شخابيط ولادنا … تخطيط لمستقبلنا
كانت فى مقولة زمان تقال على سبيل الفكاهة … ( شخابيط ولادنا .. تخطيط لمستقبلنا ) .. لكن مع الوقت اكتشفت إنها حقيقة ..
الطفل بتبدأ ادراكاته بالعالم المحيط به ويبدأ يعبر عن إدراكه اللى وصل له بالورقة والقلم .. هو شايفها شىء عظيم واضح و إنه وصل لنا فكرته .. واحنا شايفنها مجرد شخبطة .. لكن فى الحقيقة هى أفكاره اللى فى طريقها لتكوين ..
الشباب بيكتب خواطره.. بيرسم أحلامه وأمنياته .. بيشوفها ساعات مستحيلة .. بيشوفها المجتمع مجرد أحلام .. شخطبة برده على الحيط أو الورقة … لكنها فى الحقيقة فكرة لبكرة .. تتنفذ .. تتحقق .. تصبح واقع ساهم فى تغيير شكل المستقبل للأحسن .
الشباب عددهم فى العالم 1.8 مليار نسمة من اجمالى عدد سكان العالم .. عدد مش قليل ولا يستهان به .. الشباب يقدر يغير ويطور .. لإنهم هم المبتكرون .. المبدعون .. أصحاب الحلم الحقيقى و الرؤية الطموحة لأيام الارض القادمة ..
لكن ،، علشان يوصلوا لازم يكون لهم منبر يتكلموا من خلاله .. قاعدة ينطلقوا منها .. بحرية بدون دخول فى صراعات .. تعبير عن ابداعهم لفايدة الإنسانية و كل كوكبنا الحبيب.
لازم ندعمهم بالمهارات اللى محتاجينهم .. نقدم لهم كل الفرص المناسبة الفنية والعلمية والأدبية
من هنا كانت فكرة الموقع .. شخابيط .. أفكار شباب تتحول لحقيقة .. يستفاد منها العالم.. صورة وفكرة وكلمة تكون وعى إنسان يعمر الأرض .. وينشر الخير والسلام والانسانية .
فكرة موقع شخابيط
الموقع قائم على الشباب رؤية وإدارة وفكر و تنفيذ . وده أجمل مافيه …
لهم كل التهنئة و الشكر والتحية .. ارفع لهم القبعة على إنهم قرروا .. صمموا .. ونفذوا
ولهم كل أمنياتى بالنجاح و يكون شخابيط من أكبر وأقوى المواقع الشبابية اللى تفيد كل فئات المجتمع وخاصة الشباب و الاطفال و الجيل الناشىء.
