قلب الشيطان الجزء الأول

قصة/ أحمد الشمندي
زمان واحنا عيال صغيرة ، كانوا دايماً بيقولونا “متخليش الشيطان يضحك عليك” ويخليك تعمل كذا وكذا وكذا ، ولغاية دلوقتي ، إحنا كمان بنقول لولادنا نفس الكلام ، وكل حاجة غلط بتحصل من شخص كبير أو صغير دايماً بنعنونها ب “وَزِّة شيطان” أو “ساعة شيطان” ، ولما يبقى فيه موقف مع حد كبير أو بين اتنين أصحاب مثلاً ، تلاقي واحد بيقول للتاني اللي هو غضبان أو ناوي ياخد اجراء في الموقف “متخليش الشيطان يلعب بيك” …
مين هو الشيطان ؟ الشيطان يا عم إنت ، اللي هو الشيطان ، أيوة اللي هو مين يعني ؟ عزازيل ولا إبليس ولا الشيطان ؟ كان ملاك من الملايكة ولا هو أصلاً من الجن ؟ هل فعلاً كان على مُلك الدنيا بعد ما قضى على الجن اللي أفسدوا في الأرض بأمر ربنا ؟ …
الأسئلة كتير والإجابات أكتر ، بس السؤال الأهم بقى ، هو إنت قابلت الشيطان قبل كدة ؟! اتعاملت معاه ؟! حسيت فعلاً إنه بيوسوسلك ؟!

– مين اللي چاي هناك دِه
– دِه حراز
– الراجل دِه كَنُّه ملبوس ولا مندوه ، كل ليلتين تلاتة تلاجيه چاي من يَمة الجبل وش الفچر
– ملناش صالح يا بوي ، دِه راجل بوزه فجر ، همله لحاله خليه يغور
– واد مين دِه ؟
– كَنك جالوص طين البعيد ، جولنا ميت مرة حدش يعرفله ناس ، ولا ميته اتبلينا بيه ، كَنُّه طَلع من تحت الأرض
– دة كبير جُوي ، كَنُّه سبعين سنة
– اخرس ياد إنت

الحوار اللي فوق دة كان بيدور في قرية صغيرة من قرى محافظات الصعيد سنة ١٨٣٨ ، كان يوم اتنين غالباً ، أول شهر أكتوبر ، القرية كان موقعها مميز حبتين ، أو خلينا نقول مختلف …
أولاً كانت في البر الشرقي للنيل ، يعني النيل غربها ، وفي الشرق جبل على هيئة تجويف عظيم ، وكأنه بيحضنها ، ثانياً المسافة بين الجبل والنيل كانت كبيرة ، الأراضي الزراعية كانت بتبتدي من بعد خط النيل بشوية ، ولما تديها ضهرك وتبص للشرق تلاقي البيوت بتاعت أهل القرية ، وبعد مسافة اتنين كيلو تقريباً من آخر بيت في البيوت ، تلاقي المدافن ، وبعد المدافن بكيلو ونص كمان ، سفح الجبل …
لما تبص للجبل نظرة عميقة شوية ، تحس إنه شخص قاعد متربع وبيبص على القرية ، الجبل دة من قديم الأزل اسمه جبل شيطان ، مش دة الملفت للنظر ولا دة اللي يحسسك بقبضة روحك لما تسمعه ، الملفت والغريب فعلاً ، إن الجبل دة لونه أسود في منطقة كلها هضاب وجبال جيرية لونها فاتح ، والأغرب من دة ودة هي الحكاية الي بتتقال عنه ، بس قبل ما أقولك الحكاية هقولك اسم القرية … القرية اسمها نزلة الأموات
بيقولك إيه بقى ، الجبل دة أصلا كان شيطان واتحرق واتحجر مكانه ، والمكان دة كان العرش بتاعه اللي بيقعد عليه ، والقرية دي من وقتها وهي ملعونة ، لما تدخل القرية دي يجيلك شعور كدة بالكآبة ، ونفسك يضيق ، لدرجة إنك تصدق إن القصة دي حقيقية ، ومع اسم الجبل واسم القرية ، تحس إنك مش هتخرج منها تاني …
الناس كلها ساكتة ، اللي في الغيط بيزرع ويقلع وهو ساكت ، الستات اللي بتغسل هدوم ومواعين على شط النيل بيغسلوا وهم ساكتين ، واللي ربنا نفخ في صورتهم وبيتكلموا مع بعض ، بيتكلموا بصوت واطي ، ومع المغرب كل اللي بيعمل حاجة بيسيبها وبيروح بيته ، والليل لما بينزل الكل قافل عليه بابه إلا عدد محدود جداً اللي تلاقيه بيتحرك ، أو اتنين قاعدين مع بعض مثلا زي اللي كانوا بيتكلموا فوق دول …
معظم القرية ضلمة سودا ، أضواء خافتة بسيطة وضعيفة أوي باينة من شروخ أبواب بعض البيوت أو الشبابيك …
أنا حكيت حكيت ونسيت أعرفكم بنفسي  أنا أحمد حسام ، صحفي مغامر حبتين ، ومعايا زميلتي المصورة ميريام أحمد ، وعقدنا العزم إننا ننزل نعمل تحقيق صحفي مصور في نزلة الأموات ، خاصةً إن المعلومة الي عندي والغريبة جداً ، إن القرية دي مازالت زي ما هي ، ولما سألت عنها ، الرد كان أغرب وأغرب جداً ، دي قرية قديمة ومبقتش موجودة !!!
ملحوظة صغيرة : إحنا في سنة ٢٠٢٠ حالياً وأنا قريت اللي حكيته فوق دة عن القرية دي في كتاب قديم أوي في مكتبة والدي الله يرحمه ويحسن إليه ، مكتوب بخط الإيد سنة ١٨٤٢ ، والحقيقة إن الكتاب دة هو مصدر معلوماتي الوحيد ، وبالمناسبة هي في مكان ما بين سوهاج وقنا شرق النيل طبقاً للخريطة اللي في الكتاب … ياللا تعالوا معانا
– صباح الخير يا أحمد
– إيه يا ميريام ، إنتي جاية مشي ؟ مش ميعادنا خمسة ؟
– الساعة خمسة وعشرة يا أحمد !
– إيه دة بجد ؟!
– لا والله ، تقولش واقف من ساعتين
– ياللا طيب اركبي ، المشوار طويل
– إنت عارف المشكلة في إيه ؟ إني مش هروح الچيم الفترة دي كلها
أحمد بص لميريام وهو بيتحرك بالعربية ، نظرة المشلول الأخرس اللي هو إحنا في إيه وإنتي في إيه ، چيم إيه وبطيخ إيه …
أحمد وميريام اتحركوا من القاهرة الساعة خمسة الفجر ، في اتجاه الصعيد من الطريق الصحراوي الشرقي (طريق الكريمات) ، اللي بينتهي في أسيوط ، وبيبتدي بعده طريق تاني ، يعتبر طريق جبلي أكتر منه صحراوي ، اتجاه سوهاج وقنا …
– احنا كدة عدينا سوهاج يا أحمد صح ؟
– أيوة ، المفروض كدة أودامنا أقل من نص ساعة ، ونلاقي مدخل القرية على إيدينا اليمين حسب الخريطة
– الساعة اتنين ونص
– يا دوب ، احنا كنا قايلين هنوصل على تلاتة تقريباً
– متهيألي اليافطة اللي هناك دي هي
– جهزي بقى الكاميرا ، علشان هنصور من أول اليافطة والمدخل
– يا ساتر  إيه اليافطة السودة دي !
– نزلة أموات بقى
– إنت بتهزر ؟! أنا اكتأبت
بص هي حقيقي اليافطة كئيبة ، ومش عارف بني آدم مين اللي عملها بالشكل دة واحنا في سنة ٢٠٢٠ ، عارف غطا الزير الخشب المدور دة ، حاجة زييه كدة ، مدهونة إسود وكأنها محروقة بنار لغاية ما اِسودت – أو يمكن هي متحروقة فعلاً – ومكتوب عليها بخط الإيد اسم القرية بطريقة بدائية جداً وبلون زي لون الرماد ، وكأن واحد حط صوباعه في رماد وكتب بيه على الخشبة …
الطريق كان عبارة عن مدق جبلي صعب شويتين ، ومن الواضح إنه بينقلك من مكان مرتفع وكل ما بتكمل فيه الارتفاع بيقل وبتنزل لتحت ، عربية أحمد سوبارو XV ، فالطريق مكانش مشكلة في حد ذاته …
المشكلة كانت أكبر من كدة بكتيييييييير …
– أحمد أنا خايفة وقلبي مقبوض
– فيه إيه يا بنتي ؟ إحنا لسة عملنا حاجة ولا شوفنا حاجة ؟
– الدنيا بتغمق كدة ليه ؟! الشمس راحت فين ؟!
– إهدي يا ميريام ، تلاقي ال…..
– حاسب حاسب …
وكأن الأرض انشقت في ثانية وطلعته …
مع صرخة ميريام بكلمة حاسب ، وبتلقائية سريعة بدون تفكير ، أحمد داس فرامل بكل قوته وبص أودامه بعد ما كان باصصلها وهو بيحاول يهديها علشان يتفاجئ ببني آدم واقف في نص الطريق ، وبينهم وبينه خمسة متر تقريباً ويمكن أقل ، العربية وقفت قبل نص متر من الشخص اللي واقف ، مع عفرة تراب ، وكأنها عاصفة صحراوية عنيفة …
النفس سريع وصوته عالي ، النبض متسارع ، بيسحب الدم بأسرع ما يمكن ويضخه علشان يحافظ على المخ في أقصى حالات الإنتباه ، وعلى الجسم في أعنف حالات التوتر والتحفز ، العيون مبرقة ، الأعصاب مشدودة ، الضغط عالي ، شحنات من الرعشة بتضرب أحمد وميريام ، مع وقوف العربية ، التراب اللي سببته الفرامل ابتدا يهدى وحركته تقِل ، والرؤية ابتدت تتضح …
راجل في السبعين من العمر تقريباً ، بشرة سودا ، ملامح قاسية تجاعيدها وكأنها خريطة مجسمة ، شعر أكرت جداً ، طوله حوالي ١٨٥ سم ، وزنه ممكن يعدي ال ١٢٠ كجم ، ودة واضح من ضخامة جسمه ، لابس جلابية صعيدي ، لونها أسود ، متربة ، وماسك في إيده نبوت …
أحمد تمالك أعصابه وسيطر على رعشة جسمه وفتح باب العربية ونزل ، في الوقت اللي كانت ميريام قاعدة مش عارفة تلم رعشتها ولا تهدي نفسها ولا حتى تشيل عينيها من على الراجل …
– أنا آسف جداً يا حاج ، والله ما أخدت بالي ، أنا إتفاجئت بحضرتك
بص … الراجل واقف وكأنه تمثال جرانيتي ، تحس إنه مش بيتنفس ، عينيه لونها زيتوني غامق ، ومع لون بشرته الأسود ، وملامحه ، تحس إن السكتة القلبية بتقولك أنا مستنياك أهو وفي شرف استقبالك …
بصوت حجري مبحوح ، قوي ، عميق ، طالع من بطن الأرض …
– النازل مسحور ، والطالع محجور
أحمد تنح ببلاهة طفل ، وصدمة مرعوب ، وقلة حيلة أخرس ، والحقيقة الراجل مدالوش الفرصة ، سابه بمنتهى الهدوء وعداه وهو باصص أودامه ، ومشي في عكس الاتجاه اللي العربية رايحة فيه ، وبالتالي عدا من جنبها ، من ناحية ميريام ، ولما بقى جنبها ، بصلها بنفس الهدوء من غير ما يوقف ، عينه جات في عينها لثانيتين قبل ما يعديها ويكمل طريقه …
أحمد فضل واقف تلات ثواني تقريباً زي ما هو ، لف في اتجاه العربية بالراحة وكأنه مصدوم ، هو بالفعل كان مصدوم ، واتحرك وعينه على الراجل وهو ماشي مديله ضهره ، لغاية ما وصل للعربية وركب …
– قالك إيه ؟ ……. بصلها مذهول ، مرتبك ومحتار
– معرفش ، قال جملة غريبة مش قادر افتكرها
– أحمد أنا مرعوبة ، شوفت عينيه سودا أوي ازاي ؟
– عينيه مش سودا يا ميريام ، عينه لونها زيتوني غامق
– أحمد دة عدا من جنبي وبصلي في عيني ، عينيه سودا أوي
أحمد مردش عليها وفضل باصصلها خمس ثواني تقريباً وهي باصاله مستنياه يقول أي حاجة ، لكن الوقت مكانش في صالحه ، فجأة وبدون سابق إنذار ، صوت خبط عنيف انفجر وراهم جوه العربية بصدى صوت مضاعف ، ميريام صرخت بمنتهى الفزع وأحمد شهق لدرجة الألم ، وبصوا وراهم لمصدر صوت الانفجار ، علشان يتفاجؤا بنفس الشخص واقف ورا العربية وبيخبط بعنف وبانتظام على الجزء الخلفي من سقف العربية وكأنه بيهدها ، وفي حركة لا إرادية أحمد إيده راحت للفتيس وحركه لوضع ال D وداس بكل قوته على دواسة البنزين وطار …
لمدة ربع ساعة كاملة ، أحمد طاير بالعربية ، ميريام لازقة في الكرسي مبرقة ومتنحة وباصة أودامها في اللا شيء …
– أوقف يا أحمد هرجع ، مش قادرة ، أوقف
أحمد وقف العربية بسرعة ، ميريام فتحت باب العربية ونطت منها …
البنت يا عيني من الرعب ومن كتر ما هي مذعورة من الموقف ، جابت كل اللي في بطنها …
أحمد أخد إزازة مية ومناديل ونزل وراها ، وفضل واقف جنبها لغاية ما خلصت وابتدت تهدا ونفسها ينتظم …
– أحمد خلينا نرجع الله يخليك ، أنا هموت من الرعب
– اهدي يا ميريام بس ، هي أول مرة ؟
– أيوة يا أحمد أول مرة ، هو إحنا نازلين الزاوية الحمرا نعمل تحقيق ، إنت شوفت الراجل شكله عامل ازاي ، وعمل إيه ، إنت عارف أصلا إحنا رايحين فين ؟
– إحنا خلاص وصلنا يا ميريام
– وصلنا فين ؟
– النزلة أهي
أحمد شاور وبص في الناحية اللي كانت العربية ماشية اتجاهها ، وبالتالي ميريام بصت مكان ما بيشاور ، وفعلاً ، على مرمى البصر كانت نزلة الأموات واضحة وكان النيل واضح جداً …
الطريق اللي كانوا ماشيين عليه ، بيوصل للنزلة من اتجاه الشَمال أو من بحري بلهجة الصعايدة ، يعني النزلة هتبقى على إيدك الشمال ، ولما تلف شمال علشان تدخلها ، النيل هيبقى على يمينك وهي والجبل على شمالك ، تخيلت كدة الموقع والمنظر عاملين ازاي ؟ ممتاز …
أول ما وصلوا للنيل والطريق لف بيهم شمال ، فجأة العربية بطلت ، وقفت فجأة ، وحلفت ما هي دايرة تاني ، أحمد وميريام نزلوا من العربية ، وأحمد فتح الكبوت في محاولة فاشلة طبعاً علشان يحاول يعرف فيه إيه لكن بدون فايدة ، كل حاجة طبيعية ، لكن العربية وكأنها تحولت لخردة ، لا كهربا ولا ميكانيكا ، فصلت تماماً …
المسافة اللي كانت باقية لغاية ما يوصلوا للقرية ، كانت حوالي اتنين كيلو ، البيوت كانت باينة ، وطبعاً الجبل كان واضح جداً ، والضفة الغربية من النيل كمان كانت واضحة …
– العربية فيها حاجة غريبة ، أول مرة تعمل كدة ، بصي إحنا …
– أحمد
– في إيه ؟
– بص الناحية التانية من النيل !
– مالها ؟ فيه إيه يا بنتي ؟
– القطر فين ؟ فين الأراضي الزراعية ؟ فين الناس ؟ فين الحياة ؟ أحمد إحنا فين بالظبط ؟
– المفروض إحنا بين سوهاج وقنا
– يعني المفروض لما أبص الناحية التانية ملاقيش صحرا كدة
أحمد كان بيتلفت حواليه وهي بتتكلم ، وفجأة عينه اتمسمرت وراها …
– إنت بتبص على إيه ؟ فيه إيه ؟
– الراجل
ميريام بصت مكان ما أحمد كان بيبص وتنحت ، البنت اتخرست حرفياً من رعب المشهد ، الراجل اللي قابلوه في الطريق كان جاي في وشهم ، والحقيقة دة مكانش تحديداً هو سبب الرعب …
الراجل مكانش ماشي على الأرض …
الراجل كان طاير في الهوا وكأنه ماشي …
وبينه وبين الأرض تقريباً نص متر …