لغز وحش فلورنسا:
العالم من حوالينا مليان ألغاز مش محلولة، حاجات مُرعبة بتحصل في كُل مكان في العالم، ألغاز بتعرفك إن البشر مخيفين أكتر من أي مخلوقات مُرعبة تانية.
كُل اللي هعمله إني هاخدك من إيدك وهنروح نتفرج على الألغاز دي واحد واحد، بس خد بالك كويس، إحنا ماشيين في وسط حقل ألغاز.. يلا بينا
وحش فلورنسا كان قاتل سيء السُمعة بسبب النمط اللي كان بيستخدمه في جرايم القتل اللي بيرتكبها، عشان كان دايمًا بيستهدف الأزواج الموجودين بمُفردهم ويقتلهم من مكان قُريّب بمُسدس بيريتا من عيار 22، وبعدها يشوه أعضائهم التناسلية.
القاتل ارتكَب 16 جريمة قتل في الفترة اللي بين سنة 1968 لسنة 1985، تم القبض على أربعة رجال، لكن ولا واحد منهم طلع القاتل، وحتى الآن القاتل مازال مجهول.
بس تعالى كدا نبدأ من الأول …
القاتل المُتسلسل المعروف باسم وحش فلورنسا، ظهر للمرة الأولي في مدينة فلورنسا الإيطالية سنة 1981، جريمته الأولى كانت في 6 يونيو تحديدًا، لمّا لقوا جُثة جيوفاني فوجي اللي عنده 30 سنة وجُثة خطيبته كارميلا دي نيشيو اللي عندها 21 سنة، جنب العربية بتاعتهم في منطقة توسكاني، القاتل أطلق النار علي فوجي ودي نيشيو بمُسدس بيريتا عيار 22، بعدها طعنهم بوحشية بعد موتهم، سَحَب جسد دي نيشيو بعيد عن العربية بحوالي 30 قدم وأزال أجزاء من جسمها بطريقة احترافية جدًا، خلت الشُرطة تُجزم إن القاتل عنده خلفية طبية.
المُحققين شكوا على طول في سائق سيارة إسعاف اسمه انزو سباليتي، اللي كان واقف بعربيته قريّب من مكان الحادث، أثناء التحقيق كان مُرتبك وإجاباته مش واضحة ومُتضاربة، زوجته قالت إنه بلغها بالحادث قبل ما الصُحف تكتب عنه، وبعد التصريح دا الشُرطة مكانش عندها شك، تم القبض عليه واتهامه بارتكاب جريمتين قتل، لكن بعد عدة شهور، تم ارتكاب جريمة قتل تانية، فالشُرطة عرفت إنهم قبضوا على الشخص الخطأ.
المُحققين لقوا نفسهم فجأة عاجزين عن إيجاد أي أدلة جديدة، وبدافع الحيرة والغضب استجوبوا أكتر من 100 ألف شخص، على أمل إيجاد أدلة جديدة، وفي النهاية وصلوا لبيترو باتشيني، المغتصب السابق والقاتل الذي كان تم اعتقاله سنة 1951 لأنه قتل الراجل الذي كان بيخونه مع خطيبته، تم الحُكم عليه بـ 13 سنة، المُحققين قبضوا عليه واتهموه بارتكاب 14 جريمة قتل من أصل 16 تم ارتكابهم من قِبَل وحش فلورنسا، لكن سنة 1996 المحكمة أثبتت إنه برئ بسبب نقص الأدلة.
الشُرطة دلوقتي في حالة يأس، مش قادرين يفكروا أو يطلعوا بأي نظريات جديدة، فقالوا إنهم مُتأكدين إن القاتل هو باتشيني اللي بيقود طائفة دينية شيطانية، وبيعاونه واحد من أصدقائه وبيرتكبوا الجرايم دي عشان يسرقوا الأعضاء التناسلية الخاصة بضحاياهم ويقدموها قربان للشيطان، سنة 1997 قبضوا عليه تاني، بعد ما خرج بسنة، المرة دي حكموا على أصدقائه بالسجن مدى الحياة لارتكابهم جريمة قتل، رغم وجود القليل جداً من الأدلة لدعم هذه الادعاءات، باتشيني مات في السجن سنة 1998 قبل ما يعيدوا محاكمته وصديقه مات بعدها بأربعة سنين.
لكن الشُرطة الإيطالية رفضت الاستسلام، سنة 2004 قبضوا على الصيدلي الإيطالي فرانشيسكو كالاماندري، واتهموه بقيادة الطائفة الشيطانية المسؤولة عن ارتكاب الجرايم دي، ظهر صحفي شهير اسمه ماريو سبيزي وانتقد الشُرطة وتصرفاتها فتم القبض عليه وقالوا إنه شريك فرانشيسكو، بدأوا يبنوا القضية حواليهم، الناس لمّا عرفوا غضبوا واحتجوا وطلعت مُظاهرات بتتهم الشُرطة بإساءة استغلال منصبها، وبالفعل تم إطلاق سراح سبيزي فورًا، وتم اتهام إتنين من الظُباط المسؤولين عن القضية بتهمة إساءة استغلال منصبهم واعتقال سبيزي، سنة 2007 المحكمة قررت تفرج عن فرانشيسكو لأن مفيش أي دليل يربطه بالجرايم دي، ومات بعدها بسنتين في دار مُسنين.
وحتى الآن مازالت هوية وحش فلورنسا سر غامض.
سمعت عن شبح الطريق السريع؟
لأ؟!
خلاص هحكيلك عنه الأسبوع الجاي.
…
اقرأ أيضًا:
