لغز الثلاجة بقلم الكاتب محمد عصمت بتاع الرعب

لغز الثلاجة:

العالم من حوالينا مليان ألغاز مش محلولة، حاجات مُرعبة بتحصل في كُل مكان في العالم، ألغاز بتعرفك إن البشر مخيفين أكتر من أي مخلوقات مُرعبة تانية.

كُل اللي هعمله إني هاخدك من إيدك وهنروح نتفرج على الألغاز دي واحد واحد، بس خد بالك كويس، إحنا ماشيين في وسط حقل ألغاز … يلا بينا

يوم 23 يونيو 1965، ظُباط شُرطة هيوستن قرروا القيام بزيارة عادية لبيت ساكن فيه زوجين عجوزين، فريد وإدوينا روجرز، وعلى غير المُعتاد البيت كان فاضي، حسوا بالدهشة وقرروا يمشوا ويرجعوا لهم وقت تاني، لكن ولسبب غير معلوم قرر واحد من الظُباط إنه يفتح التلاجة ويبُص جواها

الظابط تشارلز بولوك بيحكي اللي شافه في اليوم دا وبيقول: ” فتحت التلاجة، مكانش جواها غير قطع كبيرة من اللحم، واحد من زمايلي كان واقف جنبي، قال تعليق ساخر عن إن حد دابح خنزير ضخم جدًا، مكُناش نعرف إننا أدام جُثة غير وإحنا بنقفل التلاجة، واحد مننا لمح راس بشرية محطوطة في درج الخضروات اللي تحت ”

الطب الشرعي أثبت بعد شوية إن فريد اللي كان عمره 81 سنة وإدوينا زوجته اللي عُمرها 72 سنة إتقتلوا من إسبوع، وجُثثهم إتحطت في الثلاجة، إدوينا تعرضت لضرب مُبرح قبل ما تموت ضربًا بالرصاص، فريد مات بسبب تحطيم جُمجمته، أمعائه لقوها في الصرف الصحي بعد كدا

حتى الآن القاتل مازال مجهول، لكن المُشتبه بيه الرئيسي هو ابنهم تشارلز اللي كان وقتها عمره 43 سنة، إختفى فجأة، بدون ما يسيب أي أثر

لكن مؤخرًا، إتنين مواطنين من هيوستن وهُمّا هيو ومارثا جاردينر قالوا إنهم على وشك يحلو لغز التلاجة اللي فضل مفتوح طوال الفترة دي

قالوا إنهم عملوا تحريات كتير أثبتت إن تشارلز اللي كان بيشتغل عالم جيوفيزيائي كان بيتعرض لاعتداءات عاطفية وجسدية من أهله طول عُمره

لكن القشة التي قسمت ظهر البعير إنهم كانوا بياخدوا قروض على اسمه بضمان بيته، ومش بيسددوها، في النهاية فاض بيه وقرر ينتقم منهم ويقتلهم

لكن اختفاء تشارلز اللي بدون أي أثر دا كان غريب وظهر ناس ضد النظرية دي وبيقولوا إن تشارلز مات هو كمان جُثته اختفت، وإن اللي قتله هو اللي قتل أبوه وأمه لكن ليه … محدش عارف لحَد دلوقتي

طب قولي تعرف لغز مصاص الدماء بتاع ستوكهولم؟

لا …

خلاص هقولك عليه الأسبوع الجاي

يمكنكم مشاهدة جميع الألغاز هنا