في الأيام اللي فاتت سمعتوا كتير أوي عن مصطلح (فيروس كورونا Coronavirus)، وناس كتير جدًا قتلته كلامًا وبحثًا، بس للأسف كان فيه كتير جدًا من الأخبار المغلوطة، ومنها حاجة مهمة جدًا، هي مصطلح الكورونا نفسه، واللي الناس فاكراه بيرمز للفيروس الجديد اللي بدأ انتشاره من مدينة ووهان Wuhan الصينية.. وكمان حاجة أهم، هي إنه سلالة الفيروس ده مش جديدة زي ما الناس متصورين.. خلونا نحكي أكتر عن الموضوع ده، ونصحح مفاهيم غلط منتشرة..
أول حاجة مصطلح فيروس كورونا Coronavirus مش هو الاسم بتاع الفيروس الجديد.. لأ هو في الواقع اسم سلالة كاملة من الفيروسات اللي بتسبب في طبيعتها أعراض بتتراوح بين أعراض البرد العادي، وأعراض أكثر خطورة زي مثلًا الالتهاب الرئوي والفشل الكلوي والوفاة في بعض الحالات.
الفيروسات دي في الطبيعي بيتم تسميتها الـ Coronaviruses أو اختصارًا CoVs وأول وصف ليها كان في الستينات، وهو اللي ادالها اسمها الشهير.. وده بسبب شكل مميز شبه التاج (Crown أو Corona) من البروتينات السكرية Sugary Proteins، اللي بتغلف الجزيء الخاص بالفيروس، واللي بيحتوي على أكبر جينوم Genome موجود في أي فيروس معروف مكون من الـ RNA (جزيء حيوي شبيه بتكوين الـ DNA، وموجود في كل الكائنات الحية).. الفيروس ده بيحتوي على شريط طويل من الحمض النووي أكبر من مثيله في أي فيروس RNA تاني معروف.. طبعًا دي مصطلحات طبية كتير ممكن يفهمها الناس المتخصصين في الطب الدوائي أكثر، لكن إحنا هنا بنتكلم عنها باختصار.
ده غير كمان إن فيروسات كورونا دي تعتبر حاجة اسمها (حيوانية المنشأ Zoonotic)، بمعنى إنها بتنتقل بين الحيوانات والبشر..
طيب، خلونا نفهم أكتر..
فيه أربع أنواع معروفة من سلالة الفيروسات دي.. ألفا كورونا Alphacoronavirus، وبيتا كورونا Betacoronavirus وجاما كورونا Gammacoronavirus ودلتا كورونا Deltacoronavirus.. أول اتنين اللي هما ألفا وبيتا بينتقلوا فقط بين الثدييات.. بما فيهم طبعًا البشر والحيوانات زي القطط والخنازير والخفافيش.
جاما كورونا بينتقل للدواجن فقط، بينما دلتا كورونا بينتقل بين الطيور والثدييات مع بعض، وهو أكثرهم خطورة وعدوى.
طيب حلو أوي.. الأعراض إيه بقى؟ خلوني أقولكم باختصار..
الأعراض الشائعة للفيروسات دي، هي نفس أعراض البرد الطبيعي Common Cold، أو الإنفلونزا العادية Flu.. أعراض جهاز تنفسي كلها يعني.. بما فيها الحمى والسعال، وضيق التنفس.. وفي الحالات الأكثر شدة وخطورة الأعراض دي بتتطور للالتهاب الرئوي، ومتلازمة الجهاز التنفسي الحادة اللي بيسموها Severe Acute Respiratory Syndrome، وبتبقى عامل مميز للفيروسات اللي بتضرب الجهاز التنفسي.. ده كمان باللإضافة للفشل الكلوي.. وفي بعض الحالات الخطورة بتوصل لحد الموت..
واللي مش كتير يعرفوه بقى إن فيروسات كورونا مش أول مرة تنتشر في العالم.. لأ في الواقع القصة ابتدت قبل 2020 بكتير.. تحديدًا سنة 2003، لما انتشرت عدوى (سارس SARS)، واللي كانت سلالة مميزة من فيروس الكورونا اسمها التفصيلي هو (SARS-CoV) نسبة لكونها جزء من عائلة الكورونا CoV، وبدأت في محافظة (جوانجدونج Guangdong) سنة 2002، وانتشرت منها بصورة واسعة لحوالي 26 دولة.. وسببت أكثر من 8000 عدوى، منهم حوالي 800 حالة انتهت بالموت..
كمان سنة 2012، انتشرت عدوى اسمها (متلازمة الشرق الأوسط التنفسية Middle East Respiratory Syndrome) أو اختصارًا (MERS).. دي كانت عدوى بدأت في المملكة العربية السعودية، وكانت بتسبب أعراض بردو قريبة من البرد والإنفلونزا، وكمان أعراض شديدة على الجهاز الهضمي زي الإسهال مثلًا.. العدوى دي حسب تقرير منظمة الصحة العالمية WHO أصابت أكثر من 2500 شخص في 27 دولة، وكانت سبب في وفاة ما يقارب الـ 860 شخص.. قارنوا أنتم النسبة بين معدل الإصابة والوفاة في العدوى الأولانية اللي كانت سنة 2003، والعدوى التانية اللي أصابت الشرق الأوسط سنة 2012.. هتلاقوا إن سنة 2012 كانت سنة مخيفة فعلًا.
الكلام ده موجه للناس اللي رابطين بين اللي حصل في الصين وبين الفيروس.. عشان مش عارف إيه بيحاربوا الإسلام وبيقتلوا المسلمين.. العلم مالوش علاقة بالممارسات الدينية، وقلنا ألف مرة بلاش خلط بين الاتنين عشان منضحكش الناس علينا.. والدليل إن نفس العدوى أصابت الشرق الأوسط نفسه، وأصابت بلد الحرمين الشريفين.. يعني الموضوع مالوش علاقة بالدين ولا بالعرق ولا الجنس.. لازم تبقوا فاهمين ده كويس.. الموضوع له علاقة أكثر بثقافة الدولة ونوع الحيوانات اللي فيها واللي بياكلها الناس هناك.. وده مجرد واحد من ضمن أسباب كتير جدًا مالهاش مجال دلوقتي، ولكن كلها مرتبطة بالتطور والطفرات Mutations اللي بتحصل في سلالات الفيروسات دي كل فترة، عشان تساعدها على التكيف والانتقال بين الحيوانات والبشر بصورة أكثر كفاءة.
طب سؤال بقى.. هل المفروض نكون قلقانين؟
الحقيقة وعلى عكس اللي كتير ممكن يكونوا فاهمينه، لأ.. إحنا مش محتاجين نقلق للدرجة المنتشرة بين الناس دي.. أيوه الفيروس خطير فعلًا المرة دي، وتجاوزت عدد حالات الإصابة به أكثر من 24 ألف حالة لحد دلوقتي، منهم 420 ماتوا بالفعل.. بس ده بسبب كوننا غير متحضرين للانتشار السريع المرة دي للفيروس، اللي بينتقل بطريقة وصورة أكثر كفاءة من كل اللي فات.. بس الحالات دي كلها تقريبًا داخل الصين، وداخل المناطق المتأثرة بالعدوى.. لسه الفيروس لم ينتشر بصورة واسعة في العالم، ولا يبدو عليه إنه هينتشر بطريقة تشكل خطورة على الجنس البشري إطلاقًا..
هو آه مالوش علاج لسه، بعكس الإشاعات اللي طالعة وبتقول إنهم لقوا له علاج.. الحقيقة إن لسه بدري شوية على العلاج –والأهم- اللقاح.. بس الجهودات العالمية شغالة في الاتجاه ده.
معدل الوفيات نفسه قليل، ومعظم حالات الوفاة بتحصل في المصابين الكبار في السن اللي جهازهم المناعي ابتدى يضعف، أو في الأطفال حديثي الولادة أو اللي سنهم لسه صغير، مسمحش بتطور مناعتهم للحد الكافي.. كتير جدًا من المرضى حالاتهم اتحسنت بدون أي علاج.. زي نزلات البرد بالظبط، بس ده مش معناه إن الخطر زال.. لأ لسه الخطر حقيقي وملموس، هو بس بعيد جدًا عننا حاليًا، بطريقة المفروض متشغلش حياتنا اليومية إطلاقًا.
لكن بالنسبة للصين والدول المجاورة، فالوضع مرعب جدًا.. العدوى انتشرت بين أكتر من 24 ألف شخص في حوالي 15 يوم!! ولو مش متخيلين حجم الرقم إيه، يكفي إني أقولكم أكبر من عدد الإصابات بعدوى SARS سنة 2003، وعدوى MERS سنة 2012 مجتمعين.. أكبر من ضعفهم كمان!! وده في 15 يوم!!
حاليًا الحكومة الصينية فرضت حجر صحي على المناطق المتأثرة بالعدوى، واللي في معظمها تقع داخل محافظة (هوبي Hubei)، والناس بيتطلب منها بشكل رسمي ارتداء الكمامات الواقية في الأماكن العامة.. مدينة (ووهان Wuhan) اللي بدأ منها الفيروس أصبحت شبه خالية تمامًا من السكان، ومنظرها بقى مرعب فعلًا كإنها مدينة أشباح.. ده غير إن الخطوط الجوية الصينية ألغت جميع رحلاتها الخارجة من الصين في الأماكن اللي انتشرت فيها العدوى إلى أجل غير مسمى.
شوفوا الصور تحت هنا عشان تلاقوا رسومات تفصيلية لمعدل انتشار العدوى، وكمان الأماكن المتأثرة به في الصين..
ده غير إن الفيروس انتشر في كذا دولة في العالم، هتلاقوهم ومعاهم عدد الحالات في كل دولة، في الصورة هنا
طب نحمي نفسنا إزاي من الفيروس؟ الموضوع بسيط جدًا، خلوني أقولهولكم على خمس خطوات:
1- اغسلوا إيديكم كويس جدًا بالمية والصابون، ويفضل بديتول أو أي منظف يحتوي على كحول.
2- غطوا الأنف والفم كويس جدًا بمنديل لما تيجوا تعطسوا، ويفضل تلبسوا كمامة في الأماكن العامة.
3- ابتعدوا تمامًا عن التلامس المباشر مع أي شخص مريض يظهر عليه علامات البرد أو الإنفلونزا، على الأقل الفترة دي.
4- اطبخوا اللحوم والبيض كويس جدًا، وبلاش أكل نيّ، بلاش سوشي الفترة دي.
5- أهم حاجة إنكم تبتعدوا تمامًا عن التعامل مع أي حيوانات ضالة، أو حيوانات المزارع، عشان هي أهم ناقل للعدوى، بجانب السوائل الجسدية للمصاب.
طيب لو حسيتوا إن فيه شخص مصاب، أو اشتبهتوا في الإصابة.. تعملوا إيه؟
أول حاجة، اعزلوا المريض ده مؤقتًا في أوضة لوحده، وخلوه ميتحركش كتير.
تاني حاجة، حاولوا تلبسوا ملابس واقية قبل التعامل معاه أو مع أي حاجة لمسها أو استعملها.. البسوا قفازات طبية مثلًا، وكمامات وما إلى ذلك.
تالت حاجة، اغسلوا إيديكم كويس جدًا، ويفضل بديتول.
رابع حاجة، تواصلوا مع دكتور متخصص أو مستشفى، وانقلوا الحالة ليها.
وبلاش مضادات حيوية عمال على بطال يا جماعة.. أرجوكم كفاية مضادات حيوية.. أديكم شايفين العالم حاصل فيه إيه بسبب تطورات وطفرات الفيروسات والأمراض البكتيرية.. كل واحد فيكم له دور إنه يوقف ده، فمتتجهلوش كلامي، أو تتعاملوا معاه باستهتار.. الخطر حقيقي وموجود..
كلموا صحابكم وأسرتكم عن الفيروس وعن طرق الوقاية منه.. متنسوش إن كل واحد وواحدة فيكم ليه دور لو الفيروس ده لا قدر الله انتشر في مصر أو أي دولة عربية بسبب ضعف الخدمات الصحية مقارنة بأوروبا والصين.
ربنا يحفظكم.
