The saver .. طول عمري ببص للدوائر باستغراب ، يا ترى فين البداية من النهاية ، يا ترى اللي رسم الدائرة ده كان أيه في دماغه يخليه يرسم شكل معقد كده رغم بساطته.
أنا نادية ، الظروف خلتني أسيب بيت أهلي اللي أتربيت وعشت فيه واستقل بذاتي ، حصل خلافات كتير مع أهلي بسبب القرار ده، لكنهم وافقوا بعد ما وعدتهم أني عمري ما هفوت يوم من غير ما أشوفهم وفعلاً بقالى٣ سنين عايشه لوحدي لكن في الحقيقة ولا يوم خلفت بوعدي معاهم غير يوم واحد بس، يوم عمري كله، لما قررت افتح الغرفة اللي صاحب البيت كان محرج عليا أفتحها ، كنت مرعوبة بس لازم أرضي فضولي بس بصراحة اللي لاقيته مرضاش فضولي خالص ، غرفة عادية جدًا أو أقل من عادية كمان ، مفيش حتى كرسي الواحد يقعد عليه ، مجرد ساعة مرمية في ركن ، الراجل المجنون ده عامل غرفة كاملة لحتت ساعة، بس بصراحة جميلة أوي شكلها فخم كده ، قررت أني اخليها معايا وأضايق الراجل ده شوية.
عدت الأيام ونسيت موضوع الساعة ده والراجل مسألش حتى ؛ كان عندي مقابلة مهمة وكنت محتاجة أكون شيك جدًا ، المقابلة على مستوى عالى لبست أحلى طقم عندي بس كان ناقصه حاجة، ساعة ، ياسلام لو كان عليه ساعة كان هيبقى تحفه ، فجأة لاقيت الساعة قدامي مش عارفة أيه اللي خرجها من الدرج بس مش مهم ، ده كان وقتها ، كنت عارفة أن اللي هعمله ده غلط بس كنت هرجعها مكانها فورًا لما ارجع .
خلصت المقابلة ورجعت وأنا هلكانه مش قادرة أقف بس لازم أرجع الساعة ، دخلت الغرفة و مصدقتش عنيا ، الغرفة الفاضية أتحولت لقصر ، مش عارفة المساحة دي كلها جت منين بس أنا كنت عايزه أخرج وخلاص ، بلف علشان أخرج مش لاقية باب ، أتحبست .
المكان كان مليان ناس بس محدش كان وأخد باله مني ، استغربت جدًا حسيت إن الساعة هي السبب في اللي أنا فيه ده ، طلعتها من جيبي و الناس بدأت تنتبهلي ، سمعت صوت جاي من بعيد *المُخلصة جت* و الناس كلها كانت فرحانة بشكل هستيري و أنا الوحيدة المصدومة و مش فاهمة أي حاجة .
اقرأ أيضاً
أسطورة إسون بوشي.. الجزء الثالث
