فيه مُصطلَح دارِج في الرعب الشرقي اسمه القرين، وفيه مُصطلح تاني دارِج في الرعب الغربي اسمه الـ (Doppelganger) وهو أقرَب شيء للقرين في الرُعب الشرقي رغم وجود بعض الاختلافات، المُصطلَح بيُستخدَم عادةً عشان يوصف شخصين شبه بعض جدًا، بس المُصطلح دا كمان له استخدام تاني، أو تعريف تاني، وهو ظهور قرين أو شبح مُشابِه تمامًا لشخص على قيد الحياة، مش شخص مُشابِه ليه، لأ.. شبح أو طيف، ومُطابِق تمامًا للشخص دا.
واحدة من أغرب الحالات اللي بتتكلِّم عن القرين دا هي لغز إيميلي ساجي، أول ظهور للغز إيميلي ساجي كان في كتاب اسمه خطوات نحو عالم آخر أو (Footfalls on the Boundary of Another World) للكاتِب روبرت ديل أوين سنة 1860، والسيد روبرت قال إنه سمع القصة بنفسه من جوليا فون جولدنستاب، بنت البارون فون جولدنستاب، اللي كانت طالبة في مدرسة خاصة اسمها (Pensionat von Neuwelcke) سنة 1845 بلاتفيا، ودي المدرسة اللي كانت إيميلي ساجي مُدرِّسة فيها في السنة دي.
إيميلي وقتها كان عندها 32 سنة، كانت مُدرِّسَة شابة لطيفة، ذكية، ومحبوبة بين الطلاب اللي في المدرسة، لكن كان فيها حاجة غريبة، إيميلي خلال آخر 16 سنة.. اشتغلت في 18 مدرسة، والمدرسة الخاصة دي كانت المحطة رقم 19 في تسلسلها الوظيفي، وبمرور الوقت.. بدأ كُل اللي حواليها يفهموا ليه إيميلي مش بتكمِّل سنة واحدة في أي مدرسة من المدارس اللي اشتغلت فيها.
إيميلي ساجي عندها قرين، قرين شبحي تحديدًا يعني، وبيظهر للناس اللي حواليها في أوقات عشوائية، يعني أول مرة ظهر كانت هي واقفة بتدرِّس لفصل فيه 17 طالبة، كانت واقفة وبتكتب على السبورة بشكل طبيعي، ضهرها للطالبات ووشها للسبورة، فجأة.. ظهر لجميع الطالبات قرين شبحي شبهها بالظبط، بيقلِّد حركاتها بدقة وبدون تردُّد وكأنه عارِف كُل حركاتها قبل ما تعملها، كُل الطالبات اللي في الفصل كانوا قادرين يشوفوا إيميلي، بس هي نفسها مكانتش قادرة تشوفه، في الحقيقة.. هي عُمرها ما كانت قادرة تشوفه، بيقولوا كمان في أغلب الثقافات إن الواحِد لو شاف قرينه هيموت.
ومن بعدها.. بدأ قرين إيميلي الشبحي يظهر للناس من حواليها، شافوه مرة قاعِد جنب إيميلي وهي بتاكُل، وبرضه كان بيقلِّد حركاتها، شافوه مرة تانية قاعِد على كُرسيها في الفصل وهي كانت واقفة تشرَح، وفي مرة كانت إيميلي بتساعِد واحدة من الطالبات تلبس زي مُعيّن عشان مُناسبة مدرسية، البنت بصَّت تحت عشان تشوف حاجة وفوجئت إن إيميلي والقرين بتاعها ماسكين الفستان وبيظبطوه، البنت طبعًا أغمى عليها فورًا وبدون نقاش.
لكن أكتر ظهور غريب فيهم كان لمَّا فصل كامِل مكوَّن من 42 بنت شافوها في الحديقة بتتفرَّج على الزهور، سلموا عليها وطلعوا الفصل، خلال دقايق.. إيميلي دخلت الفصل وبدأت تشرَح، الموضوع استمر لدقايق بشكل طبيعي لحَد ما واحدة من الطالبات قالت إن إيميلي واقفة تحت في الحديقة لسَّه وهي كانت قادرة تشوفها من الشبَّاك، كانوا مرعوبين طبعًا من القرين الشبحي اللي عندهم في الفصل، بعض البنات الشجاعات راحوا للقرين وحاولوا يلمسوه لكنهم فوجئوا إن إيديهم بتعدي منه، بس حسُّوا كأنهم لمسوا شبكة عنكبوت.
لمَّا سألوها عن الموضوع، إيميلي نفسها كانت مش فاهمة حاجة، عُمرها ما شافت القرين اللي مبوَّظ كُل حياتها دا، ومالهاش أي تحكُّم فيه، وبسبب ظهوره المتكرِّر كانوا بيمشوها من كُل المدارس، حتى شُغلها في المدرسة الخاصة دي كان في خطر، مش طبيعي يكون فيه واحدة وقرينها الشبحي موجودين بشكل طبيعي وسط الناس، أغلب أولياء الأمور طلَّعوا أولادهم المدرسة، في النهاية.. إدارة المدرسة رفدِت إيميلي، على الرغم من كفاءتها كمُدرِّسة.
طبعًا فيه تفسيرات قليلة جدًا ظهرِت في محاولة لتفسير ظهور قرين إيميلي الشبحي الغريب دا، وعلى الرغم من إن قصص ظهور القرناء قُليِّلة جدًا في التاريخ إلا إن قصة إيميلي أكتر قصة مُرعِبة فيهم، لأن في كُل مرة القرين دا كان بيظهر، كانت حالة إيميلي الصحية بتسوء وبتضعف، لحَد ما بيختفي، وساعتها.. إيميلي بترجَع لطبيعتها مرة تانية.
ظهرت تفسيرات بتقول إن قرين إيميلي دا هو مُجرَّد انعكاس للمُدرِّسة المتفوقة اللي كان نفسها تكونها، بمعنى إن يكون عندها قدرة تشرَح وتراقِب الطلاب في نفس الوقت.
ناس تانية قالت إن دا مش قرين، دي إيميلي برضه بس في بُعد تاني، وبتظهر لمَّا الأبعاد بتتداخَل.
لكن أدينا أهو بعد قرنين تقريبًا لسَّه بنتكلِّم عن الموضوع كأنه لغز، ودا لأن مالوش أي تفسير..
اقرأ أيضاً
