فكرت عمرك مهما بلغ خيالك في إن ممكن حد يوصل لتصميم عربية بتتزرع زيها زي الرز والقمح؟! في مقال النهارده خليني أعرض عليك مثال من العربية اللي عرضتها مرسيدس في مؤتمر لوس أنجيلوس لتصميمات السيارات Los Angeles Car Design Conferance لسنة ٢٠١٠؛ يعني من حوالي أكتر من ٩ سنين ونص.
العربية اللي احنا هنتكلم عنها اسمها مرسيدس بايوم Mercedes BIOME. وهي عبارة عن تصميم مستقبلي افتراضي Tech Concept، مش متاحة تجاريًا لسه. والمميز فيها إنها ما بتتصنعش من المعادن، لأ هي بتنمو أو بتتزرع في معمل، من مواد عضوية و حمض نووي معدل جينيًا!
أيوه، إنتوا قريتوا الكلام صح.. العربية بتنمو وبتتزرع زيها زي ورق الشجر والأغصان، في معمل تخليق، من مواد عضوية و حمض نووي DNA مصنع بطريقة معدلة جينيًا! طب ازاي ؟ هقولكوا..
العربية في الواقع زي ما انتوا شايفين في الصور، في الأساس بتتكون من حاجتين رئيسيتين؛ الحاجتين دول هما البذرتين، اللي شاسيه العربية نفسه بينمو منهم زي أغصان الشجر، البذرتين دول هما علامتين المرسيدس! اللي هما النجمة اللي ورا والنجمة اللي قدام بمعنى أصح.. مش مصدقين؟ طب خدوا الأغرب..
النجمتين دول في الواقع بيتحطوا ف معمل، وتحت ظروف معينة، بينمو منهم ألياف صناعية فائقة القوة والخفة، اسمها (ألياف حيوية BioFibers).. الألياف الحيوية دي أخف من الحديد والبلاستيك، وفي نفس الوقت أقوى من الصلب، بحيث إن العربية الناتجة وزنها بيكون حوالي ٣٩٤ كيلوجرام! تخيلوا انتوا بقى..
انبهرتوا؟ طب خدوا الأغرب.. العربية ما بتستهلكش وقود بترولي.. لأي هي بتشتغل بوقود عضوى صديق للبيئة، اسمه BioNectar4534، بيبقى متخزن جوه الألياف العضوية اللي بيتشكل منها شاسيه العربية نفسه.. يعني هي مالهاش تانك أو خزان وقود.. لأ الوقود متخزن جوه الشاسيه نفسه، وبيزود العربية بالطاقة اللازمة زي البنزين بالظبط، وكمان الناتج من استهلاكه هو غاز أكسجين! مش ثاني أكسيد كربون زي الوقود العادي.. يعني العربية في الواقع كل ما بتستهلكها كل ما بتنتج أكسجين، وتصلح البيئة!
العربية بيتم إنتاجها بناءًا على طلب المستهلكين، وإضافة أي خصائص لونية أو شكلية هما عايزينها، جوه ال DNA نفسه اللي بتتكون منه علامتين النجمة بتوع مرسيدس، وبعدين بيتم تنميته بالظبط زي عملية زرع النباتات، على فترة طويلة، لحد ما الناتج بيبقى عربية كاملة هي اللي انتوا شايفينها في الصور دي.. وكمان العربية عند انتهاء عمرها، بتكون صديقة للبيئة، يعني ممكن تتساب وتتحلل وتعود للطبيعة زيها زي أغصان الشجر، أو ممكن تتاخد ويتصنع منها حاجات تانية لزراعة عربيات تانية..
تخيلوا لما تكون مرسيدس وصلت لتكنولوجيا إنها بتزرع عربيات حرفيًا، وإحنا لسه عايشين بناكل فول وطعمية..
شكرًا..
