربع أعمدة بدون سقف اللي هم بيتحط عليهم ناموسية ، بس چيدا حاطة عليه شبكة صيد ، أيوة زي ما قريت كدة ، شبكة حقيقية لصيد السمك ، على يمين السرير دولاب من الخشب الزان ، متصمم بنفس طراز باب قلعة قايتباي ، وعلى شمال السرير التسريحة ، نفس طراز الدولاب ، والمراية بتاعتها دائرية على شكل عجلة قيادة السفن ، في الحيطة المواجهة للسرير مكتبها ، شكله مميز أوي وكأنه مكتب قبطان سفينة حربية ، والحيطة متعلق عليها بعناية وترتيب مجموعة من مجسمات مراسي المراكب بمقاسات مختلفة (الهلب) وأطواق النجاة ، حوالين خريطة بحرية للمحيط الهادي ، أما باب الأوضة بقى ، فحرفياً وكأنه باب جوه سفينة أو غواصة بشباكها المدور المميز ، شباك الأوضة في نفس الحيطة اللي فيها الدولاب وبالتالي هو في وش الباب اللي في نفس الحيطة اللي فيها التسريحة ، آخر حاجة بقى وتبقى شايف الأوضة أودامك كأنك جواها هي ألوانها اللي اتعقد إنك توقعتها ، بالظبط الحيطان باللون الأزرق لون مية البحر ، بس اللي مش هتتوقعه هو لون السقف !!!

السقف لونه إسود منقط بلون فضي فسفوري وفوق المكتب دايرة متوسطة بنفس لون النجوم ، لما تطفي النور وتضلم الأوضة ، انت حرفياً باصص للسما بالليل بنجومها وقمرها …

چَيدا شخصية أنا بعتبرها مثيرة للجدل ، ومقصدش عموماً ، لأنها في العموم شخصية متزنة وعادية جداً ، لكن … المثير للجدل بالنسبالي هو علاقتها الغريبة بالبحر ، مفيش يوم بيعدي في حياة چَيدا الا ولازم تروح تقعد على البحر مش اقل من ساعة ، مهما كانت الظروف ، ومهما كان الوقت ، لما تشوفها وهي قاعدة باصة للبحر مش بتتحرك ومركزة فيه ، تحس إنها مندوهة ، شاردة ، متسيطر عليها بقوى خفية ، تحس كدة إن فيه حد بيكلمها أو هي بتكلم حد ، شكلها وملامحها بيبقوا مختلفين تماماً عن طبيعتها …

علاقة چَيدا بالبحر ابتدت يوم ولادتها حرفياً ، والدها نزلها البحر وعمرها يوم ، اتعلمت السباحة بشكل كامل قبل ما تتم تلات سنين ، في عمر خمس سنين كانت بتعوم أربع أنواع من السباحة ، وفي عمر سبع سنين اتوجت بطلة الجمهورية في مرحلتها السنية ، وقبل ما تدخل الجامعة كانت متوجة بطلة العرب وبطلة البحر الأبيض المتوسط أكتر من مرة ، مشوار بطولة مُشرِّف بيأهلها حالياً للأولمبياد ، أكيد في زيها كتير ، أنا شخصياً بعشق البحر الأحمر وبياخدني لما بغطس في أعماقه وبشتاقله وبروحله ، الا إنها متفردة في شكل ارتباطها بالبحر ، اللي اعتقد إنه روحاني ، مش مجرد حب !

• في إيه يا عم إنت ؟ شايفك مش مظبوط بقالك يومين كدة ، مالك ؟
• في حاجة غريبة كدة يا حسام ومش عارف استوعبها
• حاجة إيه يا كريم ، خير ؟
• لا مش هينفع أحكيلك عليها ، لازم تشوفها بعينك ، على الأقل علشان أتأكد إني مش موهوم أو بيتهيألي
• في إيه يا كريم ، إيه الكلام الغريب دة ؟
• بقولك إيه ، في بنت عندي open water عاوزك تنزل معانا بكرة آخر غطستين ، وقتك يسمح ولا أجلها لبعد بكرة ؟
• لا متأجلش ، هنزل معاك بس فهمني على الأقل فيه إيه
• بكرة تشوف بعينك ، بص ، هننزل اول غطسة في أم سِيِد والتانية في الآيلاند
• إيه دة ليه كدة ؟ السايتين دول صعبين على open water يا كريم
• عارف يا حسام طبعاً ، بس أنا قاصد كدة
• أوكى ، اللي تشوفه ، طيب هتبقى محتاج مني حاجة معينة ؟
• لا ، هتصور الغطستين بس وأداء البنت ، وطبعاً هتخليك ورانا دايماً

بعد ما چَيدا خلصت امتحانات آخر السنة ، وتحديداً في صيف ٢٠٢١ سافرت دهب علشان تاخد كورس الغطس ، ووالدها بما إنه طبيب أعماق فعلاقاته واسعة في مجال الغطس ومراكزه وغرفته وأطباء الأعماق على مستوى الجمهورية باعتباره أستاذ لمعظمهم ، وبالتالي ساعدها إنها توصل لأفضل مركز غطس في دهب وظبطلها الدنيا كمان في الإقامة …

• صباح الخير ، إيه الأخبار ؟
• صباح النور ، كله تمام
• جاهزة ؟
• جداً الحمدلله
• إنهاردة آخر غطستين في الكورس
• آه عارفة ، أنا كمان لسة قاعدة يومين تاني ، وإن شاء الله هغطس أربع غطسات كمان بكرة وبعده
• طيب ممتاز
• هو أنا لو قعدت كمان يومين تاني ينفع آخد ال Advanced open water
• ينفع طبعاً ، بس مستعجلة ليه على ال Advanced
• علشان أنا مش هعرف آجي تاني قبل سنة ، وبصراحة ال ١٨ متر دول بالنسبالي قليلين ، وكمان عايزة اتعلم ال navigation وأغطس أعماق
• خلاص تمام ، من بكرة لو تحبي
• آه طبعاً ، أنا جاهزة
• اتفقنا ، النهاردة بقى هنغطس في مكانين مختلفين ومميزين ، وهيكون معانا مدرب صديقي علشان يصور الغطستين
• واو ، والتصوير دة أنا هاخد منه كوبي ؟
• آه طبعاً ، ياللا قومي جهزي البوكس بتاعك وحطيه في العربية ، وأنا هجيب التانكات
• أوكى

خليني يا صديقي العزيز أغطس مع الجروب دة وانقلك أحداث الغطستين أو على الأقل واحدة منهم ، ولا إيه رأيك تيجي معانا وتشوف بنفسك ، تمام

موقع الغطس الأول هو موقع على أطراف دهب الجنوبية اسمه أُم سِيِد ، الموقع دة بيتميز بقوة التيرات البحرية ، فمش أي غطاس ينزل فيه ، ودة كان سبب استغراب حسام لما عرف إن چَيدا يا دوب لسة بتاخد الكورس الأول في مجال الغطس ، أنا شخصياً غطست فيه أكتر من مرة وحقيقي الغطسة بتبقى صعبة بمجرد ما تنزل المية من على الشط ، تيارات شديدة سواء على السطح أو في الأعماق …

الغريب اللي كريم مكانش مستوعبه واللي حسام لاحظه ، إن المكان المحيط بيهم طول الغطسة يكاد يكون منعدم التيارات البحرية وفي منتهى الهدوء ، وعلى بعد عشرة متر مثلا في جميع الاتجاهات قياساً من چَيدا لو اعتبرناها مركز الدايرة ، تيارات البحر عادية بمختلف قوتها واتجاهاتها ، أما بقى الأغرب والأعجب ، إن كل السمك اللي بيعدوا عليه أثناء الغطسة ، كان نشاطه بيقل تماماً وبيتركز نظره تحديداً على چَيدا ، وبمجرد ما تعدي بيرجع تاني لنشاطه واتجاه الطبيعي ، خد المفاجأة الكبرى بقى … الكاميرا مسجلتش حاجة

قبل ما تسمع الحوار الجاي دة عاوز افهمك حاجة بسيطة ، تانك الهوا اللي الغطاس بينزل بيه بيكون مضغوط هوا جوي لغاية مثلاً ٢١٠ بار ، يعني لو غطاس عادي مش محترف بس متوازن ، ممكن يستهلك هوا بمقدار ١٥٠ بار ، يعني يخلص غطسته واللي باقي في التانك هوا بمقدار ٦٠ بار …

• إيه رأيك في الغطسة دي يا چَيدا ؟
• حلوة أوي يا كابتن ، السايت جميل
• باقي معاكي هوا أد إيه ؟
• ١٦٠ ، إيه دة ؟! ١٦٠ ازاي ؟! أنا نازلة المية وكان ٢١٠ والغطسة ٥٠ دقيقة ، استهلكت ٥٠ بار بس

كريم بص لحسام اللي كان حرفياً ساكت من كتر الذهول باللي شافه تحت المية ، وكمان الكاميرا اللي مسجلتش حاجة رغم إنه كان واخد باله كويس من اللمبة الحمرا اللي بتأكد التسجيل ، وأخيراً من الرقم اللي سمعه

• لا طبعاً أكيد العداد دة مش مظبوط ، متقلقيش هنغيره لما نرجع السنتر

في الغطسة التانية في موقع غطس الآيلاند ، حسام شاف نفس الموقف بالظبط وبردو الكاميرا مسجلتش حاجة ، والمرة دي كان بشيك عليها كل دقيقة يمكن طول الغطسة ، علشان يتأكد إنه بيصور وبيسجل ، لكن بدون فايدة !!!

• إيه رأيك يا حسام ؟
• مش قادر اتخيل ولا عندي أي نوع من أنواع التفاسير يا كريم حقيقي ، البحر كأنه … كأنه بيإيه ؟! مش عارف الاقي كلمة تعبر حتى ، البحر كأنه بيقدسها مثلا
• أخدت بالك من كمية الهوا اللي بتتنفسه ؟
• ٥٠ بار دي المحترف بيستهلكها في تلت ساعة ، هي استهلكتها في ٥٠ دقيقة ودي خامس غطسة ليها
• لا هي كدة من أول غطسة
• البنت دي فيها حاجة ، وحاجة كبيرة أوي
• الغريب إن طاقتها إيجابية وقوية
• بمعنى إيه طاقتها إيجابية وقوية ؟
• يعني ببقى مرتاح وعندي پاور طول الغطسة ، ومش بطلع مرهق ، بالعكس ببقى قادر أنزل تاني وتالت
• هي هتخلص إمتى ؟
• خلاص بكرة آخر يوم
• نزلت كام متر ؟
• ٣٠ وفي منتهى الشغف إنها تنزل تاني
• سُكْر الأعماق ؟
• مفيش طبعاً ، ونفس كمية الهوا اللي بتستهلكها هي هي ، واستيعابها عالي أوي ، لولا إني واثق إن أنا أول من غطسها ، كنت قولت إنها محترفة
• هي ناوية تكمل ولا بتغطس علشان تقول إن معاها license ؟
• لا ناوية تكمل ، الصيف الجاي على كلامها ، هتيجي تقعد في دهب لغاية ما تاخد الماستر ، انت عارف أصلا دي بنت مين ؟
• مين ؟
• الدكتور سيد الحوت
• إيه دة ؟ بتاع طب الأعماق ؟
• ايوة ، طالعة تالتة صيدلة وبنت ناس ، وبطلة عرب وبحر متوسط سباحة ، ومحترمة أوي
• أنا مقولتش حاجة يا كريم ، بس البنت مُقلقة ، مُقلقة إيه … دي مُخيفة
• ربنا يستر يا حسام ، متقلقنيش بقى ، هنخلص بكرة خلاص ، ولما تيجي السنة الجاية يبقى يحلها الحلال

مركز الغوص بتاع كريم كان بيبص على البحر ، وتحديداً كان في منطقة المشربة المشهورة في دهب …

اليوم الأخير لچَيدا في السنتر عند كريم كان يوم مختلف عن كل الأيام اللي فاتت ، هو في الحقيقة كان يوم مختلف على دهب كلها …

بعد وصول چَيدا للسنتر الصبح الساعة تمانية كالمعتاد ، وبعد ما شربت القهوة ، كريم اتفاجئ بصوت عالي برة السنتر ، فطلع بطبيعة الحال يشوف فيه إيه ، وكل اللي في خياله ، إن فيه خناقة أو مشادة بين أصحاب المحلات وبعض ، لكن اللي شافه كان شوية غريب ، معظم اللي حواليه من أصحاب محلات وكمان الزباين والسياح المتواجدين في النطاق ، كانوا متجمعين في اتجاه البحر وبيشاوروا وبيصوروا مشهد ما ، من الواضح إنه غريب وجديد عليهم ، فكريم راح علشان يشوف الناس دي متجمعة بتتفرج على إيه ، ولما وصل ودخل بين الناس وبقى باصص مباشرةً للبحر ، شاف أغرب مشهد مر عليه في حياته ، ومر على كل اللي واقفين ، مشهد خلاه يلتفت وراه اتجاه السنتر ، فعينه توقع مباشرةً في عينين چَيدا ، اللي كانت واقفة بتحاول تكتشف الزحمة والصوت العالي دة سببه إيه ، وبمجرد ما عينه جات في عينيها قلبه نبض نبضة مختلفة وغريبة ، وكأنه اتخض … المشهد بالنسباله هو كان وقعه وتأثيره مختلف تماماً عن كل اللي بيتفرجوا … المشهد كان مرعب….