سمعتوا قبل كده عن جريمة قتل ملكة جمال الأطفال الأمريكية “جون بينيت رامسي” ؟؟ اللي يعرفها أو سبق وسمع عنها أكيد عارف الحادث البشع اللي حصل لها في ليلة زي اللي إحنا فيها دلوقتي سنة ١٩٩٦….
أما بالنسبة للي ميعرفش مين دي أصلا ولا أي حكايتها هتفهموا كل حاجة لما تكملوا قراءة…
سنة ١٩٩٠ أتولدت بنت أمريكية اسمها جون بينيت وسط أسرة فقيرة جدا… بتعدي كام سنة والبنت بتكبر شوية وبتبدأ تشترك في مسابقات ملكة جمال الأطفال…وفجأة الأسرة الفقيرة بتتحول لواحدة من أغني الأسر واللي بتمتلك بيت كبير جدا وعربيات احدث مودل…وطبعا الفضل كان بيعود لجمال جون واللي نجحت إنها تنتشل عيلتها من الفقر بعد ما بتكسب في مسابقات ملكة جمال الأطفال واللي الإعلام كله متابعها…عائلة سعيدة وحياة مثالية والدنيا ماشية تمام….
بس الوضع اللطيف ده مش هيدوم كتير… في ليلة زي دلوقتي كده سنة ١٩٩٦ وبعد ما احتفلت الأسرة بقدوم السنة الجديدة وهنوا بعض واستمتعوا بوقتهم ودخلوا ناموا…بدأت الجريمة!
تاني يوم الصبح الأم بتصحي وبتتجه للمطبخ علي طول..وأول حاجة بتقع عينها عليها هي رسالة حد سايبهالها علي الطرابيزة…وبعد ما بتبدأ الأم تقرا الرسالة بتكتشف إن ده طلب فدية..الرسالة بتقول أن مطلوب فدية ١١٨٠٠٠ مقابل حياة جون…ده لو خايفين علي بنتهم يعني..يبقي يدفعوا عشان ترجع لهم سليمة … ( هتلاقوا الرسالة كاملة موجودة مع الصور تحت+ في صور للرسالة مترجمة عشان لو الصورة الأولى مش واضحة)
الأم مصدقتش اللي قريته غير لما طلعت اوضة بنتها…وفعلا ملهاش اثر! جون مش موجودة في البيت كله!!
طلبوا الشرطة وجت بعدها علي طول عشان يحاولوا يفهموا في أيه..تحقيق كثير وبحث، وبعد 8 ساعات بالضبط من اعتبار جون في عداد المفقودين لقوا جثتها في الطابق الأول من البيت..وسبب الوفاة كان إنها تعرضت لضرب علي الرأس أدي إلى تهشم الجمجمة وخنق بحبل نايلون…نقف بقاا هنا شوية، الضباط هنا ارتكبوا خطأ رهيب، مقفلوش مسرح الجريمة..ده غير انهم كانوا سايبين الأهل والصحاب داخلين خارجين من البيت بيواسوا أبو جون ولا كأن في جثة المفروض يتحقق ف مين اللي قتلها…وبالفعل اتهم الضباط دول بالتقصير في القضية بسبب الغلطة اللي حصلت دي واعتبروا انهم غير مهتمين كفاية بالموضوع…
أول حد اتهموه بقتل جون كان أبوها نفسه…أو بمعني أصح أهلها…
تحقيقات كتييير جدا كان في شوية أدلة بتقول أن ممكن أهلها يكون ليهم علاقة بالموضوع..لكن بعد أخذ عينات من جثة جون وعينات من أهلها والمزيد من البحث اكتشفوا أن أهل جون ملهمش دعوة لأنهم مكانوش موجودين أصلا وقت حدوث الجريمة…تم تبرئاتهم -بعد ما كانوا المتهم الرئيسي- في يوليو ٢٠٠٨…. الجريمة حاصلة ف ١٩٩٦ والأهل طلعوا أبرياء ف ٢٠٠٨…١٢ سنة عشان يثبتوا إن مش باباها أو مامتها اللي قاتلينها وكاتبين الرسالة بتاعة الفدية عشان يخرجوا من القضية ومحدش يتهمهم….١٢ سنة ولسه مفيش أي خبر عن اللي قتل ملكة جمال الأطفال جون…
اتقفلت القضية في نفس السنة وكانوا خلاص هيقفلوا علي الموضوع بس رجعت القضية اتفتحت تاني بعدها في سنة…في فبراير ٢٠٠٩.
تعرفوا إن القضية متقفلتش من ساعتها؟؟ وان كل سنة يطلع حد يقول أنه أخيرا وبعد طول انتظار توصل لحل للغز اللي محير ناس كتير…بس مفيش حاجة بتثبت..كلها احتمالات واردة مش اكتر…
كل سنة تكتب الجرائد انهم لقوا أدلة جديدة هتفيد القضية..كل سنة بيتكتب إن في جديد في القضية وانهم حققوا مع المزيد من الناس وسمعوا الكثيييير من الاعترافات الجديدة…
تعرفوا إن لسة من كام شهر بس في جرائد كتبت انهم اقتربوا من الوصول إلى الجاني..
شوفوا عدي تقريبًا ٢٣ سنة علي القضية ولسة مبتخلصش..كل كام شهر بيبقي في جديد…
شوفوا عدي كام ليلة رأس سنة من سنة ١٩٩٦ ولحد النهاردة وكل الفترة دي محدش يعرف حاجة عن القاتل!!
اسئلة كتير بتدور في عقل أي حد يعرف الحكاية، يا تري كان إيه دافع القاتل؟؟ هل بجد كان مجرد فدية زي ما الرسالة قايلة؟؟ ليه القاتل اختار ليلة راس السنة بالذات عشان ينفذ الجريمة؟؟ تفتكروا في سبب..؟؟
وأكيد بعد مرور كل السنين دي..كل ليلة كريسماس بتمثل لعائلة رامسي كابوس…كابوس عمرهم ما هيعرفوا يصحوا منه حتي لو دي كانت رغبتهم….
وأخيرًا المصادر:
اقرأ أيضاً
