قصة الأطفال ذوي العيون السوداء
تُعد هذه الأسطورة واحدة من أشهر الأساطير الحضرية الأمريكية، واللي بتدور عن أطفال عينيها سودا تمامًا وبيظهروا للناس في أوقات مُتأخِّرة من الليل عشان يطلبوا منهم المُساعدة، بعض الناس بيقولوا إنهم شياطين من العالم الآخر، وناس تانية بتقول إنهم كائنات فضائية.
خلينا كدا نبدأ من الأول..
الأسطورة دي ظهرت للمرة الأولى سنة 1996 لمَّا شخص اسمه بريان بيثيل من آبيلين بولاية تكساس، إدعى إنه شاف وتعامل مع طفلين مُرعبين جدًا.
بيقول إنه في ليلة من الليالي، كان رايح عشان يركب عربيته، اللي كان راكنها في موقف سيارات خاص بسينما، فجأة بدأ يقرَّب منه ولدين صُغيرين، وبدأوا يخبطوا على باك عربيته المقفول، وكرد فعل طبيعي، الراجل فتح شباكه، بس بمُجرَّد ما عمل كدا بيقول إنه حس بشعور مُخيف ومُرعب، وإنه حس بشيء مش طبيعي.
الولد الكبير قاله بهدوء وبصوت مليان ثقة: ” هاي، لو سمحت يا سيد، إحنا في مُشكلة ”
سكت ثواني قبل ما يكمِّل: ” زي ما إنت شايف، أنا وصديقي دا كُنا عايزين نتفرَّج على فيلم، بس للأسف نسينا الفلوس في البيت، فإحنا محتاجين بس حد يوصلنا البيت عشان نجيب الفلوس، مُمكِن تساعدنا؟ ”
الولدين كانت بشرتهم شاحبة بشكل غريب، إحساس غريب بعدم الارتياح كان بيملا قلبه، عشان كدا تردَّد للحظات.
بهدوء جدًا الولد قال: ” خلينا نركب، اسمح لنا بالدخول، عشان إحنا مش هنعرف نركب العربية إلا ما تأذن لنا، أرجوك.. اسمح لنا بالدخول، والموضوع هيخلص بسُرعة، وهنروح لبيت ماما ”
وللمرة الأولى الولد بيرفع وشه عن الأرض، عشان الراجل يشوف عينيه، عينيه سودا تمامًا، بلون الفحم، مفيش نني، مفيش حاجة، مُجرد بقعتين من اللون الأسود.
الراجل بدأ يحس بالخوف، والولد حس بدا، قاله بسُخرية: ” متخافش، مش هنؤذيك، لازم تأذن لنا وتسمح لنا بالدخول، زي ما إنت شايف.. مفيش معانا سلاح.. ”
الراجل حس بخوف مش طبيعي، وبسُرعة جدًا دوَّر عربيته، وبدأ يهرب من المكان.
سمع صوت الولد بيصرُخ: ” مش هنقدر ندخُل عربيتك إلا ما تأذن لنا بالدخول، اسمح لنا بدخولها ”
الراجل خرج من الموقف بسُرعة، وعشان كان حاسس بالفضول، بص في المراية بتاعته، وفوجئ إن الولدين اختفوا بدون ما يسيبوا أي أثر، الموقف المُظلِم كان فارغ تمامًا.
القصة دي الراجل نشرها للمرة الأولى في مُنتدى خاص بالكائنات الفضائية، ومن يومها والناس بدأوا يحكوا ويتكلموا عن مُقابلات شبيهة بالمُقابلة دي.
الحاجة الملحوظة هي إن كُل المُقابلات دي بتحصل بالليل بس، ولازم الشخص اللي بيشوفهم يكون لوحده في بيته أو في عربيته، عادةً الأولاد بيلبسوا حاجة على راسهم عشان تغطي وشهم وغالبًا بيتكلموا وهُمَّا باصين للأرض.
كُل اللي قابلوهم بيقولوا إنهم حسوا بإحساس غريب بالخوف وعدم الارتياح.
الشيء الوحيد اللي هنصحك بيه لو قابلتهم، بلاش تسمح لهم بالدخول، هُمَّا مش هيقدروا يدخلوا بدون إذنك.
خُد بالك من النقطة دي كويس أوي!
اقرأ أيضًا:
بالتفصيل قصة الدكتور كارل تانزلر الذي سجل أسوأ قصة حب في التاريخ
