العالم من حوالينا مليان ألغاز مش محلولة، حاجات مُرعبة بتحصل في كُل مكان في العالم، ألغاز بتعرفك إن البشر مخيفين أكتر من أي مخلوقات مُرعبة تانية!
كُل اللي هعمله إني هاخدك من إيدك وهنروح نتفرج على الألغاز دي واحد واحد، بس خد بالك كويس، إحنا ماشيين في وسط حقل ألغاز، يلا بينا..
يوم 7 أغسطس 1972، الطالبة في مدرسة جوناثان دايتون الثانوية، جانيت ديبالما اللي عندها 16 سنة، قالت لوالدتها إنها خارجة وهتركَب القطر عشان تروح تزور واحدة صاحبتها، وإنها هتتصل بيها تطمنها لمَّا توصَل، لكن الوقت إتأخَّر.. وجانيت مكلمتش والدتها، عشان كدا والدتها بدأت تقلَق، لكن الأم مكانتش تعرَف إن بنتها أصلًا موصلتش لبيت صديقتها، الأم بلغت السُلطات والمسؤولين، وحطوا جانيت على راس قايمة المفقودين في الدايرة المسؤول عنها قسم شُرطة سبيرنج فيلد بنيو جيرسي
يوم 19 سبتمبر 1972، كان فيه شخص بيمشِّي الكلب بتاعه بالقُرب من محاجر سبرينج فيلد، وهناك اكتشف جُثة جانيت بالصُدفة، لمَّا الكلب بتاعه بعد عنه ورجع بعد شوية وهو ماسِك بين سنانه جُزء من ذراع مُتحلِّل، ومن أول النقطة دي، القضية هتفضَل متعلقة بين الواقع والخيال للأبد، ظهر شهود اعترفوا إنهم شافوا جُثة جانيت في أعلى التل فوق، قريبة من المنطقة اللي السُكَّان المحليين بيطلقوا عليها منطقة (أسنان الشيطان)، قالوا إن جُثتها كانت مُحاطة بأشياء تابعة لطائفة دينية، وحاجات لها علاقة بالطقوس الشيطانية
لكن الأشياء اللي لها علاقة بطائفة دينية أو طقوس شيطانية دي كانت بتختلف من شخص للتاني، كُل واحد من الشهود دول بيقول كلام مُختلِف عن الباقيين، لدرجة إن بعضهم كان بيقول إن الجُثة كانت وسط نجمة خماسية مرسومة بالدم، وعلى أطراف النجمة في جُثث لحيوانات مُتحلِّلَة، وطبعًا كان لازم الشُرطة تتدخَّل عشان تنكر وتنفي كُل الكلام اللي بيتقال دا، لكن الحاجة اللي الشُرطة مقدرتش تنكرها لأن كُل السُكَّان المحليين شافوها كانت إن الجُثة كان جنبها نعش مصنوع من أغصان الشجر، ومجموعة من الصُلبان المصنوعة من عيدان خشبية
بدأت مدينة سبرينج فيلد كلها تتكلِّم عن حاجة واحدة بس، وهي قضية جانيت، الشُرطة أعلنت إنها انتحرت، لكن الناس كانوا مصدقين إن الموضوع له علاقة بالطقوس الشيطانية والطوائف الدينية المُخيفة، وإن جانيت المسكينة كانت مُجرَّد قربان بشري برئ تم استعماله لاستدعاء كيان شيطاني من نوعٍ ما
الغريب إن للأسف الشديد الطب الشرعي وتشريح الجُثة مقدروش يجاوبوا على أي سؤال من الأسئلة المطروحة ولا حتى قدروا ينفوا أي إشاعة من الإشاعات اللي بتنتشِر، مقدروش أصلًا يحددوا سبب وفاة جانيت، لكنهم خمنوا إنها ماتت مخنوقة، تقرير علم السموم قدر يثبت إن فيه كميات كبيرة جدًا من الرصاص في جسمها، لكن دي كانت حاجة غريبة جدًا ومالهاش أي تفسير على الإطلاق
بعد أسبوعين من العثور على جُثة جانيت، الصُحف المحلية قرَّرت تحط البنزين جنب النار، وبدأت تنشر تقارير بتقول إن موتها كان بسبب سحر أسود وماتت على إيد مجموعة من السحرة، وفيه أخبار محلية فعلًا إتنشرت في بعض الصُحف زي دول مثلًا
الشخص الوحيد اللي أكِّد صحة الكلام دا كان القس جيمس تيت، وقال إن الشُرطة بتحاوِل تخفي حقيقة الموضوع
لكن ظهر مصدر غير مؤكِّد عشان يقول إن جانيت كانت قريِّبة من القس جيمس، وكانت بتحضر بانتظام خدمات الكنيسة وبتشتغل معاه في برنامج مُصَمَّمَ لمُساعدة المراهقين المدمنين على المخدرات من خلال جمعيات خيرية، ودا لأنها هي نفسها وقعت فريسة في فخ الإدمان من فترة، لكنها قدرت تنقذ نفسها بالإرادة والقُرب من الله، عشان كدا قرَّرت تساعد غيرها عن طريق جمعيات وبرامج القس جيمس
وبدأت إشاعة جديدة تنتشر في المدينة، وهي إن مجموعة من المُراهقين هُمّا اللي ورا مقتل جانيت، ومع انتشار الشائعة دي، الشُرطة وصلت لأول دليل مادي ملموس في القضية، لقوا واحد مُشرَّد مُخيِّم في منطقة المحاجر، وهي المنطقة اللي لقوا فيها جُثة جانيت، كُل اللي كانوا يعرفوه عن المُشرَّد دا هو إن اسمه (ريد) بس، خدوه للقسم عشان يحققوا معاه، لكن بعد شوية سابوه وقالوا إنه برئ
مع عدم وجود خيوط تانية في القضية، وتضارُب القصص وكثرة الإشاعات المُنتشرة عن قضية مقتل جانيت، والإثارة الإعلامية المُحيطة بوفاتها، القضية إتقفلت ضد مجهول، الملفات أتحفظت، لكن الغريب إن بعض فترة أغلب ملفات القضية دي تحديدًا ضاعت أو إتدمرت من قِبَل القسم نفسه، والموضوع إتنسى لفترة طويلة أوي، لحَد ما مجلة (Weird NJ) قرَّرت تعيد فتح القضية والتحقيق فيها
مُحرِّر النشر والمُساعد في إدارة المجلة السيد مارك موران، اكتشف مجموعة من التفاصيل الغريبة والمُريبة اللي كانت موجودة في تحقيقات الشُرطة في القضية دي تحديدًا، دا غير إن كُل سُكَّان البلدة رفضوا يعملوا معاه لقاءات أو حوارات بخصوص القضية دي، ومن ضمن الناس دول.. قسم الشُرطة نفسه، لكن مجموعة من الناس طلبوا يدلوا بشهادتهم للسيد مارك بشرط هوياتهم تفضَل مجهولة، وقالوا إنهم مُتأكدين إن الشُرطة كانت ومازالت بتحاول تغطي على الموضوع، ومع عودة القضية للأضواء مرة تانية بفضل المجلة، بدأت تظهر بعض النظريات اللي بتحاول تفسَّر موت جانيت ديبالما الغامض
زي نظرية القاتل المُتسلسِل:
ودا لأن فيه كذا جريمة حصلت في أماكن مجاورة تكاد تُشبه أعمال قاتل مُتسلسل زي موت بنتين صُغيرين سنة 1974، لكنها كانت نظرية ضعيفة جدًا وإثباتها كان شبه مُستحيل
أو نظرية القس القاتل:
ودا لأن القس جيمس كان بيحاول بشكل مُبالغ فيه إنه يقفل القضية ويقنع الناس إنها طقوس شيطانية بشكل غريب ولافت للنظر، لكنه برضه كان برئ تمامًا ومفيش عليه ولا حتى دليل واحد بس
لكن السبب الحقيقي لموت جانيت بالشكل الغريب دا، لسَّه غير معروف لحَد دلوقتي
تقدر تتابع كل الألغاز لمحمد عصمت من (هنا)
لغز تشاك مورجان بقلم الكاتب محمد عصمت بتاع الرعب
لغز شبح الطريق السريع.. بقلم الكاتب محمد عصمت بتاع الرعب
