قصص ويجا حقيقية زوزو.. شيطان ألواح الويجا
ألواح الويجا بتحتَل مكان مُهِم في الفولكلور الخاص بما وراء الطبيعة، ناس كتير على مدار التاريخ حاولت تتواصَل مع الموتى باستخدام الألواح الشهيرة دي، دا مُمكِن يكون حقيقي.. ومُمكِن زي ما حاجات كتير في المجال دا بتكون.. مش حقيقي، مفيش حد مننا مسمعش قصة حقيقية واحدة لها علاقة بألواح الويجا، سواء عن شخص حاول يستحضِر روح مُعيَّنة والموضوع فَشَل أو عن شخص أصلًا مكانش مُهتَم بالمضوع وخاص التجرُبة بغرض التسلية.
وسواء الموضوع كان حقيقي أو لا، فألواح الويجا لها سحر مُخيف، سواء فعلًا كان الغرض منها حقيقي وبتسمَح لأي حد بيستخدمها بالتواصُل مع الموتى وأرواحهم أو لأ، فكرة إنك قادِر تستحضِر روح حد ميت وتتناقِش معاه وتسأله.. حاجة مُثيرة ومُخيفة.
بس برضه زيها زي أي حاجة لها علاقة بما وراء الطبيعة فيه وراها مخاطِر، محدِّش يقدر يقول إنها آمنة أو عادية، دايمًا بنقرا على الإنترنِت تحذيرات كتير من استخدام اللوحة، مُمكِن المكان اللي بتستدعي فيه الروح ميعجبهاش، ومُمكِن تعجبها زيادة عن اللزوم لدرجة إنها مش هتكون عايزة تمشي، ومُمكن اللي تيجي متكونش الروح اللي إنت أصلًا مُستدعيها وتكون حاجة شريرة بتتظاهَر إنها هي، ومُمكِن تعمل كُل حاجة صح.. بس تقفل الموضوع غلط وتتسبِّب في فتح بوابة من بوابات الجحيم.
كتير مننا سمعوا قصص عن كُل الحاجات اللي فاتِت دي، لدرجة إن فيه مُنتديات كاملة معمولة مخصوص عشان الناس تحكي القصص المُخيفة اللي حصلِت لها مع ألواح الويجا.
في شهر مارس ٢٠٠٩، دارين إيفانز قرَّر يكتب تجربته مع لوحة ويجا على واحِد من المُنتديات الشهيرة، وتجربته كانِت مع كيان شيطاني اسمه «زوزو»، وبدأ قصته بالحاجات العادية الطبيعية اللي بتحصَل عادةً زي إن الروح حضرِت بشكل عادي وودي، لكن مع زيادة الأسئلة ومع مرور الوقت بدأت تكشِف عن حقيقتها العدائية المُخيفة.
وفقًا لكلام إيفانز.. فزوزو بدأ فجأة في تهديده هو وكُل أحبابه، وبعدها قاله إن هيؤذي صديقته، اللي من بعدها وشخصيتها وتصرفاتها إتغيَّرت تمامًا، لكن المشاكل موقفتش عند الحد دا، بنته الصغيرة كمان فيه كيان شيطاني حاول يغرّقها في حوض الاستحمام ولمَّا قدروا ينقذوها أصابها فيروس نادِر ودخلِت المُستشفى فترة طويلة.
ناس كتير في المُنتدى قالِت إن دي مُجرَّد صُدف، لكن إيفانز كان مُقتنِع تمامًا إن هو وأسرته بيتعرَّضوا لإعتداء من كيان شيطاني اسمه «زوزو»
كان صعب جدًا حد يلاقي تفسير منطقي للحاجات اللي بتحصل في بيته، ضيوفه نفسهم قالوا إنهم شافوا الأبواب بتتفتح وتتقفل لوحدها، وكذلك الأبواب والأدراج، غير الأصوات المُخيفة اللي كانت جاية من جوا الحيطان، وقالوا إن دي كُلها إشارات وعلامات على وجود شيطان في البيت وإن الشيطان دا رافِض يمشي.
الغريب.. إن بعد كُل دا، إيفانز لسّه مصمّم يفضل في البيت ويستخدم لوح الويجا في استدعاء وتحضير أرواح تانية!
طبعًا بوست إيفانز على المنتدى عدى والناس كُلها بقت بتتكلِّم عليه، ونتيجة لدا ظهر ناس تانية بتحكي حكاياتها مع «زوزو» وبطبيعة الحال كان منهم الصادِق واللي فعلًا شاف «زوزو» وفيه منهم اللي عايز يركَب تريند وخلاص زي ما بيحصل دايمًا وللأسف.. دا أضعَف من الموضوع جدًا..
بس صدق أو لا تُصدِّق.. «زوزو» دا شيطان حقيقي فعلًا، وظهر لأول مرة في التاريخ سنة ١٨١٦، في كتاب للمؤلِّف كولين دي بلانسي، والكتاب كان بيحكي عن قصة بنت جواها ٣ شياطين، واحد منهم اسمه زوزو، لكن الكتاب – رغم إنه مبني على قصة حقيقية – إلا إن كتير من أحداثه كانت خيالية وبالتالي.. مش عارفين إيه كان حقيقي وإيه كان خيالي!
فهل قصة إيفانز مع زوزو قصة حقيقية ولا قصة خيالية.. الله أعلم؟
إنتم إيه رأيكم؟
اقرأ أيضًا:
ررررررررررححح تتتتتتتتمممممممممممممووووووووووتتتتتتتت