الإنترنت دلوقتي بقى جزء لا يتجزأ من حياتنا اليومية.. احنا بنقعد على الإنترنت دلوقتي أكثر ما بنقعد مع عائلتنا أو حتى مع نفسنا.. لأن الإنترنت يعتبر هو مصدر المعلومات والترفيه الأهم والأعظم على مستوى الكوكب دلوقتي.. ولأن الوقت من ذهب والإنترنت بيأكل وقت كبير مننا، فكان لازم إننا ندور على بعض الأسرار اللي هتوفر علينا الوقت والمجهود أثناء استخدمنا لشبكة المعلومات.
وطبعا اسم شركة جوجل العملاقة أصبح مرادف أو على الأقل موازي لمصطلح الإنترنت.. ماينفعش نقول اسم إنترنت من غير ما نفتكر على طول اليوتيوب ومحرك بحث جوجل.. وعلشان جوجل شركة عملاقة ومتفردة صنعت لينا بعض الأدوات اللي هتسهل علينا تصفحنا في الإنترنت..
فالنها ردة هنتكلم عن مجموعة أدوات واستخدامات من جوجل تعتبر فعلا أسرار ملكية عظيمة هتخلي الإنترنت أسهل وأفضل كثير في تعاملتنا بعد كده. وهحط اسم كل أداة وازاي تشتغل عليها مباشرة من خلال المقال ده فيلا بينا.
لو مقرأتش الجزء الأول من المقال اللي بنشرح فيه عدد كبير من أدوات جوجل المفيدة تقدر توصله من (هنا)
- Grammarly for Chrome:
أداة من أهم الأدوات اللي ريحتني جدا على المستوي الشخصي خلال تصفحي للإنترنت.. فائدة الأداة دي انها بتعملك تصحيح نحوي ولغوي لأي كتابة بتمارسها باللغة الإنجليزية في أي موقع أو صفحات السوشيال ميديا.
وطبعا الأمر ده لا غنى عنه لأي حد اللغة الإنجليزية مش لغته الأم.. دلوقي هتقدر بكل سهولة تكتشف أخطاءك عن طريق الأداة الممتازة دي.. وكمان هتبقى طريقة جديدة تتعلم منها الكتابة الصحيحة للغة الإنجليزية أنا استفدت منها كثير بصراحة ولازم تبقى الأداة دي عند كل الناس..
أول لما تخش على اللينك بتاع الأداة هيطلب منك إنك تقوم بتسجيل حسابك وسهل جدا إنك تسجل بحساب جوجل بتاعك والأداة مجانية تماما وفي نسخة منها بمقابل مادي بس أنا معتقدتش إني محتاجها لغاية دلوقتي مستريح جدا بالنسخة المجانية منها.
- Save to Pocket:
أداة مفيدة لمتصفحي المواقع والباحثين عن المعلومات.. تقدر بالأداة دي انك تحفظ أي موقع أو مقالات وفي أي جهاز تقعد عليه والأداة دي بتحفظهم لك ومش بس كده إنت ممكن كمان تقرأهم وانت أوفلاين بدون الاتصال بالإنترنت.. وتقدر تكبر خط المقال وتصغره براحتك وكمان تقدر تغير خلفيتهم زي ما انت عايز.
- Google Mail Checker:
أداة مريحة أوي للناس اللي بتستخدم أكثر من إيميل زي حالاتي.. سواء إذا كان إيميل شخصي أو ميل خاص بالشغل الأداة دي هتخليك تجمع مابين الاثنين بسهولة.. كل الرسائل اللي هتجيلك على أي إيميل منهم هتظهرلك نوتفيكيشن أو إشعار بيها في لحظة واحده.. وكمان هتفكرك بالإيميلات اللي انت مفتحتهاش علشان تفتكرها وتطلع عليها بضغطه واحده.. أداه مهمة ومريحة جدا لازم الكل يثبتها فورا.
- Google Publisher Toolbar:
أداة من أهم الأدوات للناس اللي بتدور على الربح من الانترنت وبتستخدم جوجل ادسنس.. لأن الأداة دي بتديلك تقرير عن كل إعلان بيظهر على موقعك أو المدونة أو الصفحة بتاعتك.. وكمان لو لقيت إعلان مش مناسب لتوجه الموقع بتاعك تقدر بكل سهولة تعمله حظر وتبلغ جوجل متحطلكش النوعية دي من الإعلانات عندك تاني.. أداة عظيمة جدا ومهمة لكل الناس اللي بتحقق أرباح عن طريق جوجل.
- Magic Actions for YouTube:
أداة جميلة جدا لكل متصفحي اليوتيوب وأصحاب المحتوى عليه.. تقدر طبعا تتصفح الفيديوهات بطريقة سهلة جدا ومبوبة وتقدر تخصص إن فيديوهاتك تظهر بجودة hd أو جوده عاديه علشان تناسب باقات الإنترنت الغلبانة بتاعتنا وتقدر كمان تغير خلفية القناة بتاعتك وتقدر تعلي أو تخفض الصوت زي ما انت عايز عن طريق ضغطه الموس بكل سهولة أثناء تشغيل الفيديو وفي خاصية التشغيل الليلي لرؤيه أحسن خلال الظلام وغيره وغيره من الاختيارات الرائعة اللي هتخلي تصفحك للفيديوهات أسهل وأمتع بكثير من التجربة العادية
وبالنهاية أتمنى تكونوا استفدتم من المقال وتحملوا الأدوات المجانية دي اللي هتخلي الإنترنت أفضل وأسهل بكثير بعد كده.
