أسرار صحفي .. طبيعة عملي كصحفي هي جمع ونشر المعلومات عن الأحداث الراهنة، والاتجاهات وقضايا الناس وعمل ريبورتاجات، وإعداد تقارير لإذاعتها أو نشرها في وسائل الإعلام المختلفة مثل الصحف والتليفزيون والإذاعة والمجلات .
2018/3/28
الأستاذ [ م .ح ] رئيس تحرير جريدة [ ع . م ] اللي بشتغل فيها صحفي لأول مرة يجيله جواب تهديد إنه ينشر خبر انفجار مبني بجوار السفارة السعودية ولو منشرش الخبر التهديد هيتنفذ.
الأستاذ م .ح تربطنا ببعض صداقة قوية لقيته بعتلي في مكتبه، دخلت عليه المكتب لقيته في حالة لأول مرة أشوفه فيها شكله باين عليه الخوف ومتوتر جدًا
قلت له خير يافندم ؟
قالي تعالى يا أمير أتفضل اقعد
قلت له أنا حاسس إن في حاجة ومش ساهلة كمان شاغلة تفكير حضرتك جدًا وباين عليك القلق !!
قالي أنت صح ، بس تقدر تقولي يا أمير إيه عقوبة نشر خبر أو إشاعة كاذبه تهدد الأمن العام للبلد ؟
قلت له أنت جايبني لمكتبك بقى علشان تختبر معلوماتي زي كل مرة ولا إيه !!
لكن على ما أتذكر إن المادة رقم 188 من قانون العقوبات بتقول :-
الحبس سنة وغرامة من 5000 جنيه لـ 20 ألف جنيه لأي شخص يحاول نشر أخبار أو إشاعات كاذبة تسبب الفزع بين الناس وتهدد الأمن العام، لكن سؤالك وراه حاجة هو في إيه ؟!
قالي بص أنا لأول مرة يتبعتلي تهديد إني لو منشرتش خبر إنفجار مبنى بجوار السفارة السعودية هيتم قتل فرد من عائلتي كل يوم والتهديد جايلي فيه صور لأولادي ولزوجتي وهما خارجين معنى كده إنهم مراقبينهم كويس ومكتوب في نهاية الجواب
” The sender anonymous ”
دا مش مجرد تهديد وهمي يا أمير أنا مش عارف أعمل إيه !!
لأول مرة أحس إن عاجز ومش قادر أتصرف.
قلت له ياباشا هي دي محتاجه كلام مينفعش نسكت لازم نطلع نعمل محضر فورًا.
قالي هو أنا بعتك علشان تقولي كده منا فاهم الكلام ده، لكن هستفاد إيه لو حد من أهلي أو أسرتي جرالهم حاجة
ثم إيه اللي هيتم لو عملت محضر ماأنت عارف اللي فيها وبلاش أتكلم كتير.
وأثناء حديثنا جاءت مكالمة لرئيس التحرير بعدها لقيت نظرة عينه إتغيرت ومش قادر يتكلم.
قلت له خير في إيه ؟
قالي بنرة صوت حادة مش قلت لك دا مش مجرد تهديد وهمي
خطفوا بنتي وقالولي إني لو منشرتش الخبر أنسى بنتي وأعتبرها من الأموات ولو خايف عليها محاولش أبلغ الشرطة أو أعمل قلق دا لو عايزها سليمة ..
ليه الجريدة دي تحديدًا وإشمعنى أنا !!
قلت له طب إهدى بس كده وإن شاء الله نحاول نلاقي حل
قالي لا مفيش حل غير إني لازم أنشر الخبر الكاذب وعارف إن ده هيسبب هجوم من وسائل الإعلام
على الجريدة وهيقلل من مصداقيتها، دا غير المسائلة القانونية والغرامة اللي هتعرضلها أما الحبس فمستعدله.
سلامة أهلي وأسرتي قبل كل شئ مستعد اخسر كل شئ الجريدة بمستقبلي لكن مفيش سوء يمس بنتي ولا حد من أسرتي.
قلت له تمام ده قرارك أولًا وآخيرًا واللي انت شايفه صح اعمله.
خرجت من مكتب رئيس التحرير وحزين بجد عليه مش قادر أساعده ولأول مرة أشوفه في الحالة دي
خايف ومرعوب بجد.
خلصت شغلي ورجعت لبيتي وبفكر في مشكلة رئيس التحرير وخطف بنته، لكن مش بأيدي حاجة اعملها ولأول مرة أشوفه ضعيف وعاجز إنه يتصرف.
2018/3/29
الجريدة نشرت خبر إنفجار مبني بجوار السفارة السعودية دا عادي ومتوقع طبعا، لكن اللي مش عادي إن بعد خمس ساعات من نشر الخبر يحصل إنفجار بجوار السفارة السعودية.
بعد نشر الخبر وسائل الإعلام المختلفة والصحف شنت هجوم على الجريدة اللي بشتغل فيها برئيس تحريرها
” إزاي ينشر خبر كاذب زي ده وإزاي الخبر يتحقق فعلاً ويحصل الإنفجار.
طبعا رئيس التحرير النيابة طلبته علشان تحقق معاه طبعًا مكانش ينفع أسيب صديقي رئيس التحرير في الوقت ده كنت متابع معاه أول بأول.
التحقيق إستمر يومين وخرج من النيابة عرفت منه إنه قدم جواب التهديد بالصور اللي كانت فيه والمحامي بتاعه قدر يجيب تسجيل للمكالمة اللي تمت بينه وبين الشخص اللي بيهدده والحمد لله عدت على خير وخرج بكفالة.
عدى شهر على الواقعة اللي حصلت وقلنا إن مفيش تهديدات تاني لكن يحصل عكس ذلك لجريدة آخرى.
2018/4/2
[ ف . و ] رئيس تحرير جريدة [ ي . غ ]
ينشر خبر إنفجار أتوبيس سياحي وللأسف الخبر طلع كاذب لكن تاني يوم الخبر يتحقق ونعرف إن أتوبيس سياحي فيه 35 سائح من جنسيات مختلفة تم تفجيره.
رئس تحرير الجريدة طبعا أتعرض للمسائلة القانونية والغريب في الموضوع واللي عرفناه إن رئيس التحرير إتبعتله نفس جواب التهديد اللي إتبعت لرئيس تحرير الجريدة اللي شغال فيها مكتوب فيه :-
” إنفجار أتوبيس سياحي قادم إلي شرم الشيخ إذا لم يتم نشر هذا الخبر غداً سيحدث ما تراه في هذه الصورة ” ومكتوب في نهاية الجواب.
” The sender anonymous ”
واللي كان موجودة في الصورة ” بنته الصغيرة وهي قاعدة على كرسي ومربوطة بأحبال وشخص مقنع واقف وراها وحاطط سكينه على رقبتها “.
طبعا رئيس تحرير الجريدة نشر الخبر إللي إتبعتله بسبب خوفه إن بنته يحصلها حاجة إتعرض للمسائلة القانونية وأتحقق معاه.
2018/4/4
رئيس تحرير جريدة [ ب . أ ]
بعت دعوه لكل من رئيس تحرير الجريدة اللي أنا شغال فيها ورئيس تحرير الجريدة اللي نشرت خبر إنفجار الأتوبيس السياحي لحضور مناسبة ما .. لكن الأحداث الغامضة منتهتش بالعكس بتزيد.
2018/4/5
صحيت من النوم على مكالمة من صديق صحفي بيقولي :-
الأستاذ [ م .ح ] و [ ف . و ] ماتوا
قلت له إيه !! إزاي حصل ده ؟
قالي بعد ما خلصوا المناسبة اللي كان عازمهم فيها رئيس تحرير جريدة [ ب . أ ]
وهما راجعين كل واحد منهم عربيته إتقلبت بيه طبعا الحادث بفعل فاعل لإنهم لقوا إن فرامل العربيات بتاعتهم مقطوعة، ورئيس تحرير الجريدة اللي كان عامل المناسبة بيتحقق معاه وشكله هو اللي وراها.
قلت له طب والأستاذ [ م .ح ] إتدفن ولا لسه ؟ قالي لا لسه في المستشفى.
عرفت منه عنوان المستشفى ونزلت على هناك لما وصلت وسألت عرفت إن أهله خدوه
علشان يتدفن في بلده وصلت للبلد بتاعته ومهما أقول عن حالتي مش هقدر أوصفها ليكم
حضرت الجنازة ومكنتش مصدق إن نهاية صديقي تكون بالطريقة البشعة دي.
قلت يبقي رئيس تحرير جريدة [ ب . أ ]
هو السبب في كل اللي حصل ده وبالفعل النيابة أثبتت صحة كلامي وتم توجيه تهمة القتل لرئيس تحرير الجريدة
واللي ثبت التهمة أكتر إنهم عثروا على جواب تهديد موجود في مكتبه كان هيتبعت لجريدة آخرى إنها تنشر خبر مقتل شخصية سياسية هامة وفي نهاية الجواب مكتوب
” The_sender_anonymous ”
نفس التوقيع اللي بيتبعت في نهاية كل جواب تهديد مبقتش مصدق اللي حصل وحاسس إني بحلم
بعد وفاة صديقي رئيس التحرير مقدرتش أكمل في الجريدة مقدرتش أستحمل إن أدخل مكتبه في مرة وأشوف شخص تاني قاعد مكانه.
تعبت نفسيًا بعد إللي حصل وقعدت في البيت لا بكلم حد ولا بخرج عدى أسبوع وجاتلي مكالمة من صديق ليا فرحتني جدًا بعد نهاية المكالمة لبست هدومي ونزلت قابلت جماعة إصحابي.
إتكلمنا في كذا موضوع
وفي نهاية كلامنا قالولي إيه الخطة الجديدة قلت لهم ” إنفجار [ م . ر ] ”
لـــ #أمير_جلال
#Horror_Stories_of_Amir_Galal
اقرأ أيضاً
