أعزائي السادة أصحاب نظرية “ده مجرد أنفلونزا”، أو فرضية “أصل ربنا حاميها”.. شوفوا أنا هحكيلكم اللي حصل في العالم في فترة تفشي فيروس كورونا الجديد COVID-19، ومنها اللي حصل كمان خلال الأيام اللي فاتوا ولكم أنتم الحكم..
أول حاجة.. إيطاليا أعلنت عن حوالي ٤٠٠ حالة وفاة جديدة في أقل من ٢٤ ساعة، وكمان تم إغلاق إيطاليا كلها بالكامل، وإعلان حالة الطواريء والحجر الصحي فيها.. مفيش مخلوق في شوارع إيطاليا، والحدود كلها مغلقة ومفيش طيران منها ولا إليها ولا سفر.. شوفوا المصدر هنا:
https://news.sky.com/story/coronavirus-deaths-in-italy-rise-to-1-266-up-250-in-a-day-11957245
تاني حاجة.. في مشهد ديستوبي مخيف، السلطات الصينية تقوم بوضع سماعات محمولة كبيرة أو ما يشبه ال (Subwoofers) في الشوارع وجانب البيوت، للتأكيد على الناس عدم الخروج من بيوتهم وإلا سيواجهوا مسائلة قانونية تصل لحدود مخيفة.. تخيل انت قاعد ف بيتك، بيجيلك أوامر من الدولة على سماعات في الشارع كإنه معسكر حربي.. جو ١٩٨٤ مكانش بعيد فعلًا، وجورج أورويل كان عنده بعد نظر.. المصدر بالفيديو موجود في حلقة من برنامج The Daily Show على قناة CBS، وتقديم الساخر العظيم تريفور نوا Trevor Noah.. هتلاقوه على اليوتيوب.
تالت حاجة.. الولايات المتحدة الأمريكية تقوم بإعلان حالة الطواريء القصوى، وتخصص أكبر ميزانية في تاريخها، بقيمة تبلغ نحو ٢ ونص مليار دولار لمحاربة انتشار الفيروس، وتعلن قفل الحدود وإلغاء الرحلات من وإلى أكثر من ٢٧ دولة أوروبية، والرئيس ترامب يتهم الدول الأوروبية بالفشل في السيطرة على الفيروس، وإعلان أوروبا بؤرة عالمية لانتشار CoVid-19.
رابع حاجة.. رئيس وزراء بريطانيا بوريس جونسون، يلقي خطبة تثير الفزع في قلوب الشعب البريطاني، والعالم كله، لما بيقول: “نحن الآن نصل إلى المرحلة التالية.. هذه ليست مجرد محاولة لاحتواء المرض بقدر الإمكان ولكن لتأخير تفشيه.. استعدوا لأن تفقدوا أحبائكم.”
هتلاقوا الخطبة هنا في المصدر ده:
https://www.theguardian.com/politics/video/2020/mar/12/coronavirus-johnson-warns-many-more-families-are-going-to-lose-loved-ones-video
خامس حاجة.. ألمانيا ترفض إغلاق الحدود لمواجهة كورونا رغم زيادة عدد الحالات فيها عن ال ١٣ ألف حالة.. وفرنسا توجه خطاب صارم للشعب الفرنسي، والمسنين خاصة بالبقاء في بيوتهم وعدم الخروج بسبب تفشي الفيروس هناك.. كمان إيطاليا اللي أصبحت بؤرة لتفشي الفيروس في أوروبا كلها بزيادة أكتر من ٣٦% عن أكتر زيادة شهدتها منذ ظهور المرض.. ده غير إن أوروبا كلها تقريبًا رفضت تساعد إيطاليا صحيًا، ومفيش حد وقف جوارها سوى الصين اللي أعلنت إنها هترسل وفد طبي لإيطاليا للمساعدة في إيقاف الفيروس، وذلك لأنهم حسب قول الوزير الصيني، منسيوش إن إيطاليا كانت من أوائل الدول اللي وقفت جنب الصين في بداية تفشي الفيروس.. المصدر هنا:
http://arabic.news.cn/2020-03/13/c_138871613.htm
سادس حاجة.. لأول مرة منذ ٥٠ سنة تقريبًا، دولة إيران اللي هي تعتبر من القوى العظمى العالمية، المسلحة بالقنابل النووية، بتطلب مساعدة من صندوق النقد الدولي لمكافحة انتشار كورونا!! شوفوا المصدر هنا:
https://arabic.sputniknews.com/world/202003141044863911-%D8%B7%D9%84%D8%A8%D8%AA-%D8%AF%D8%B9%D9%85%D8%A7-%D9%84%D8%A3%D9%88%D9%84-%D9%85%D8%B1%D8%A9-%D9%85%D9%86%D8%B0-50-%D8%B9%D8%A7%D9%85%D8%A7-%D9%87%D9%84-%D9%8A%D8%AC%D8%A8%D8%B1-%D9%83%D9%88%D8%B1%D9%88%D9%86%D8%A7-%D8%A5%D9%8A%D8%B1%D8%A7%D9%86-%D8%B9%D9%84%D9%89-%D8%AD%D9%84-%D8%A3%D8%B2%D9%85%D8%A9-%D8%A7%D9%84%D9%86%D9%88%D9%88%D9%8A/
كمان وزير الدفاع الأمريكي مايك بومبيو يعلن لأول مرة في التاريخ إن أمريكا مستعدة لتقديم المساعدة إلى إيران للحد من انتشار وتفشي فيروس كورونا الجديد.. أول مرة في التاريخ أمريكا تعرض المساعدة على واحد من أكبر أعداءها.. إيران!! شوفوا المصدر هنا:
ده غير الخساير الاقتصادية وخساير البورصة والتجارة التي لا تعد ولا تحصى واللي هتوصل لأكتر من ٤٠٠ مليار دولار قريب عالميًا، وانهيار سعر البترول، وإلغاء كافة الأنشطة الرياضية زي الدوري الإيطالي والأوروبي وكمان أنباء عن إلغاء قريب للألعاب الأوليمبية ٢٠٢٠.. وإلغاء معارض الكتاب والتكنولوجيا والألعاب الكبرى في كافة دول العالم بأكملها.
بس سيبكوا أنتم من كل ده.. إحنا أقوياء جدًا.. وبعد ارتفاع حالات الإصابة في مصر لأكتر من ٩٠ حالة (مكتشفة).. ووفاة حالتين.. بدأنا أخيرًا ناخد إجراءات جدية لمكافحة الفيروس.. لسه مقررين نوقف الدراسة أسبوعين!! بعد كل الكوارث اللي حاصلة في العالم دي!!
أصلها مجرد أنفلونزا.. الغرب دول فرافير.. إحنا الفيروس يخاف يخش عندنا أصلًا.. الإنسان عندنا ملوش قيمة.
أرجوكم اصحوا وفوقوا وافهموا إن الموضوع مش هزار ولا سخرية.. الفيروس ده هو واحد من أكثر الفيروسات خطورة في التاريخ.. وحسب قول رئيس منظمة مكافحة الأوبئة CEPI، الكلام ده قاله على التلفيزيون الرسمي:
“أنا أعمل في مجال مكافحة الأوبئة والإستعداد لها منذ أكثر من ٢٠ عامًا، وبدون أي مبالغة أو محاولة لإرعاب الناس، هذا المرض هو أكثر مرض مرعب قابلته في حياتي المهنية.. والقائمة تحوي أمراض مثل إيبولا Ebola وميرس MERS وسارس SARS”.
هتلاقوا الفيديو ده هنا:
الموضوع فعلًا مش هزار.. سنة ١٩١٨، وقت انتشار الإنفلونزا الأسبانية Spanish Flu، اللي قتلت عدد يفوق ضعف قتلى الحرب العالمية، وعدت حوالي ثلث سكان العالم.. كان العالم قريب من التداعي كده بردو.. والمرة دي هي ثاني مرة في التاريخ يحصل فيها كده، وده بسبب قدرة الفيروس الفائقة على الإنتشار وخلق سلالات جديدة منه للتغلب على محاولات مكافحته.
وعشان الناس اللي بتقول إنه هيختفي في الصيف.. مش هكدب عليكم فعلًا.. الإنفلونزا الأسبانية بدأت فعلًا مع بدايات السنة، وساعتها كانت دول العالم في خضم الحرب العالمية الأولى.. ومرضيوش يطبقوا إجراءات حجر صحي جادة بسبب الحرب.. وبسبب ده انتشرت شوية، لكن سلالتها الأولى مكانتش قوية للدرجة.. وفاعليتها قلت شوية في الصيف والناس ساعتها افتكرت إنها سيطرت على المرض.. لكن في فصل الخريف، وبعد مرور الصيف والربيع، ومع بداية دخول الشتاء مرة تانية، الفيروس رجع من جديد بسلالة جديدة وتوحش، وعلى مدار سنة تقريبًا انتشر بين ثلث سكان العالم، وقتل أكتر من ٥٠ مليون إنسان!! تخيلوا الرقم!!
٥٠ مليون إنسان ماتوا بالإنفلونزا الأسبانية.. فقط للعلم بالشيء، عدد قتلى الحرب العالمية الأولى هو ٢٠ مليون شخص.. وشوفوا المصدر ده هنا عشان تفهموا أكتر لو فاكرين إني بقول أي كلام:
https://www.alarabiya.net/ar/last-page/2020/03/05/%D9%85%D8%B1%D8%B6-%D8%A2%D9%85%D9%86-%D8%A7%D9%84%D8%B9%D8%A7%D9%84%D9%85-%D8%A8%D8%B2%D9%88%D8%A7%D9%84%D9%87-%D9%81%D8%B9%D8%A7%D8%AF-%D8%A8%D8%B9%D8%AF-%D8%A3%D8%B4%D9%87%D8%B1-%D9%88%D9%82%D8%AA%D9%84-50-%D9%85%D9%84%D9%8A%D9%88%D9%86%D8%A7
للمرة المليون.. الفيروس مش مزحة.. وده ليس تهويلًا مننا.. خدوا بالكوا من نفسكم كويس، واغسلوا إيديكم كل ساعة أو اتنين بمطهرات كحولية، واشتروا أقنعة واقية طبية لو في مقدرتكم.. حاولوا تلتزموا البيوت ومتخرجوش إلا للضرورة القصوى.
واحد من ضمن الأسباب الرئيسية ل لامبالاة الشعب وهزارهم ونقدهم المستمر لإجراءات الحكومة ووزارة الصحة بالمنظر ده، هو حالة عدم الثقة والكره اللي موجودة بين الشعب والشباب، والحكومة ومؤسساتها.. الناس مش واثقة في الحكومة ولا في الدولة، ومهما حصل، مش هيصدقوا أي إجراء أو تعليمات يقولهالهم أي مسئول.. وده أخطر شيء ممكن يحصل في مواجهة وباء عالمي زي ده.
بس الرئيس عبد الفتاح السيسي بيحاول ياخد خطوة، وأصدر قرار رئاسي بتأجيل الدراسة أسبوعين، ف أرجوكم اسمعوا الكلام، وبلاش والنبي ذكاء وننزل نتفسح ونحتفل في المولات، ونتخانق على كراسي ال Food Court.. كلكم مسئولين بشكل أو بآخر عن كل حالة وفاة هتحصل لو الفيروس تفشى بشكل أكبر زي ما هو متوقع.
ده غير قرارات قفل المطاعم وتأجيل تحصيل القروض والضرايب لمدة ٦ شهور وإلغاء امتحانات النقل في المدارس.. كل دي قرارات جيدة جدًا، ف يا ريت نسمع الكلام ومنتجاهلوش.
الموضوع دلوقتي خرج من دايرة الخلاف السياسي أو التريقة على الحكومة عشان نبقى روشين، أو السخرية من المرض عشان احنا جامدين وبناكل فول.. الإتحاد بين كل أطياف الشعب هو السبيل الوحيد لعبور الكارثة دي.. وده اللي شفناه فعلًا أثناء العاصفة اللي مرت بمصر في اليومين اللي فاتوا، ونتمنى إنه يتكرر، وإن الناس يبقى عندها الوعي الكافي إنها تفهم دورها المطلوب منها، وحجم الكارثة اللي ممكن تحصل لو مخدوش الأمور بجدية.
أتمنى تحكوا لأهلكم وصحابكم عن اللي قريتوه هنا، يمكن يساعد ولو بحاجة بسيطة في نشر الوعي ضد الوباء.. كل واحد فيكم في إيده يوصل كلامي لكل اللي يعرفهم، ف متكسلوش أرجوكم..
ربنا يحفظكم ويحفظ أولادكم، وربنا يعدينا منها على خير.
