لغز السناب شات :
العالم من حوالينا مليان ألغاز مش محلولة، حاجات مُرعبة بتحصل في كُل مكان في العالم، ألغاز بتعرفك إن البشر مخيفين أكتر من أي مخلوقات مُرعبة تانية.
كُل اللي هعمله إني هاخدك من إيدك وهنروح نتفرج على الألغاز دي واحد واحد، بس خد بالك كويس، إحنا ماشيين في وسط حقل ألغاز.. يلا بينا
في ديلفي بولاية إنديانا، لمّا الليل بييجي، السُكّان بينوروا شُرفاتهم بنور برتقالي موجّه ناحية الشارع، مش بس عشان يفتكروا ذكرى بنتين صُغيرين اتخطفوا واتقتلوا في ظروف غامضة، لكن كمان عشان يفتكروا إن القاتل مازال حُر طليق.
يوم 14 فبراير 2017 وجدوا ليبرتي جيرمان اللي عندها 14 سنة، وأبيجيل ويليامز اللي عندها 13 سنة مقتولتين، والدة ليبرتي قادت حملة لتبديل أضواء شُرفات السُكّان تخليدًا لذكرى البنات
وهيفضلوا مفتوحين لحَد ما يتم القبض على القاتل.
ليبي وآبي كانوا أصدقاء مُقربين، وكانوا زملاء في فريق كُرة الطايرة، قبل رحلة الاستكشاف اللي قاموا بيها بيومين، كانوا بيستعدوا عشان مباريات الفريق في فصل الربيع.
يوم 13 فبراير قرروا يستغلوا يوم أجازتهم ويخرجوا سوا في رحلة تخييم، لكنهم مكانوش يعرفوا انها هتكون رحلة ذهاب بلا عودة.
الجو كان حلو يومها، وهُمّا كانوا عارفين كويس أوي الأماكن اللي هيتجولوا فيها ويستكشفوها، وحتى حددوا المكان اللي هيقابلوا فيه باقي أصدقائهم لمّا هيخلصوا رحلتهم.
أخت ليبي الكبيرة هي اللي وصلتهم، وبسُرعة بدأوا نشاطهم على السوشيال ميديا بصور كتير من رحلتهم اتنشرت على حساب ليبي.
الساعة 2:09 بعد الظُهر، ليبي رفعت صورة لصديقتها وهي ماشية على جسر مونون على حسابها على السناب شات، لكنها مكانتش تعرف مدى أهمية الصورة دي.
جد ليبي اتصل بيهم الساعة 3 بعد الظُهر عشان يقولهم كدا كفاية ويتفق معاهم على المكان اللي هياخدهم منه.
الساعة 4 اتصل بأخت ليبي عشان يقولها إن البنات مجوش في ميعادهم ومش بيردوا على مُكالماته واتصالاته
الساعة 5:30 بدأوا يحسوا بالقلق، وفورًا بلغوا إن البنات مفقودين.
الساعة 6 تمامًا بدأت عمليات البحث اللي انضم ليها مئات السُكان المحليين وبدأوا يدوروا في الغابات، لكن الظلام كان أقوى منهم، قرروا يأجلوا عمليات البحث للصباح، لعل الرؤية تكون أوضح.
لكن تاني يوم، الموضوع بقى أسوأ!
لقوا جُثث البنات على ضفاف نهر دير كريك، على بُعد كيلومتر واحد من المكان اللي اتاخدت فيه صورة السناب شات، الشُرطة فورًا تكتمت على الموضوع ورفضت تطلع أي بيانات عن الطريقة اللي اتقتلوا بيها.
محدش عارف بالظبط تفاصيل اللي حصل في اليوم دا، لكن المُراهقين هناك عرفوا إنهم في خطر.
الشُرطة بتقول إنهم إتخطفوا، وإن ليبي استعملت تليفونها في السر عشان تسجل لحظات من الرعب اللي هُما فيه بيأس.
يوم 15 فبراير الشُرطة خرجت صورة مش واضحة، قالوا إنها اتصورت بتليفون ليبي، كانت صورة راجل ماشي على الطريق
بعدها بأسبوع الشُرطة خرجت مقطع صوتي قصير لراجل بيقول: ” تحت التل “.
قالوا إن المقطع دا تم استخراجه من تليفون ليبي للراجل اللي كان بيتبعهم.
وخرجوا كمان صورة تخيلية مرسومة للشخص الموجود في الصورة واللي كان بيتبع البنات طوال اليوم.
قالوا كمان إن تليفون ليبي فيه أدلة كتير لكنهم مش هيقدروا يخرجوا أي حاجة منها عشان ميهددوش عملياتهم السرية ويعرضوها للخطر.
في سبتمبر 2017، تم القبض على مُشتبه به وهو دانيال نيشونز في ولاية كولورادو، لكن بسُرعة تم الإفراج عنه لأنهم مقدروش يربطوا بينه وبين القضية.
الخوف دلوقتي إن القاتل يفضل هربان وميتمش القبض عليه أبدًا.
ولحَد ما يتم القبض عليه ..
هيفضل الضوء البرتقالي مفتوح في الشُرفات.
ادعي بقى يقبضوا عليه قبل الأسبوع الجاي؛
عشان هحكيلك المرة الجاية عن وحش فلورنسا.
…
اقرأ أيضًا:
