لغز المستعمرة المفقودة بقلم: محمد عصمت بتاع الرعب

من حوالي أكتر من 450 سنة تقريبًا، الأوروبيين كانوا عايزين يقيموا مُستعمرات في العالم الجديد، بالنسبة ليهم.. العالم الجديد كان هو اللي إحنا نعرفه في الوقت الحالي بأمريكا الشمالية وأمريكا الجنوبية.

السير والتر رالي، مُغامر إنجليزي، أرسَل مجموعة من الرجال عشان يستكشفوا العالم الجديد، بعثة استكشافية قرَّرِت إنها تُنشِأ مُستعمرة في جزيرة رونوك، على ساحل كارولينا الشمالية

سنة 1586، بعد تحمُّل مصاعب الشتاء القاسية، قلة الطعام، والاختلافات اللي حَصَلت مع السُكَّان الأصليين، اللي نجوا من المُستعمرة دي رجعوا إنجلترا مرة تانية مع السير فرانسيس دريك، بعدها.. السير رالي قرَّر يُرسِل مجموعة تانية من المُستعمرين.

يوم 26 أبريل 1587، أسطول صُغيَّر أبحَر من إنجلترا على أمل إقامة أول مستوطنة إنجليزية دائمة في العالم الجديد..

المجموعة الثانية من المُستعمرين كانت مُختلِفة تمامًا عن المجموعة الأولى، لأنها مكانتش بتحتوي بس على الرجال، لأ.. كانت كمان بتحتوي على نساء وأطفال، وكانت النوايا إنها تتحوَّل لمُستعمرة دائمة، الأسطول الصُغيَّر دا كان بيتكوَّن من السفينة ليون (ودا قارب سريع قادر على المناورة في المياه الضحلة) وبيناس (وهي سفينة شراعية صُغيَّرة لحمل الإمدادات).

السُفن دي كان على مُتنها أكتر من 150 شخص من الرجال، النساء، والأطفال، دا غير إن كان على متنها اتنين من السُكَّان الأصليين وهُمَّا مانتيو، ووانشيز، ودول كانوا مع أعضاء المُستعمرة الأولى لمَّا رجعوا، ودلوقتي كانوا راجعين بيوتهم مرة تانية. القُبطان كان السيد سيمون فيرناندو، أسباني الجنسية، وكان معاهم حاكِم المُستعمرة الجديدة السيد جون وايت، وطبعًا السيد وايت كان مُصطحِب معاه بنته إليانور، وزوجها أنانياس دير، الرحلة المرة دي استغرقت أكتر من الست أسابيع المُعتادة، لكن في النهاية الأسطول وصل لشاطئ جزيرة رونوك يوم 22 يوليو..

بمُجرَّد وصول المُستعمرين بدأوا في تصليح البيوت القديمة الموجودة وبناء بيوت جديدة، إليانور ولدت بنتها يوم 18 أغسطس وسمتها فرجينيا، فيرجينيا دير كانت أول مولودة إنجليزية تتولَد في العالم الجديد.

المُستعمرين كانوا بيتوسلوا للحاكِم، السيد وايت إنه يسافر إنجلترا عشان يجيب لهم إمدادات، كان رافض يسيب المُستعمرة في البداية، لكن في النهاية اضطر يوافق.

يوم 27 أغسطس، وبعد 9 أيام بس من ولادة حفيدته، أبحر ناحية إنجلترا وفي نيته إنه يجيب الإمدادات وشوية مُستعمرين زيادة ويرجع للجزيرة في أسرع وقت مُمكِن..

على أي حال، خططه مامشتش زي ما هو عايز، بمُجرَّد عودة السيد وايت لإنجلترا، هاجم الملك فيليب الثاني وأسطوله الإنجليز، وبسبب الهجوم دا وعدة أسباب تانية، السيد وايت مقدرش يرجع لجزيرة رونوك إلا بعد حوالي 3 سنين.

في النهاية وصل لجزيرة رونوك يوم 18 أغسطس 1590، يوم عيد ميلاد حفيدته الثالث، لكن المُستعمرة كانت مهجورة، إيه اللي حصل؟!

الدليل الوحيد اللي قدر يلاقيه كان دفتر السجلات بتاع الحاكِم، ولقى الحروف (CRO) منحوتة على شجرة بالقُرب من المياه، المستوطنة كانت مُحاطة بسور عالي وقاسي عشان يحميها، على الناحية اليمين من البوابة كانت منحوتة كاملة (CROATOAN)، مكانش فيه أي علامات استغاثة أو طلب نجدة في أي مكان!

وايت واللي معاه دوروا في كُل مكان، لكنهم ملقوش أي أثر على المُستعمرة، وايت كان عنده أمل يلاقي المستوطنين بأمان مع مانتيو وقبيلته اللي كان اسمها محفور ناحية اليمين من البوابة، لكنهم للأسف كانوا اختفوا بدون ما يسيبوا أي أثر!

طيب إيه اللي حصل للمستوطنين المفقودين؟

محدش عارف حل اللغز دا، وزيه زي أي لُغز في الدنيا، لمَّا الناس بيعجزوا إنهم يلاقوا الإجابة، بتظهَر الأساطير عشان تشرح اللي حَصَل وتقدم لنا الحل، واحدة من أشهر أساطير كارولينا الشمالية ظهرت في الوقت دا عشان تشرح اللي حصل لفيرجينيا دير والظبية البيضاء..

سنة 1901، سالي ساوثهول كوتن كتبت كتاب عن الظبية البيضاء ومصير فيرجينا دير، مجموعة من القصايد الطويلة اللي بتحاول تكتشف حل اللغز، طبقًا لقصايد السيدة كوتن وللأسطورة الشهيرة ففيرجينيا دير كبرت وسط القبيلة اللطيفة الخاصة بالسيد مانتيو وغيرت اسمها لوينونا سكا، كانت بنت جميلة ولطيفة وكُل الناس بتحبها، لحَد ما قابلت أوكيسكو الهندي الوسيم اللي حبها وكان عايز يتجوزها، لكن وقف في طريقه شيكو.. الساحر الهندي الشرير اللي كانت وينونا عاجباه وكان بيغير عليها جدًا ونفسه يكسب ودها، لكن وينونا رفضت شيكو، ودا أثار غضبه ودفعه لاستخدام سحره الشرير عليها عشان يحولها لظبية بيضاء.

ولحَد النهاردة ناس كتير جدًا بتبلَّغ عن مُشاهدات لشبح ظبية بيضاء بالقُرب من مكان المُستعمرة المفقودة في جزيرة رونوك، فهل دا معناه إن الأسطورة صحيحة؟ وإن هو دا حل اللغز؟

مش عارف، الحقيقة مازالت مجهولة وغير معروفة لحَد النهاردة، لكن الطريقة اللي الشعوب بتلجأ فيها لاستخدام الأساطير لحل الألغاز الغير مفهومة مُثيرة جدًا، خصوصًا أسطورة الظبية البيضاء اللي حاولوا يحلوا بيها لغز المُستعمرة المفقودة!