هل السينما متعه بس ؟ هل صناعة الافلام هي صناعة استهلاكية بحته ما بتقدمش غير وقت كويس و خلاص ؟ طب هل شفت فيلم استمر في ذهنك أيام بتفكر فيه غصب عنك ؟
Sleepers 1996 عمل معايا كده !
من البدايه فكرة الفيلم تقليدية نوعا يمكن اتهرست في الف فيلم تاني 4 أصدقاء اطفال من أسر متوسطه / فقيرة أشقياء جدا . الشقاوه اللي بتتحول لشيطنه في كتير من الأوقات . مقالب لعبهم أقرب للكوميديا . هتلاقي الوحيد اللي فعلا خايف عليهم اكتر من أهلهم هو قس شاب . تقريبا بيبقى شايف المستقبل ! و فعلا الشيطنه دي بتوصلهم للسجن في مكان احتجاز للأطفال لمده سنه . و هناك – كما هو متوقع يعني – بيتم تعذيبهم بشكل ممنهج و اغتصابهم بشكل دوري من حراس المركز اللي هو المفروض لتأهيلهم و اصلاحهم!
بيخرجوا من المركز ده و بيكبروا. اتنين منهم أصبحوا مجرمين خطرين بيقابلوا واحد من الحراس اللي كانوا بيعذبوهم. من غير تفكير هم الاتنين بيطلعوا مسدساتهم و بيقتلوه في مطعم فيه مالا يقل عن 8 شهود !
و هنا بقى بدأ الفيلم فعلا ….
الاتنين الأصدقاء التانين واحد بقي صحفي و واحد بقى مدعي عام ” بيقوم بدور النيابه في مصر ” و المدعي ده بيحارب عشان يمسك القضيه عشان يقوم بدور المدعي في انه يديهم حكم الإعدام . و في نفس الوقت ورق القضيه معاه و بيكتب مرافعات عشان المحامي اللي ماسك قضيتهم يكسبها!
اه المدعي العام كان عميل مزدوج و قدر يجيب لهم البراءه ! بتكتشف أن الكل هيتواطئ لمساعدة اطفال المنطقه . حتي القس الطاهر النقي هيروح يشهد زور انه كان معاهم وقت ارتكاب الجريمة بعد ما طلب منه الصحفي انه يكذب في المحكمة و حكي له اللي تعرضوا ليه !
الفيلم ده بيفتح تساؤلات كتيرة ….. هل اغتصاب القصر عقوبته في القوانين الحالية كافي ؟ أنا شخصيا بشوف أن عقوبته لازم تكون الإعدام . طب هل معني كده أن الاتنين اللي فتحوا النار علي الحارس ده عندهم حق يعملوا كده مدام مش هيقدروا يثبتوا اللي عمله فيهم و لو اثبتوه مافيش عقاب كافي ليه ؟
هل التعرض لتجربة زي ده بتدمر الطفل لدرجه انه يكبر يبقي مجرم و كاره للمجتمع ؟ لاحظ أن جريمة الأطفال اللي اتسجنوا عشانها هي – تصرف غير مسؤل كاد يؤدي بحياة الآخرين – يعني ماكانوش بذور إجرامية !
طب لو التجربة ده خلتهم مجرمين ازاي الاتنين التانين اللي اتعرضوا لنفس التجربة شقوا طريقهم و نجحوا ؟ معني كده أن التجربه مش مؤثره للدرجة دي ؟ أو ان اختلاف طبيعة الأشخاص بتخلي رد الفعل علي الحدث الواحد يختلف من شخص لآخر ؟
طب التجربة دي لو ما اثرتش عليهم فعلا ليه الاتنين اللي نجحوا فضلوا يعيشوا من غير زواج و لا اطفال و لا علاقات مع أي شخص ؟ و اختاروا الوحده ؟
الفيلم ده بيفتح تساؤلات هتخلي بالك مشغول بيها غصب عنك . الفيلم ده فعلا تحفة فنية بداية من التمثيل اللي برع فيه كل ممثل و خصوصا روبرت دي نيرو بنظرات عينيه خصوصا في المشهد اللي كان بيسمع فيه تعرض الأطفال للاغتصاب و مشهد الكذب في المحكمة ! تعبيرات وش الاتنين القتلة اللي فيها يأس و حزن شديد طول الوقت حتي و هم بيقتلوا الحارس . نظراتهم للقس و هو بيكذب عشانهم اللي بتترواح بين العرفان و الخجل انه اضطر يكذب عشانهم !عن الموسيقى التصويرية المرعبة فعلا . عن كادرات التصوير و حركه الكاميرا و إخراج عبقري !
شوفوه يا جماعة …. ساعتين و نص من المتعه في مشاهدة فيلم متكامل …. و أيام و أسابيع و يمكن سنين من التساؤلات اللي مش هتنتهي!
مشاهدة فيلم Sleepers اقوى افلام الرعب
لمشاهدة الفيلم اون لاين أو تحميله مباشرة من هنااااا
اقرأ أيضًا:
فيلم الحارث قصة رعب مقتبسة من أحداث حقيقية .. الحارث على منصة شاهد وشاهدVIP
بحب الفيلم ده جدا وشفته زمان في نادي السينما ومن الافلام اللي بتوجع وبتفضل زي ما قلتي معلمة مع الواحد
تحليل بسيط وجميل كالعاده 😍
طريقة عرضك للفيلم شوقتني اتفرج عليه في أسرع وقت. دمت بخير
غريبه اني ما شفتوش مع انه قديم نسبيا عموما حدور عليه بعد مراجعتك الرائعه دي
تحليل ووصف جميل للفيلم ❤انا اتشوقت اشوف الفيلم بعد المقال ،في انتظار المزيد😎
جو الافلام من النوع ده جميل جدا لقربه من واقعنا و ذكرياتنا
مقال مميز كعادتك و اتمنى ان اقرء لك المزيد…
برافو تقيم أكثر من رائع
احسنتي يانسوم
مقال روعة عن فيلمي المفضل
تحليل متميز للفيلم ونقد مبدع
مقال رائع متشوقة أشوف الفيلم ❤