مع بداية غروب شمس يوم 9 يونيو 2012، السيدة هاركينز أشعلِت حريق صُغيَّر بالقُرب من رصيف سان بطرسبرج، السيدة هاركينز اللي عندها 35 سنة واللي كانت مسؤولة سابقًا عن محو الأمية في مركز ليلمان ومركز الأسرة في الحي الآسيوي كانت بتعمِل طقوس شيطانية لتطهير نفسها وتطهير مجموعة من طلابها السابقين، لمَّا طلابها وصلوا.. قالتلهم إنهم ممسوسين بمجموعة من الشياطين وإن الطريقة الوحيدة للتخلُّص من الشياطين دي هو إنهم يسمحوا لهاركينز إنها تفتح أجسامهم وتخرَّج الشياطين وبعدين تكوي جروحهم مرة تانية
المُتحدِّث الرسمي باسم الشُرطة السيد مايك بويتز قال: ” على ما يبدو كان فيه شوية ترتيل لتعويذة غريبة، ورقصوا شوية حوالين النيران اللي أشعلوها، وبعدين هاركينز أمرتهم إنهم يجرحوا بعض وكانت بتستخدِم ولاعة عشان تكوي جروحهم ”
خلال الطقوس الشيطانية دي هاركينز كانت بتحاوِل تستخدم الولاعة عشان تكوي جروح واحد منهما، لكن الرياح كانت قوية وكانت بتطفي النار، فهي قرَّرِت تصُب برفان الأول على الجروح باعتبار الكحول الموجود في العطر هيساعِد النار شوية، وفعلًا.. خطتها مشت بشكل كويس
النار كانت قوية لدرجة إنها سببت حرق من الدرجة التانية في إيد الولد، واحد تاني أقنعته إنها لازم تدبح رقبته برقبة إزازة مكسورة، وبعد ما دبحته، هاركينز استخدمت مُفتاح سُخن عشان تضغط بيه على الجرح وتكويه
المُتحدِّث الرسمي باسم الشُرطة قال: ” مجموعة الطُلاب اللي شاركوا في الطقوس الشيطانية دي كانوا مواليين أوي للمُدرسة بتاعتهم، لدرجة إنهم مقالوش أي حاجة لأهلهم عن اللي هيحصَل ”
الغريب هو إن سبب كُل دا مكانش معروف على الإطلاق، ليه هاركينز عملت كدا؟ وإيه الدافِع لكُل دا؟ وجابت الأفكار دي منين؟
كُل دي ألغاز مكانش ليها أي حل
وبدأت النظريات تظهر في محاولة لشرح الموضوع وتبريره، نظرية منهُم بتقول إن طلاقها من جورج – زوجها – هو السبب، خصوصًا إن زواجهم مكانش ناجِح، وللأسف الطلاق كان صعب ووصل لحَد المحكمة
لكن في نظرية مُختلِفة ظهرت وكان مصدرها جارتها اللي قالت إن هاركينز بدأت تنغمِس في ديانة غريبة، وإنها في يوم خبطت عليها وأول ما فتحت الباب، وقفت أدامها ساكتة شوية قبل ما تقول لها إنها تمام ومفيهاش أي شياطين
الحاجة الغريبة التانية هي إزاي الطلاب دول وصلوا لمُدرستهم السابقة؟ وإزاي أقنعتهم إنها تعمِل عليهم الطقوس الشيطانية العنيفة دي؟
حتى الآن الإجابات على السؤال دا مش موجودة، خصوصًا إن الطُلاب بيرفضوا يعلَّقوا على اللي حصل، زي ستيفين شانثاماليما اللي عنده 17 سنة، لمَّا سألوه عن الموضوع قال: ” أنا بخير، وكُل اللي أعرفه عنها إنها في السجن ”
ولا واحد من الطلاب عايز يشهَد عليها أو حتى يقول إيه بالظبط اللي حَصَل!
النظريات بتقول إنها قدرت تتواصل معاهم وتقنعهم على المدى البعيد بطقوسها الدموية الغريبة
الأغرب بقى إن بعد انتهاء الطقوس، مفيش حد من الطُلاب فكَّر يقول لأهله أو حتى يبلَّغ الشُرطة، على ما يبدو إنهم كانوا شايفين أفعال السيدة هاركينز كانت طبيعية جدًا، حتى بعد اكتشاف الأمر وحديث الصُحف ونشرات الأخبار عنه، رفض أي حد منهم يتكلِّم عن طبيعة اللي حَصَل أو عن المُدرسة السابقة بتاعتهم، لكن واحد منهم حكى لصديقه عن الطقوس الشيطانية الدموية في مجموعة رسايل نصيَّة، وصديقه حس بخطورة الأمر فبلَّغ أهله، اللي اتصلوا بالشُرطة فورًا
المُشكلة إن الولد لو مكانش حكى لصديقه، كان الموضوع فضل سر ومحدش عرف عنه حاجة، والمُدرسة دي نجت بفعلتها
قبل كُل دا ما يحصل بقى، هاركينز كانت شخص عادي جدًا، كانت مُدرسة محو أمية في مركز أسرة في فلوريدا، متجوِّزة وعندها ولدين، مكانش حد متوقِّع اللي هيحصَل دا، مُديرتها السابقة بتقول عنها: ” مُدرسة كويِّسة جدًا، ذكية جدًا، موهوبة جدًا، عُمرها ما إتكلمت عن شياطين أو أي حاجة زي كدا ”
للأسف لأن الموضوع تم برضا الطلاب تمامًا، فالشُرطة مقدرتش توجه لها غير تُهمة واحدة بس وهي سوء مُعاملة الأطفال، أجبروها على الاستقالة من شُغلها كمُدرسة، وإتحدِّدت لها كفالة خروج بمبلغ 55 ألف دولار، هاركينز فضلت في السجن سنتين، خلال السنتين دول حاولت الشُرطة تجيب أي معلومات من الطُلاب خصوصًا اللي إيده إتحرقت أو اللي إتدبح، لكنهم رفضوا تمامًا يقولوا أي حاجة، وخرجت هاركينز من السجن في 2014
الموضوع فيه ألغاز كتير لحَد النهاردة وإجابات كتير لسَّه مجهولة
🙄🙄🙄
جميل جداً
قصة غريبة فعلا ومثيرة
الغاز حلوة فعلا 👍👏
الغاز حلوة فعلا 👍👏 و
ألغاز إي بس أنا عايزه رعب رعــــب قصص رعب نفسي أخاف من حااجه حرام عليك نفسي من كتر الرعب معرفش اناام 🙆😢😭