لغز رجل الرف المعدني

صباح يوم 11 أغسطس 1994، صيَّاد اسمه مارك بيتيرسون شد الشبكة بتاعته من الميه، عشان يلاقي فيها صيد مٌرعِب كان في قاع نهر هوكسبيري شمال سيدني، بأستراليا.

ودا لأن الصيد اللي كان في شبكته كان عبارة عن رف معدني كبير بحجم الإنسان على شكل صليب.

وعلى الرف دا كان فيه شكل غير واضِح ملفوف في أكياس قمامة سوداء، ومربوط بحبل لونه برتقالي عشان يفضل ثابت في مكانه.

كان فيه بعض الأجزاء مقطوعة من الأكياس دي، وباين إن اللي جواها عظام بشرية.

بيتيرسون اتصَل فورًا بشُرطة المُسطَّحات المائية بخليج بروكين، وبمُجرَّد وصولهم طلبوا منه يمشي معاهم هو والصيد المُخيف بتاعه دا وصولًا للشاطئ، وهناك.. كان في انتظارهم مُحقِّق شُرطة، فحص الرف كويّس أوي، قبل ما يعلن بشكل رسمي إن اللي جوا الأكياس دي، وإن اللي اصطاده بيتيرسون هو جُثة بشرية.

طيب مين الضحية دي؟ وإزاي انتهت حياته بالشكل دا في قاع نهر هوكسبيري؟ ومين اللي ربطه بالشكل دا على الرف المعدني دا؟ والسؤال الأهم.. ليه الشكل دا تحديدًا؟

دكتور كريس لورانس هو اللي فحص الجُثة بحثًا عن أي أدلة، لكن من سوء حظه.. الميه دمَّرِت بصمات الجُثة تمامًا، وبالتالي.. كان شبه مُستحيل إنهم يقدروا يحدِّدُوا هوية الجُثة.

لكن.. دكتور لورانس مش شخص بيستسلِم بسهولة، وقرَّر يفحص الجُثة باهتمام أكبر بحثًا عن أي حاجة مُمكِن تنفَع الشُرطة أو تسهِل عليهم المُهِمَة شوية، وفعلًا قدر يدرس الجُثة لحَد ما وصل لشوية معلومات مُهِمَة زي إن سن الجُثة دي بيتراوَح بين 21 لـ 45 سنة.

وإنه مات بسبب ضربة قوية على راسُه، بس مكانش مُتأكِّد هل تم ربطه بالشكل دا قبل وفاته ولا بعدها، بقياس طول العِظام.. قدر دكتور لورانس يخمِّن إنه طوله كان بيتراوح بين 158 لـ 163 سم.

أسنان الجُثة كانت سليمة، ودا خلى عندهُم أمل يتعرَّفوا على هويته، لكن للأسف.. الضحية مكانش عنده أي حشوات في أسنانه، إلا إنهم عرفوا إنه تم إزالة الضرس اليمين تحت من فم الضحية في سن صُغيَّر، ومن شكل العظام قدر دكتور لورانس يخمِّن إن صاحِب الجُثة دي كان بيعاني من تشوُّه ما بس مقدرش يحدِّد نوعه.

طبعًا المعلومات دي كُلها كانِت غير كافية للتعرُّف على هوية الجُثة، دا غير إن الطب الشرعي أعلَن إن عينات الحمض النووي اللي إتاخدت من الجُثة كلها كانت ضعيفة بشكل ملحوظ، وللأسف.. مفيش أي دليل مُمكِن يوصلنا لهويته.

الموضوع كان لُغز غريب ومالوش أي تفسير..

الطب الشرعي بيقول إن الجُثة فضلت في الميه فترة تتراوَح بين سنة لـ 4 سنوات، ودا بناءً على مُعدّل نمو الطحالِب على الأكياس، الجُثة، والرف المعدني، بعض الأجزاء من الملابس وبعض خصلات الشعر كانوا لسَّه مُتعلّقين في الجُثة، عرفوا من خلالها إنه كان لابس تيشيرت بولو من ماركة أسترالية مُعيّنة، لونه غامِق ومقاسه متوسّط.

بس العلامة التجارية دي كانت مُنتشرة في كُل أنحاء أستراليا في الوقت دا، ودا خلاهم مش قادرين يستفيدوا من المعلومة دي، وفي جيب بنطلونه، لقوا بقايا علبة سجاير وولاعة بمبي، أما بالنسبة لشعره.. فقدروا يحدِّدوا منه إن شعره كان غامِق، وهو على الأرجح كان رجل قوقازي.

وبدأت تظهَر النظريات عشان تفسّر الموضوع، واحدة من النظريات دي بتقول إن دي جُثة جو بيفيانو، رجل مُخدرات وصفه مُشابِه جدًا لوصف الجُثة اللي لقوها، واختفى سنة 1993 بدون ما يسيب أي أثر، سنه وقتها كان تقريبًا 30 سنة.

نظرية تانية قالِت إنها جُثة رجل الأعمال اليوناني بيتر ميتريس، اللي اختفى سنة 1991.

لكن النظريتين كانوا غلط..

ودا لأن حمض بيفيانو النووي مكانش مُتطابِق مع حمض الجُثة النووي الضعيف، كان مُختلِف تمامًا.

أما ميتريس فكان أطول من الجُثة دي شوية، وأخواته بيقولوا إن كان عنده أسنان محشية ومش متطابق مع أسنان الجُثة دي.

وظهرت نظريات تانية بعدها.. لكن كُل نظرية كانت بتظهر.. كانت بيظهر أدلة تنفيها تمامًا، في النهاية اتفق الجميع على تسميته ” رجل الرف المعدني ”

ولحَد النهاردة.. هويته مجهولة تمامًا.

مين الضحية دي؟ وإزاي انتهت حياته بالشكل دا في قاع نهر هوكسبيري؟ ومين اللي ربطه بالشكل دا على الرف المعدني دا؟ والسؤال الأهم.. ليه الشكل دا تحديدًا؟

مفيش ولا إجابة على أي سؤال من دول، عشان رجل الرف يكون ضيف مُميّز معانا في ” حقل ألغاز ”

اقرأ أيضاً

لغز الحرير الأصفر بقلم: محمد عصمت بتاع الرعب

لغز جريمة في الجنة