مبسوطين؟ تعالوا أنكد عليكم شوية وأوريكم العلماء الإسرائيليين بيعملوا إيه واحنا قاعدين بنتخانق على إننا نترحم على مبارك ولا لا، ومجدي يعقوب هيخش الجنة ولا النار…
من زمان أوي، من أكتر من ٣٥٠ سنة، وعلم الفيزياء النظرية الكلاسيكية وفيزياء الكم كمان لما جت بعدها، فيهم مشكلة قديمة جدًا محدش عارف يحلها.. مشكلة اسمها معضلة الأجسام الثلاثة لنيوتن Newton’s three-body problem.
قبل أي حاجة، خلوني بس أقولكم قوانين نيوتن التلاتة في الفيزياء الكلاسيكية:
القانون الأول: هو (الأجسام تظل في حالة من الجمود أو السكون، حتى يتم التأثير عليها بقوة خارجية).
القانون الثاني: هو (العلاقة بين التسارع Acceleration والقوة المؤثرة Force، هي أن القوة تساوي حاصل ضرب التسارع في الكتلة F=ma).
القانون الثالث: هو (لكل فعل رد فعل مساوي له في القوة ومضاد له في الاتجاه).
تمام لحد كده؟ تمام
نيوتن للأسف وجد مشكلة في تطبيق القواعد التلاتة دول على الأجسام التلاتة الأصلية Original Three Bodies اللي هما الشمس والقمر والأرض.. القوانين دي مكانتش شغالة عليهم بشكل دقيق.. وبعدها مع الوقت، دي أصبحت مشكلة عامة على أي نظام جذبوي يحوي ٣ أجسام مع بعض بيسافروا ف الفضاء..
المعضلة باختصار بتعرض المشكلة اللي بتحصل لما بنحاول نحدد طريقة حركة ٣ أجرام سماوية مع بعض، زي كواكب مثلًا أو نجوم، في نقطة زمنية معينة، مع العلم بإن مفيش أي قوة خارجية مؤثرة عليهم غير قوة جاذبيتهم فقط.. لما بنحاول نعمل ده بتحصل مشكلة، والحسابات بتطلع نتائج غير حقيقية أو منطقية.. لازم عشان تتحل نفترض إن واحد من الأجسام دي كتلته لا نهائية، أو إن جسمين منهم مبيتحركوش تمامًا أو Motionless.
المشكلة دي طول ال ٣٥٠ سنة اللي فاتوا دول كانت مالهاش حل معروف.. كلها مجرد حالات خاصة زي الحالتين اللي شفتهم فوق، أو مجرد فرضيات أو محاكات Simulations على برامج كمبيوتر بتحاول إنها تكسر اللغز بلا توفيق يذكر.. وده للأسف لإن إيجاد طريقة محددة لحل المشكلة دي هو شيء مراوغ Elusive جدًا.. لإن النظام الثلاثي ده بيبقى فوضوي جدًا وغير ممكن التنبؤ به رياضيًا والتأكد منه بشكل مثالي.
ده لحد ما جه علماء من جامعة القدس العبرية في إسرائيل، بقيادة عالم اسمه نيكولاس ستون Nicholas Stone (هتلاقوا صورته في تاني كومنت تحت)، وقالوا إنهم لقوا طريقة حسابية أو معادلة معينة بشكل أبسط، بتخليهم يقدروا يحلوا المشكلة دي في حالات كتيرة جدًا، ويتنبأوا بطريقة حركة الأجسام الثلاثة بشكل دقيق أكثر من أجهزة الكمبيوتر كمان.. خلوني أقولكم الحل البسيط هو عبارة عن إيه…
الحل بتاعهم في الواقع بيقول إن في الأنظمة الجذبوية الثلاثية الغير منتظمة أو متوازنة Unstable، اللي بيحصل إن واحد من الأجسام الثلاثة بيتم طرده في النهاية من الثلاثية.. وبيتحول النظام بعد كده لنظام ثنائي Binary System ثابت ومنتظم ومتوازن..
شفتوا الحل -في معظم السيناريوهات مش كلها طبعًا- سهل إزاي؟
بصوا حتى العالم نيكولاس ستون بيقول إيه عن حلهم الثوري ده:
“When we compared our predictions to computer-generated models of their actual movements, we found a high degree of accuracy,” says astrophysicist Nicholas Stone, from the Hebrew University of Jerusalem.
“حينما قارننا تنبؤاتنا الرياضية بمثيلاتها المصنوعة بواسطة برامج المحاكاة على أجهزة الكمبيوتر، وجدنا درجة عالية من الدقة”.
بص.. شوف.. إسرائيل بتعمل إيه!
عايز أقولك كمان إنهم وصلوا لفرضيتهم دي باستعمال افتراض مهم في علم الاحتمالات، اسمه ال Ergodicity.. مش عارف ترجمته للعربية إيه بالظبط، لكن هو بيعمل على حساب المتوسطات Averages عشان يقدر يحدد إيه اللي ممكن يحصل في النظام الجذبوي الثلاثي ده.
طبعًا، البحث العظيم ده تم نشره في مجلة Nature، وتم تقديم أكثر من ورقة بحثية عنه، وهو عمل ثورة محببة في علم الفيزياء النظرية وميكانيكا الكم.. لإن لأول مرة قدرنا نوصل لحل منطقي لمشكلة فيزيائية قديمة زي دي، ونقرب جدًا من حل مطلق ليها.. وكل ده بفضل علماء من جامعة إسرائيلية..
كل ده وإحنا قاعدين بنتخانق مع بعض على مبارك اللي له ما له وعليه ما عليه، ومحمد رمضان ومطربي الأغاني الشعبية اللي بيقدموا فن، وطبعًا متنساش مجدي يعقوب اللي هيروح النار.
عارفين لو الدول العربية بما فيهم مصر حاليًا اختفت من على وجه البسيطة، العالم مش هيتأثر أوي لإن مالناش تأثير حقيقي في العلم البشري، ولا لينا أهمية في تقدمه أو تأخره.. لكن لو إسرائيل تلاشت من على وجه الأرض، ف العلم والتقدم التكنولوجي البشري هيتأثر وهيتأخر جدًا.. ودي حقيقة مهما ضايقتكم أو جت على الجرح.. وماليش أي مصلحة في إني أقول كده غير إني أصدمكم بالواقع بره دايرة حياتنا ومجتمعنا المتأخر جدًا بمقاييس التقدم والتطور التكنولوجي العالمي.
يمكن الناس تفوق، أو الدولة تعمل حاجة!
