لغز زومبي هايتي الحي ، أنجلينا ناركيس كانت ماشية في السوق المفتوح في لاستير بهايتي، فجأة.. الناس سمعوها بتصرُخ بأكتر صرخة مُرعِبة سمعوها في حياتهُم، ودا لأن أدام عينيها كان واقف أخوها وبيبُصلها بعيون خالية من الحياة، أخوها كليرفيوس ناركيس، سبب خوفها الرهيب دا، كان إن دي هي المرة الأولى اللي تتقابِل فيها هي وأخوها من 18 سنة، ودا لأن آخر مرة أنجلينا شافِت أخوها فيه، كان وهي بتدفنه في قبره.
سنة 1962.. كليرفيوس ناركيس راح بنفسه لمُستشفى ألبرت شويتزر في ديجاردان بهايتي، كان بيشتكي من حُمى وألم في جسمه، وقتها تم الكشف عليه عن طريق إتنين دكاترة، واحد منهم كان أمريكي، والتاني كان دارِس للطب في أمريكا، ووقتها اتفقوا الإتنين على تشخيص كليرفيوس بانخفاض ضغط الدم، اضطرابات الجهاز التنفسي، والالتهاب الرئوي، وعدة أمراض تانية مُختلِفَة، والحقيقة إن حالته كانت فعلًا بتزداد سوءً وبتتحوَّل للأسوأ، وكليرفيوس كان بدأ يشتكي من ألم زي الوخز في جسمه كُله وشفايفه بدأت تتحوَّل للون الأزرق.
بعد أيام قُليِّلَة من دخوله لمُستشفى ألبرت شويتزر، أعلنوا رسميًا إن كليرفيوس ميت، أنجلينا كانت مُنهارة من العياط على أخوها الميت، وأختهم التانية ماري كلير هي اللي بصمِت على شهادة الوفاة الخاصة بيه، وتاني يوم.. دفنوه في قبره.
عادةً.. دي نهاية القصة خلاص، لكن بالنسبة لكليرفيوس ناركيس، بطريقةٍ ما.. دي كانت مُجرَّد البداية لقصة غريبة ومُرعِبَة.
طيب إيه اللي حَصَل في الفترة اللي ما بين مرض كليرفيوس ناركيس الغامِض سنة 1962، واليوم اللي ظَهَر فيه تاني بعد 18 سنة؟
طبقًا لكلام ناركيس نفسه ونقلًا من على لسانه، فهو كان واعي لكُل حاجة حصلِت في المُستشفى، لكنه للأسف.. مكانش قادِر على الحركة أو حتى على الكلام، وسمع الأطباء وهُمَّا بيعلنوا إنه ميت، حس بالملاية وهي بتتشَد على وشه، والمُرعِب أكتر.. إنه كان واعي والتابوت بيتقفَل عليه وبينزل تحت الأرض، جسم كليرفيوس كان فيه جرح قال إنه من مسمار من مسامير التابوت اللي اخترق الخشب بقوة وغرس في جسمه.
بعد ما أهله مشوا وسابوا المقبرة بوقت قُليِّل، دخل بوكور المقبرة، والبوكور دا ساحِر من سحرة الفودو، وبدأ ينبش القبر لحَد ما خَرَّج الجُثة، ونجح البوكور في إخراج كليرفيوس من الحالة الغريبة اللي كان فيها، وبعدها أجبره على المشي لحَد مزرعة سُكَّر، وهناك.. كليرفيوس اشتغَل كعبد لمُدة سنتين، خلال الفترة دي.. البوكور كان بيجبر كليرفيوس على نظام غذائي مُعيَّن مُعتمِد على السُكَّر، ودا خلاه في حالة أشبه بالذهول والانفصال عن الواقِع، كُل اللي بيقدَر يعمله هو إنه بيمشي في المكان وبينفِّذ الأوامر فقط لا غير، لكنه غير قادِر على التفكير أو التصرُّف بطبيعته، بمعني أصح.. ناركيس تحوَّل لزومبي.
بعد سنتين من العبودية في مزرعة السُكَّر، البوكور مات وناركيس قدر يحصل على حُريته، ناس كتير قالوا إن البوكور مات موتة طبيعية، لكن ناس أكتر قالوا إن تم اغتياله من قِبَل واحد من الزومبي العبيد اللي صنعهُم، وبعد 16 سنة.. ناركيس رجع لأسرته مرة تانية، وشاف أخته في السوق المفتوح في لاستير.
طيب.. إيه اللي خلاه بعيد طول الفترة الطويلة دي؟
ناركيس بيقول إن دا بسبب أخوه، لأن أخوه من البداية هو اللي باعه للبوكور، هو اللي رتِّب كل أمور مرض كليرفيوس وتحويله لزومبي بسبب نزاعهم على قطعة أرض، عشان كدا كليرفيوس فضل مُختبئ لفترة طويلة لحَد ما أخوه مات، لكن التفسير دا.. مفيش عليه دليل مادي واحِد، لكن اللي نعرفه كويِّس أوي، إن كليرفيوس عشان يثبِت لأهله هويته الحقيقية.. استعمِل اسم دلع محدش كان يعرفه برا العيلة نهائيًا، دا غير إن العديد من الأطباء والمُختصِّين.. أعلنوا بعد ما أجروا عدد كافي من الفحوصات والتحاليل، إن الشخص اللي واقِف أدامهم دا هو نفس الشخص اللي دفنوه من 18 سنة كاملين.
والحقيقة.. إن ناركيس مش أول شخص في هايتي يقول إنه تعرَّض للتجربة المُخيفة دي، الجزيرة وسُكَّانها الأصليين كُلهم كانوا مُقتنعين تمامًا بقصص الزومبي والموتى اللي بيرجعوا للحياة مرة تانية، والقصص دي كانت هي منبَع كثير من الأفلام، المُسلسلات، والروايات الأمريكية اللي إتكلمت عن الزومبي وحقَّقِت نجاح غير طبيعي.
حكاية ناركيس لفتِّت نظر ويد دافيس، طالب الدراسات العليا في علم الإنسان والأنثروبولوجيا في جامعة هارفارد، اللي سافِر لهايتي عشان يقابِل ناركيس ويسمَع حكايته، وبعدها بدأ دافيس يحاول صُنع ” مسحوق الزومبي ” ودا اللي هو الخليط اللي استخدمه البوكور عشان يحوِّل الناس لزومبي، ووجهة نظره إن الخليط دا كان مصنوع من مجموعة مكوِّنات مُختلِفة، زي مسحوق العظام البشرية، سموم الضفادع، بعض النباتات، والأسماك، والمسحوق دا كان بيدخَّل الضحية في حالة غيبوبة صناعية عشان أهله يعتقدوا إنه مات ويدفنوه، وبعدها بيروح البوكور عشان يخرَّج الضحية ويديه مُضاد الغيبوبة دي، وعشان يحوِّله لزومبي.. كان بيستمِر في إعطاؤه المادة دي لأيام، شهور، وأحيانًا حتى لسنوات.
أما ناركيس.. فعاش بعد الواقعة دي لمُدة 14 سنة كمان، وكان متعوِّد يزور قبره باستمرار، ودي حاجة محدش في العالم قدر يحظى بيها أو يعملها.
اقرأ أيضاً
اختفاء في نهار يوم مشمس بقلم: محمد عصمت بتاع الرعب
عاش يعصمت 🖤 🖤 🖤