محاكمة طاردو الأرواح .. قصتنا النهارده هتكون من سجلات محكمة غرب لندن – قضية آل إيف – مقتل كينيدي إيف.
واقفين في المحكمة، هيئة المُحلفين باين عليهم التعب، ٧ أفراد واقفين جنب بعض، لو دقَّقت شوية هتشوف إن أغلبهم فيه في جسمه جروح وعلامات عض، القاضي قلع نضارته وبصلهم بصمت لدقيقة قبل ما يسألهم: ” للمرة الأخيرة.. إيه اللي حَصَل وبالتفصيل؟ ”
بصوا لبعض دقيقة قبل ما الأب يقرَّر يتقدِّم خطوة لأدام، أدام القاضي، هيئة المُحلفين، والحضور اللي كان تقريبًا كامِل ودي حاجة نادرة في المحاكم، إتنفِّس بعُمق، وبدأ يتكلِّم: ” الموضوع بدأ في شهر أغسطس ٢٠١٦.. كينيدي إيف، ابني اللطيف بشهادة كُل اللي يعرفوه، بدأ يتصرَّف بشكل غريب جدًا، التصرفات الغير طبيعية اللي كان بيتصرَّفها والعُنف المُبالَغ فيه اللي بقى مسيطَر على حياته كانوا حاجة جديدة عليه، ودا اللي خلانا كُلنا نحاول نفهم إيه سبب التغيُّر الغريب دا في شخصيته! ”
بعد ما خلَّص جُملته سكت، مشاعره غلبته فبص في الأرض، بدأت الزوجة تكمِّل قصته من مكان ما وقف: ” على حسب ما فهمنا من كلامه الملخبَط فكُل حاجة بدأت بألم رهيب في زوره، الألم دا كان مجنِّنُه، مخليه مش قادِر يفكَّر بشكل طبيعي، لدرجة إنه عض والده أكتر من مرة، هدِّد بقطع أعضاء من جسمه باستمرار، كان بيشتكي من وجود تعابين جواه، عايزة تخرُج من زوره عشان تهاجِمنا، في النهاية.. مكُنّاش قادرين نتحمَّل تصرفاته الغريبة أكتر من كدا، فكَّرنا شوية لحَد ما قرَّرنا ناخُد قرار غريب شوية.. ربطناه في سريره بالعافية باستخدام سلك. ”
القاضي لبس نضارته تاني ومسك الورق اللي أدامه، قلِّب فيه شوية قبل ما يسألهم بصوت واضِح: ” دي كانِت فكرة مين؟ وليه عملتوا كدا؟ ”
الأب والأم بصُّوا لواحِد من ولادهم، بالنسبة للقاضي.. دي كانِت إجابة كافية، بص للولد شوية قبل ما يقوله: ” إنت اسمك.. كولين، صح؟ ”
الشاب بلع ريقه وهو بيقول: ” مظبوط حضرتك، أنا كولين، إحنا لجأنا للإيمان، عشان مكانش فيه حل تاني ”
القاضي قاله بحيرة: ” مش فاهم.. مُمكِن توضَّح كلامك ”
الشاب هز راسه وهو بيقول بتردُّد: ” قرَّرنا بعدها إننا نلجأ للإيمان في محاولة لعلاجه، صلينا عليه ودعينا ليه باستمرار خلال الـ ٣ أيام اللي بعد كدا ”
سكت شوية، فالقاضي فكَّره إن السؤال كان ليه شق تاني، بنفاذ صبر كرَّر سؤاله: ” ليه عملتوا كدا؟ ”
كولين قال: ” كان واضِح إن فيه حاجة شريرة جواه، غالبًا يعني كان شيطان، ليه؟ لأن اللي بيحصَل دا مكانش طبيعي أبدًا، مفيش حاجة من اللي كانِت بتحصَل كانِت طبيعية، الشيطان دا كان عايز يقتله، كان لازم نربطه.. لو مكُناش عملنا كدا، كان غالبًا هيؤذي حد فينا ”
القاضي فكَّر شوية قبل ما يقلِّب في ورقه شوية وهو بيقول بصوت عالي للموجودين في المحكمة: ” كينيدي إيف فضل مربوط في سريره لمُدة ٣ أيام مُتتالية بدون اهتمام أو رعاية طبية، بعدها أخوه اتصَل بالطوارئ وقالهم إن أخوه بيعاني من حالة جفاف، وعلى ما يبدو كدا بيعاني من بعض الصعوبات في التنفُّس، لكن بوصول خدمات الطوارئ اكتشفوا شيء مُرعِب! كينيدي كان ميت! ”
بعدها وجّه كلامه تاني لكولين وهو بيقول: ” إنت حاولت تعطَّل الشُرطة أثناء وجودهم في البيت.. صح؟ وليه؟ ”
كولين حاول يدافِع عن نفسه وهو بيقول: ” أثناء وجود الشُرطة في البيت حاولت أصلي على أخويا صلاة جماعية أخيرة القاضي سأله بفضول: ” بس الظابِط المسؤول قال إن إنت كُنت بتردِّد أدعية غريبة وبتصلي صلاة مش مفهومة على أخوك قبل ما يقبضوا عليك ”
كولين بص في الأرض وهو بيقول: ” دي صلاة خاصة بينا، تقليد عائلي ”
القاضي عدل نضارته وهو بيقرأ من ورقة بصوت عالي: ” إنتم أكيد عارفين التُهم الموجَّهة ليكم، بس برضه خليني أقولهم لكم مرة أخيرة، إنتم متوجّه ليكم تُهَم: القتل غير العمد، سجن شخص بدون وجه حق، تسهيل وفاة شخص بالِغ، والسماح بحدوث حالة الوفاة، الطبيب الشرعي قال إن أثناء إجراء التشريح على جُثة كينيدي، لقوا فيها أكتر من ٦٠ جرح، من ضمنهم آثار لعضة قوية، دا غير إصابة والد كينيدي و٤ من إخواته بجروح وعضات بسبب مقاومة كينيدي ليهم ”
كينيث إيف – والد كينيدي – قال بصوت عالي: ” يا فندم.. أنا عايز أقول حاجة أخيرة، في أنا فعلًا استخدمت القوة في التعامُل مع ابني، لكن الموضوع مكانش له أي علاقة بأي طوائف دينية، جماعات سرية، أو تجمُّعات لها علاقة بالسحر أو إن أي حاجة من دول ليها أي علاقة بالوفاة! ”
القاضي هز راسه، كان عارِف وفاهِم ليه الأب قال الكلمتين دول، خصوصًا إن هيئة المُحلفين كانت على وشك النُطق بالحُكم، القاضي بص ليهم وقال: ” هيئة المُحلفين الحاضرة معانا، وصلتوا لحُكم؟ ”
واحد منهم وقف، على ما يبدو دا اللي اختاروه عشان يتكلِّم بالنيابة عنهم جميعًا وقال للقاضي: ” بعد ٤ أيام من المداولات، إحنا شايفين إنهم أبرياء وغير مسؤولين عن الوفاة ”
لكن إيه سبب تصرُّفات كينيدي الغريبة؟ هل هو مرض نفسي من نوعٍ ما؟ ولا فعلًا مس شيطاني؟ هل هو مات بسبب تصرفات أهله؟ ولا الأرواح هي اللي قتلته؟
عدم وجود إجابات للأسئلة دي، كان لازِم يخلِّي جلسة طرد الأرواح الشريرة القاتلة موجودة معانا في حقل الألغاز بتاعنا!
اقرأ أيضاً
