مزرعة الحمير.. مبدئيا أنا أبدي تعاطفي مع أي حمار كله أو هياكله أسد في يوم من الأيام، لكن كمدير مستقبلي لجنينة الحيوانات فمطلوب مني أوفر الحمير اللي هتاكلها الأسود والنمور والحيوانات والطيور المفترسة، زي ما مطلوب مني أوفر البرسيم للحمير اللي في الجنينة، ناهيك بقى عن إن فيه أزمة كبيرة في موضوع الحمير ده، ناتجة إن حسب فهمي فيه طلب على جلود الحمير علشان تتصدر بره وتدخل في الصناعات الجلدية، لكن محدش يقدر يجزم لحمة الحمار اللي بيتاخد جلده ده بتروح فين.
فأنا بقى عايز أضرب كام عصفور بحجر، أوفر الحمير لوحوش الجنينة، وجلود الحمير للصناعات الجلدية، واطمن إن لحمة الحمير ما رحتش حته مش المفروض تروحها، علشان كده من المشاريع اللي هخلي بيت الخبرة المتخصص يدرسها إمكانية إن يبقى فيه مزرعة حمير تتبع الجنينة، ومش شرط تبقى في نفس المكان، بحيث تغطي احتياجات وحوش الجنينة من الحمير.
مزرعة الحمير
لكن أعتقد الموضوع لو على أد الجنينة ووحوشها بس مش هيبقى اقتصادي، فأنا عايز بقى أعمل الآتى، أشوف الحد الأدنى من الإنتاجية الاقتصادية للمزرعة أد إيه من الحمير، بحيث أغطي احتياجات الجنينة وجناين الحيوانات اللي موجودة في مصر بالكام سيرك اللي فيهم حيوانات متوحشة كمان.
ولو لسه ده مش هيبقى اقتصادي أدرس إيه الصناعات اللي بيدخل فيها لحم وشحوم الحمير وأشوف المصانع بتاعتها وممكن أوردلها إزاي، وكمان ممكن أعمل مصنع تعليب صغير للحمة الحمير وأصدرها لجناين الحيوانات وسيركات المنطقة ولأوروبا وأمريكا وغيرها لو احتجت، بحيث في النهاية المزرعة تغطي احتياجات جناين الحيوانات والسيركات في مصر وجزء من براها لو أمكن، وبعدين يبقى مُلحق بيها وبمصنع التعليب مدبغة تدبغ جلود الحمير، من ناحية أغطي جزء من حاجة السوق المحلية من جلود الحمير لو السوق المحلية بتحتاجها، أو لو هتتصدر تتصدر نص مصنعة بدل ما تتصدر خام، ويا سلام لو فيه خطة مستقبلية بقى لعمل مصنع منتجات جلدية.
تصدير الحمير
طبعًا كل ده هيقلل لحمة الحمير اللي محدش يعرف بتروح فين، ومفيش مانع لو فيه فايض من الحمير يتباع للفلاحين اللي بيحتاجوا الحمير في قضاء مصالحهم، وإن كان الموتوسيكلات الصيني في الأرياف لغت الاعتماد عليهم، خصوصًا مع ارتفاع سعر الحمير نتيجة الإقبال عليها لتصدير جلودها وأشياء أخرى، وبالتبعية نساهم في تخفيض أسعارها ونعيد استخدامها بدل المكن اللي بيلوث البيئة في الريف.
